Üçüncü Reyxin cəlladı

Adolf Otto Eyhman yüksək çinli SS zabiti, mənfur şəxsiyyət, Hitlerin əliqanlı cəlladıdır. Eyhman milyonlarla insan həyatının məhvinə səbəb olub və yəhudi xalqının soyqırımına görə məsuliyyət daşıyır.

Ölkə.Az bu gün oxuculara Üçüncü Reyxin cəlladı Adolf Eyhmanın həyatını təqdim edir.

Uşaqlığı

Adolf 1906-cı ildə kiçik alman şəhəri Zolingendə anadan olub. Atası elektriklə işləyən tramvay şirkətinin mühasibi olub. 1913-cü ildə Eyhmanlar ailəsi Avstriyaya köçür. Adolfun gənclik illəri Lins şəhərində keçib. Milli-sosializmin lideri Hitler də gənclik illərini bu şəhərdə keçirib.

Eyhman məktəbə daxil olur. Onun sinif yoldaşları ilə münasibətləri gərgin idi. Çünki qarasaçlı və tünd qəhvəyi rəngli gözləri olan Adolfa "kiçik yəhudi"deyərək cırnadırdılar. Bu isə onu hiddətləndirirdi. Çünki antisemitizm siyasəti nəinki Almaniyada, eyni zamanda Avstriyada da məşhur idi və yəhudi sözü təhqir sayılırdı. Bir versiyaya əsasən Eyhman öz işi ilə yəhudilərə olan nifrətini sübuta yetirmək barədə and içib. Amma heç kəs onun andına əhəmiyyət verməyib və bu andı sadəcə yeniyetmə nifrəti, aqressiyası sayıb.

Yeniyetmə və gənclik dövrü

Məktəbi bitirdikdən sonra Eyhman yüksək federal elektrotexnika peşə məktəbinə daxil olur. O, bu məktəbdə çox yox, cəmi 4 semestr təhsil alır. Ailənin maddi imkanı Adolfun təhsil almasına kifayət etmirdi. Təhsili yarımçıq qoyan Eyhman Vyanada fəaliyyət göstərən ticarət şirkətlərinin birinə satış təmsilçisi kimi işə girir.

Falçının gələcək barədə proqnozu

Bəzi tarixçilərin fikrinə görə, məhz həyatının bu dövründə Adolfa gələcək taleyi barədə məlumat verilir. Avstriyanın paytaxtında kifayət qədər cadugər, falçı, astroloq var idi. Adolf Hitler də nə vaxtsa tez-tez cadugərlərin və falçıların qonağı olub. Bir çox alman kimi nasist lider də mistik qüvvələrə meyilli idi.

Eyhman da gələcək taleyini öyrənmək üçün məşhur falçıya müraciət edir. Falçı ona qan və ölüm üzərində qurulmuş başgicəlləndirici karyera quracağını söyləyir. Falçının dəhşətli proqnozuna görə, Eyhman bir çox insanı cəhənnəm alovuna göndərəcək və ömrünün sonunda da onu elə bu alov gözləyəcək. Gənc Adolf falçıya o qədər inanmasa da, dediklərini yadında saxlayır.

Milli-sosial hərəkat

Almaniyada olduğu kimi, Avstriyada da milli-sosialistlərin hərəkatı getdikcə güclənirdi. Onların yəhudi məsələsi ilə bağlı proqramı Eyhmanın ruhuna uyğun idi. Adolf artıq 1927-ci ildə "gənc cəbhəçilər ittifaqı" sıralarına qoşuldu və 5 il sonra isə milli-sosialist partiyasının üzvü oldu. Bu müddət ərzində Eyhman Avstriya hökumətinin diqqətini cəlb edə bilmişdi. Onun çıxışları hakimiyyət dairələrinin xoşuna gəlmirdi.

Berlin həyatı

Avstriya hökuməti ilə yola getməyən Adolf Berlinə yola düşür. Tezliklə Almaniyada keçirilən seçkilərdə milli-sosialistlərin lideri Adolf Hitler qalib gəldi və partiya hakim partiyaya çevrildi. Bu vəziyyət Eyhman üçün əsl uğur sayılırdı. 1934-cü ildə Adolf artıq partiyanın həqiqi üzvü idi. Operativ işlə bağlı Eyhmanın arzuları həyata keçirdi. İlk olaraq ona adi bir iş tapşırsalar da, Eyhman bu işin öhdəsindən layiqincə gəlir. Gəncin uğurları qiymətləndirildi və tezliklə Henrix Müllerin rəhbərlik etdiyi qestapo qapıları Eyhmanın üzünə açıldı.

Karyerada yüksəliş dövrü

Yeni işçinin keyfiyyətləri və xidmət ehtirası Müllerə çatdırıldı. SS reyxsfüreri Gimmlerlə söhbət zamanı Müller Eyhmanın antisemit baxışlarını və bu məsələdə fanatizmə qədər çatdığını xüsusilə vurğuladı. Eşitdiyi xəbər Gimmlerin çox xoşuna gəldi və tezliklə Eyhman idarədə yəhudi məsələləri ilə bağlı şöbəyə təhkim edildi. İşə qollarını çirmələyən Eyhman aktiv fəaliyyətə başlayır. Onun səyləri tezliklə nəzərə çarpdı və bu karyera yüksəlişinə çox müsbət təsir etdi.

