Səsi milyonları ayağa qaldırır – Ən məşhur mahnısı necə yaranıb?
Ölkə.az bu dəfə sizə onun həyatı, yaradıcılığı və çoxlarının bilmədiyi maraqlı faktları təqdim edir.
Şəmistan Əlizamanlı 1959-cu ildə Gürcüstanın Marneuli rayonunda anadan olub.
1977-79-cu illərdə sovet ordusu sıralarında həqiqi hərbi xidmət keçir.
1979-81-ci illərdə Cəfər Cabbarlı adına İrəvan Azərbaycan Dövlət Dram Teatrında aktyor işləyir.
Azərbaycan Dövlət Radiosunda diktor kimi çalışmağa başladığı dövrdə onu Moskvaya ixtisasartırma kursuna göndərirlər. Moskvada keçirilən diktorluq kursunu fərqlənmə ilə bitirir.
1992-ci ildə onu Azərbaycan Dövlət Televiziyasında çalışmağa başlayır. O zaman Müdafiə Nazirliyindən səsi xalqı səfərbərliyə səsləyən diktor axtarırmışlar və onun səsi üzərində dayanırlar. Həmin ilin iyulun 7-dən Azərbaycan Televiziyası ilə efirdə, hərbi geyimdə hərbi diktor kimi cəbhə bölgəsində olan vəziyyəti xalqa çatdırmağa başlayır.
1992-ci ilin oktyabrından hərbi ştata keçərək leytenat rütbəsi alır.
Bəlkə də çoxları bilmir ki, Şəmistan Əlizamanlının ən məşhur əsərlərindən olan “İgid əsgər” mahnısı Azərbaycanın Milli Qəhrəmanı Yusif Mirzəyevin xatirəsinə həsr olunub. Bu mahnının arxasında isə xəstəxana otağında verilən bir söz və qəhrəmanlıqla dolu təsirli bir həyat hekayəsi dayanır.
Birinci Qarabağ müharibəsinin qəhrəmanlarından olan Azərbaycanın Milli Qəhrəmanı Yusif Mirzəyev səhhətində yaranan problemlərlə əlaqədar xəstəxanada müalicə alarkən Şəmistan Əlizamanlı ilə eyni palatada qalır. Həmin xəstəxananın həkimi Şahin Musaoğlu “İgid əsgər, möhkəm dayan” mahnısını yazır. Mahnının sözlərini bəyənən Yusif Mirzəyev Şəmistan Əlizamanlıdan onu ifa etməsini xahiş edir. Şəmistan Əlizamanlı isə mahnını oxuyacağına və Yusif Mirzəyevə həsr edəcəyinə söz verir.
Daha sonra Yusif Mirzəyev müalicəsini yarımçıq qoyaraq yenidən cəbhəyə qayıdır və 1993-cü il fevralın 19-da Ağdərə istiqamətində gedən döyüşlərdə qəhrəmancasına şəhid olur. Şəmistan Əlizamanlı da verdiyi sözə əməl edərək “İgid əsgər” mahnısını onun xatirəsinə həsr edir.
Sonradan Şəmistan Əlizamanlı "Cənab Leytenant","And içirik", "Çağırır vətən", "Qalx, Azərbaycan", "Vətən əmanəti", "Can Azərbaycan", "Birinci batalyon", , "And içirəm", "Sıravi Əhməd", "Çırpınırdı qara dəniz", "Dağlar", "Azərbaycan-Türkiyə", "Ana yurdum", "Tanrı türkə yar olsun" və s. mahnılarını da ifa etməyə başlayır.
Hazırda onun ifa etdiyi mahnılar Azərbaycan Milli Ordusunun hərbi hissələrində səslənir. O, həmçinin bir sıra kliplərin və musiqili kompozisiya şəklində olan şeirlər toplusunun da müəllifidir.
Bundan əlavə, Şəmistan Əlizamanlı Türkiyədə də geniş fəaliyyət göstərir. Onun bəstələdiyi və ifa etdiyi "Zafer Bismillah" mahnısı 2019-cu ildə Türkiyədə Rəcəb Tayyib Ərdoğanın lideri olduğu Ədalət və İnkişaf Partiyasının seçki musiqisi olub.
Şəmistan Əlizamanlının səsi təkcə Azərbaycanda deyil, Türkiyənin milyonlarla izləyicisi olan “Diriliş Ərtoğrul” serialında da səslənib. O, serialda ozan obrazında çıxış edərək “Allah türkə yar olsun” mahnısını ifa edib və tamaşaçıların rəğbətini qazanıb. Dünyanın 185 ölkəsində 25-dən artıq dildə yayımlanan, hər seriyası təxminən 2 milyard 600 milyon insanın sevərək izlədiyi serialda, onun ifa etdiyi bu mahnı və rol aldığı səhnə rekod sayda baxışla yadda qalıb.
Ailəsi haqqında çox danışmağı sevməyən Şəmistan Əlizamanlının bir qızı və bir oğlu var.
Həmidə İbrahimova
