200 film, milyonlarla pərəstişkar: Kadir İnanırın həyat hekayəsi - VİDEO
Gəlin, arxasında yüzlərlə film və milyonlarla insanın yaddaşında silinməz xatirələr qoyan Kadir İnanırın həyat yoluna nəzər salaq.
15 aprel 1949-cu ildə Türkiyənin Ordu vilayətində dünyaya gələn Kadir İnanır əslən Trabzonun Sürmene bölgəsindən olan bir ailənin övladı idi. 14 bacı-qardaşın ən kiçiyi olaraq dünyaya gələn Kadir İnanırın uşaqlığı Qara dəniz bölgəsinin sərt şəraitində, böyük, lakin sıx bir ailə mühitində keçib.
Bəlkə də həyatının ən diqqət çəkən detalı illər sonra anasından eşitdiyi sözlər idi. Şöhrət qazandıqdan və anasına hədiyyələr apardığı günlərin birində anası Rukiyə xanım ona heç vaxt unutmayacağı bu sözləri deyib: “Səni dünyaya gətirməmək üçün bildiyim bütün üsulları sınadım, oğlum, amma ölmədin... Demək, sən Kadir İnanır olacaqmışsan.”
Maddi çətinliklər səbəbindən onun doğulmasını istəməyən anasının illər sonra etdiyi bu etiraf Kadir İnanırın həyatındakı ən sarsıdıcı xatirələrdən biri kimi yadda qaldı. Hələ dünyaya gəlməzdən əvvəl başladığı həyat mübarizəsi, bəlkə də sonrakı illərdə onu milyonların sevimlisinə çevirən xarakterinin ilk işarəsi idi.
Kadir İnanırın aktyorluq istedadı çox erkən yaşlarında üzə çıxdı. O, uşaq yaşlarından etibarən teatr tamaşalarında səhnəyə çıxaraq diqqət çəkməyə başladı. İstanbula gəldikdən sonra Haydarpaşa Liseyində internat təhsili aldı, daha sonra isə İstanbul Jurnalistika Ali Məktəbinin Radio-Televiziya fakültəsini bitirdi. Bu, onu Yeşilçamın peşəkar təhsil almış azsaylı aktyorlarından birinə çevirdi.
Kadir İnanırın şöhrət yolu asan başlamadı. O, 1967-ci ildə keçirilən kino aktyoru müsabiqəsində uğur qazana bilməsə də, bir il sonra “Saklambaç” qəzetinin təşkil etdiyi fotonovella aktyoru müsabiqəsində qalib oldu. Bu uğur onun sənət karyerasının başlanğıcı sayılır. O, qısa müddətdə Yeşilçamın ən tanınmış kişi ulduzlarından birinə çevrildi.
Təxminən 200 filmdə rol alan Kadir İnanır sərt baxışları, gur səsi və xarizmatik duruşu ilə bir dövrün simvollarından birinə çevrildi. Xüsusilə aktrisa Türkan Şoray ilə baş rolunu paylaşdığı “Selvi Boylum Al Yazmalım” filmində canlandırdığı “İlyas” obrazı Türk kino tarixinin ən yaddaqalan obrazlarından biridir. Daha sonra “Tatar Ramazan”, “Dərman”, “İlanların Öcü”, “Körpü”, “Qırıq Bir Sevgi Hekayəsi” və digər ekran işlərində yaratdığı obrazlarla o, təkcə kino ulduzu deyil, həm də cəmiyyətin vicdanını təmsil edən sənətçilərdən biri oldu. Kadir İnanır rəsmi nikaha daxil olmayıb və övlad sahibi olmayıb.
O, uzun illər aktrisa Jülide Kural ilə xoş münasibət yaşayıb. Övlad sahibi olmamasının səbəbini isə illər əvvəl duyğusal sözlərlə izah edib: “Atamın 14 övladı var idi, mən də övladlarımın olmasını istəyirdim. Amma vaxtında qismət olmadı. Bu yaşdan sonra dünyaya gələcək uşağın mənsiz qalmasını istəmirəm”.
Aktyor ömrünün son illərində müxtəlif sağlamlıq problemləri ilə mübarizə apardı. O, 2012-ci ildə ağciyər əməliyyatı keçirdi və sonradan səhhətindəki çətinliklərin böyük hissəsini geridə qoydu. 2021-ci ildə iflic riski ilə üzləşsə də, müalicə prosesini uğurla başa vurdu. Son illərdə bir neçə dəfə xəstəxanaya yerləşdirilən sənətçi, sevənlərinin dəstək mesajlarından mənəvi güc aldı. 2026-cı ilin iyununda isə Türk kinosunun “Dəli Kadir”i uzun müddətdir davam edən sağlamlıq problemlərinə məğlub olaraq 77 yaşında vəfat edib.
Həmidə İbrahimova
