2 milyondan çox körpənin həyatını xilas edən şəxs

Ölkə.Az xəbər verir ki, Avstraliyada yaşayan Ceyms Harrison 100 dəfədən çox qan verdiyinə görə Ginnesin rekordlar kitabına düşüb. Bununla o nə az, nə çox 2 milyondan çox insanın, daha dəqiq desək, körpənin həyatını xilas etməyə müvəffəq olub. 

Nədir onun qanını digərlərindən fərqləndirən? Məsələ burasındadır ki, 50 il əvvək həkimlər onun qanında rezus-konfliktdən qaçmağa imkan verən xüsusi maddələr aşkar ediblər. Bu maddələr ana və bala arasında ölümcül təhlükəli sayılan rezus-faktor müxtəlifliyi problemini aradan qaldırmağa qadirdir.

Ceyms 14 yaşında çox ağır əməliyyat keçirib və əməliyyatdan sonra ona 13 litr qan tələb olunub. Məhz donor qanı sayəsində sağ qaldığını anlayan Ceyms özünə söz verib ki, 18 yaşı tamam olduqdan sonra o ömür boyu donorluqla məşğul olacaq. 

Hazırda isə onun yardım etdiyi insanların sayı 2,4 milyonu ötüb və onların arasında qızı Treysi də yer alır. Artıq 50 il donorluq edən Harrison hələ də bu işdən əl çəkməyi düşünmür və hesab edir ki, bu ona Tanrı tərəfindən verilmiş xüsusi vergidir.