Həkimlikdən səhnəyə uzanan yol - Flora Kərimova kimdir?
Həmin vaxtdan Azərbaycan Dövlət Filarmoniyasında və digər mədəniyyət saraylarında, dövlət tədbirlərində çıxış edib. 1950-ci illərdən Azərbaycan Dövlət Tibb İnstitutunun "Çinar" rəqs ansamblında, 1960-cı illərdə isə Azərbaycan Teleradio Verilişləri Şirkətinin və Azərbaycan Dövlət Filarmoniyasının solisti olub.
1964-cü ildə Asəf Zeynallı adına Azərbaycan Dövlət Musiqi Texnikumunu bitirib. 1971-ci ildə Azərbaycan Dövlət Tibb İnstitutunda müalicə işi üzrə tam kursu başa vuraraq həkim ixtisasına yiyələnib. 1977-ci ildə Bakı Musiqi Akademiyasının vokal sinfini bitirib. Flora Kərimova üç dəfə ailə qurub. İlk evliliyi İbrahim Topçubaşovla olub. Bu evlilikdən övladı olmayıb. Oqtay adlı oğlu və Zümrüd adlı qızı var.
Flora Kərimovanın yaradıcılığında klassik opera (məsələn, "Qaynana" filmində "Sevil" operasından Dilbərin ariyası), milli opera (1965-ci ildə "Leyli və Məcnun" operasında Leyli rolu), xalq mahnıları, romanslar, bəstəkar mahnıları və estrada janrında yüzlərlə əsər yer alır. Sənətkar Azərbaycan estrada janrının üç banisindən biri hesab olunur. Digər iki banisi isə Rəşid Behbudov və Mirzə Babayevdir.
Onun ilk bəstəkarı Şərqdə ilk opera yazan qadın bəstəkar Şəfiqə Axundova olub. Flora Kərimova 1966-cı ildə Azərbaycan Dövlət Akademik Opera və Balet Teatrında Üzeyir Hacıbəyovun "Leyli və Məcnun" operasında çıxış edib. O, həmçinin 1968-ci ildə çəkilmiş "Qanun naminə" bədii filmində rol alıb. Flora Kərimova dördüncü oktavanı aşan nadir müğənnilərdəndir. O, nəinki dördüncü oktavada vokaliz edir, həm də həmin yüksək notlarda oxuya bilir.
Onun səsi bütövlükdə dörd oktavanı əhatə edir və kontraalt, mezzo-soprano, soprano, koloratur soprano diapazonlarını əhatə edir. Bundan əlavə, o, muğam ifaçısı kimi də tanınır. Azərbaycan Televiziya və Radiosunun "Qızıl Fond"unda ən çox sayda əsəri qorunan sənətçilərdən biri də Flora Kərimovadır.
Həmidə İbrahimova
