100 televizor üç il fasiləsiz işlədi: ən etibarlı modellər AÇIQLANDI
Ölkə.az xəbər verir ki, üç il ərzində televizorların hər biri təxminən 18 min saat işləyib.
Bu göstərici gündə orta hesabla 3 saat televizora baxan bir istifadəçi üçün təxminən 16 illik istifadəyə bərabərdir.
Sınaq zamanı LCD, LED və OLED ekranlı modellər yoxlanılıb. Qurğular gecə-gündüz, yüksək parlaqlıq səviyyəsində işlədilib ki, bu da onların daxili komponentlərinə əlavə yük yaradıb.
Mütəxəssislərin diqqət çəkdiyi əsas məqamlardan biri nasazlıqların ekran matrisindən deyil, arxa işıqlandırma sistemindən qaynaqlanması olub.
LCD televizorlarda arxa işıqlandırmada istifadə olunan LED-lərdən cəmi birinin sıradan çıxması belə ekranda qaranlıq ləkələrin yaranmasına səbəb ola bilir. Ekspertlərin sözlərinə görə, köhnə LCD televizorlarının dəyişdirilməsinin ən çox rast gəlinən səbəblərindən biri də məhz bu nasazlıqlardır.
Bəzi hallarda görüntünün yanması (burn-in) müşahidə olunsa da, bu problem əsasən televizorlar uzun müddət ekstremal şəraitdə işlədildikdə ortaya çıxıb.
Sınağın nəticələrinə əsasən, LG və TCL markalarının bəzi modelləri ən yüksək etibarlılıq nümayiş etdirib.
Samsung və Sony markalarının müəyyən modelləri də uğurlu nəticələr göstərib.
Bununla belə, mütəxəssislər vurğulayırlar ki, etibarlılıq eyni markanın müxtəlif modelləri arasında da ciddi şəkildə fərqlənə bilər. Buna görə də bir modelin nəticəsinə əsaslanaraq bütün markanı qiymətləndirmək düzgün deyil.
Araşdırmanın yekununda ekspertlər belə nəticəyə gəliblər ki, müasir televizorlar ümumilikdə düşünüldüyündən daha etibarlıdır və OLED texnologiyası uzunmüddətli, intensiv istifadəyə ən davamlı ekran texnologiyalarından biri hesab oluna bilər. Ekspertlər bunu OLED ekranlarda ayrıca arxa işıqlandırma sisteminin olmaması ilə izah edirlər. Bu ekranlarda hər piksel müstəqil şəkildə işıq saçdığı üçün əlavə işıqlandırma komponentləri sıradan çıxmır.(lent.az)
