Xalq artistindən şəhid oğlu haqda ÜRƏK SIZLADAN SÖZLƏR - "Sonuncu söhbətimizdə dedi ki..." xa0- FOTOLAR

Xalq artisti Əli Nur Şuşanın azad edilməsi uğrunda şəhid olan oğlu, baş leytenant Rövşən Nurzadə barədə danışıb.

Sənətkar "Ölkə.Az"-a açıqlamasında oğluyla son söhbəti və cəbhəyə getdiyi ərəfədən danışıb:

"Oğlum hər gün həm mənimlə, həm anasıyla, həm də həyat yoldaşı və övladlarıyla danışırdı. Bəzən gündə iki-üç dəfə danışırdıq. Sonuncu dəfə noyabrın 2-də səhər tezdən danışdıq. Dedi ki, bizi Cəbrayıla gətiriblər. Dedim, ay bala, axı Cəbrayılı azad etmisiniz. Dedi ki, bizi burdan harasa aparacaqlar, amma dəqiq hara olduğunu bilmirik. Günorta zəng etdi ki, özünüzdən muğayat olun, uşaqları sənə tapşırıram (ağlayır). Sən demə, Şuşaya gedirmişlər".

Sənətkar qəhrəman oğluyla son görüşü barədə isə bunları deyib:

"Ağdamda on il xidmət etmişdi, sonra gəldi İqtisad Universitetini bitirdi, bankda yüksək vəzifədə çalışdı. İşlədiyi bank bağlandı, sonradan restoran götürüb işlətdi. Həmin ərəfədə də müharibə başladı. Hiss edirdim ki, dostlarıyla müharibə haqqında çox danışır. Yoldaşı da mənə deyirdi ki, deyəsən Rövşən cəbhəyə gedəcək. Dedim ki, onun qırx beş yaşı var, götürməzlər. Sonra səhər-səhər gəldi, bizə dedi ki, gedirəm. Özüm aparıb Yasamal hərbi komissarlığından yola saldım. Həmin gün oğlu da Türkiyədən gəlmişdi. Orada Akdeniz Universitetində təhsil alır. Cəbrayılda, Füzulidə, ən çox da Qubadlıdakı ağır döyüşlərdə iştirak etmişdi".

Qeyd edək ki, Rövşən Nurzadə noyabrın 6-da Şuşa uğrunda döyüşlərdə şəhid olub. Baş leytenant İkinci Fəxri Xiyabanda dəfn edilib.

İntiqam VALEHOĞLU

Ölkə.Az