Qısa müddətə SS oberşturmbannfürer rütbəsi ilə təltif edilən Eyhman Mərkəzi İmperiya idarəsinə təyin edildi. Burada o, yəhudi emiqrasiyası məsələsi ilə məşğul olmağa başladı. Bir müddət sonra Adolfu İmperiya təhlükəsizlik idarəsində B-4 sektorunun rəisi təyin edirlər. Bu strukturlarda göstərdiyi fəaliyyət Eyhmanı yəhudi məsələsində mütəxəssisə çevirir. Beləcə Eyhman ən yüksək səviyyədə təşkil edilən gizli iclaslara çağrılır.

İkinci dünya müharibəsi dövründə Eyhmanın əsas fəaliyyəti yəhudi probleminin birdəfəlik həlli ilə bağlı idi. Almaniyanın işğal etdiyi bütün dövlətlərlə yanaşı müttəfiq dövlətlərdə yaşayan yəhudiləri də xüsusi düşərgələrə toplayırdılar. 1944-cü ilin sentyabr ayına qədər 4 milyon yəhudi qətlə yetirilmişdi. 2 milyon yəhudi isə digər xidmət orqanları tərəfindən öldürülmüşdü.

Vyanalı falçının proqnozu özünü doğrultmuşdu. Eyhmanın karyerası ölüm və qan, krematoriya və sobaların alovu üzərində qurulurdu.

İkinci dünya müharibəsinin sonu

İkinci dünya müharibəsinin sonlarına doğru Almaniyanın məğlub olacağını hamı anlayırdı. Eyhman da gizlənməyə cəhd göstərir. Amma Adolf Amerika əks-kəşfiyyatı tərəfindən həbs edilir. Özünü başqa adla təqdim edən cəllad hərbi əsirlər üçün nəzərdə tutulmuş düşərgəyə göndərilir. 1946-cı ilə qədər düşərgədə qalan Eyhman nəhayət sirli şəkildə yoxa çıxır. Bu günə qədər də Eyhmanın düşərgədən necə qaçdığı sirr olaraq qalıb. Çox güman ki, Eyhmana gizli nasist təşkilatları kömək etmişdi və cəllad başqa bir adla Cənubi Amerikaya qaçmışdı.

Eyhman bir yerdə dayanmır, izini itirmək üçün şəhərləri gəzirdi. Nəhayət Argentina pasportu əldə edən Eyhman 1952-ci ilə qədər burada yaşayır. 1952-ci ildə başqa adla Almaniyaya gəlir və arvadı ilə nikaha girir. Bu isə ona ailəsini Argentinaya aparmağa kömək edir. Eyhman 1960-ci ilə qədər Argentinada yaşayır və "Mercedes Benz" şirkətinin filialında çalışır.

Hindu falçı

Argentinada çoxsaylı səfərləri zamanı Eyhman təsadüfən hindu cadugərlə rastlaşır. Adolf fala baxdırmaq istəyir və cadugərə müraciət edir. Adolfu bir neçə saniyə süzən cadugər onun çox pis insan olduğunu, milyonlarla insanın qətlində günahkar olduğunu bildirir. Eyhman özünü itirir və bunu necə anladığını soruşur. Cadugər isə, Adolfa deyir: "Sənə nə vaxtsa bi falçı cəhənnəm alovunda yanacağını deyib. O müddətə az qalıb".

Falçı başqa bir söz demədən çıxıb gedir. Eyhman hindu cadugərin sözlərinə əhəmiyyət verməməyə çalışır. Amma onun taleyini vaxtilə Vyana falçısı əvvəlcədən demişdi.

Acı sonluq

Hər şey falçının dediyi kimi olur. Bu müddət ərzində İsrailin kəşfiyyat orqanı (Mossad) Eyhmanı bütün dünyada axtarırdı. Adolfun oğlu Nikolas alman yəhudisi Lotar Germanın qızı ilə tanış olur. German da vaxtilə nasistlərdən əziyyət çəkmişdi və Argentinada yaşayırdı. Yəhudi bilirdi ki, Eyhman da bu ölkədə gizlənir. Bir dəfə qızı Germana Eyhman soyadlı bir gənclə tanış olduğunu deyir. Nikolas qıza eyni zamanda atasının Almaniya qarşısında böyük xidmətlərinin oluğunu da bildirmişdi. Bu xəbəri eşidən Lotar German Nikolasın atasının kim olduğunu anlayır və bu barədə lazımi yerlərə xəbər verir.

Məhkəmə

1960-cı ilin may ayında Eyhman Mossad agentləri tərəfindən həbs edilərək yəhudi xalqına qarşı törətdiyi cinayətlərə görə cavab vermək üçün İsrailə aparılır. Məhkəmə prosesində Adolf Eyhmanın fəaliyyətindən əziyyət çəkən şahidlər dindirilir. Adolf bəşəriyyətə qarşı cinayət törətməkdə, gestapo və SS üçün çalışmaqda ittiham edilir.

İttiham hökmü Adolfun hərbi cinayətlərini sübuta yetirir və 1961-ci ilin dekabrında məhkəmə ölüm hökmü barədə qərar çıxarır. Bu qərara əsasən Eyhman asılmalı idi. 31 may gecəsi hökm icra olunur. Eyhman cinayətlərini etiraf etməkdən boyun qaçırır və özünü günahkar saymır. O, vətəni qarşısında xidmət etdiyinə inanırdı. Edamdan sonra nasist cəlladının cəsədi yandırılır və külü İsrailin dəniz sərhədlərindən kənarda açıq dəniz sularına səpilir.

Vyanalı falçının və hindu şamanın falı düz çıxır. Eyhmanın yəhudi xalqına qarşı nifrəti milyonlarla günahsız insanı udan cəhənnəm alovunu yandırdı. Bu alov Adolfun özünü də yandırdı...

Hikmət
Ölkə.Az