"İstefa verəcəyəm" deyən Ayaz Salayevdən AÇIQLAMA

Xəbər verdiyimiz kimi, bu gün Azərbaycanın iki kino ittifaqı birləşib və yeni təşkilatın adı Azərbaycan Kinematoqrafçılar İttifaqı olub.

Ötən ilin 4 aprelində kinorejissor və kinoşünas, ssenarist, Əməkdar incəsənət xadimi Ayaz Salayev müsahibələrinin birində iki ittifaq birləşərsə, istefa verəcəyini demişdi:

"Əgər belə bir şey olsa, mən təşkilatda qalmayacağam. Hər iki təşkilatda hörmət etdiyim insanlar var. Lakin bu mənim üçün prinsipial məsələdir".

İttifaqların rəsmən birləşməsindən sonra Ölkə.Az mövqeyini öyrənmək üçün Ayaz Salayevlə əlaqə saxlayıb.

O, saytımıza açıqlamasında danışmaq istəmədiyini deyib:

"Qurultayla bağlı zəng etmisinizsə, heç nə demirəm. Olmamışam, xəbərim yoxdur".

Əməkdar incəsənət xadiminə "Demişdiniz ki, ittifaqlar birləşsə, istefa verəcəyəm" sözlərini xatırlatdıqdan sonra konkret cavab verməyib:

"İstefa yox, mən heç getməmişəm qurultaya. Mənə heç dəxli yoxdur. Getmək istəmədim. İstəsəydim gedərdim, istəmədim getmədim. Xahiş edirəm, bu haqda heç bir şey demək istəmirəm". 

Xatırladaq ki, A.Salayev Xalq artisti Şəfiqə Məmmədovanın rəhbərlik etdiyi Azərbaycan respublikası Kinematoqrafçılar İttifaqının üzvü olub.

Billurə Yunus