Rövşən Kərimduxtun peşkəş edilən"pəpə"si və ya...

Ölkə.Az fəxri adı olmayan sənət adamlarıyla bağlı silsilə yazıları davam etdirir. Növbəti "hədəf" Akademik Milli Dram Teatrının aktyoru Rövşən Kərimduxtdur.

Qısaca olaraq deyək ki, Kərimduxt Rövşən Ramazan oğlu 24 oktyabr 1969-cu ildə anadan olub. Otuza yaxın filmdə irili-xırdalı rollar oynayıb, "Azdrama"nın aparıcı aktyorlarından hesab edilir.

Öncədən qeyd edim ki, "teatrşünaslar"ın, "intellektuallar"ın rəyini nəzərə almayıb, bu yazımda da (ilk yazı Anar Heybətov haqda idi) teatr terminlərindən, anlaşılmayan sözlərdən istifadə etmək istəmirəm. Birincisi, ona görə ki, çoxbilmiş görünmək fikrim yoxdur, ikincisi bu yazı orta statistik oxucu üçün nəzərdə tutulub. Üçüncüsü isə lap tutaq ki, nazir Əbülfəs Qarayev 5-10 dəqiqəsindən keçib bu yaxını oxudu, nə dəyişəcək ki? Heç nə. Cənab nazir ingilis dili müəllimidir, onu bu cür ağır terminlərlə yormaq da insafdan deyil. Uzaqbaşı Ədalət müəllim Vəliyev oxuyacaq, o da ki, Rövşəni neçə illərdir tanıyır, məsləhət bilsəydi, "əməkdar artist" olmasına vəsilə olardı. Hər halda, tədbir aparıcısı əməkdar artist ola bilirsə, "Azdrama"da onlarla tamaşada rol almış Kərimduxtun fəxri ad alması problem olmamalıydı.
Yeri gəlmişkən, gəlin görək, Rövşən Kərimduxtun aktyor kimi özəlliyi nədədir?

Yəqin razılaşarsınız ki, Kərimduxtun fakturası yetərincə yaddaqalandır, səhnədə "itib-batmır". Burada həm boy-buxun, həm də aktyor peşəkarlığı rol oynayır. Bir daha qeyd edirəm ki, Kərimduxt nə böyük aktyor, nə də dahi deyil. Amma yaxşı, keyfiyyətli, rejissorun tapşırıqlarını yüksək səviyyədə icra edə bilən aktyordur. Bəlkə də 30-40 il əvvəl olsaydı, onun fəxri ad almasını iddia etməmək də olardı. Ancaq indiki "çərçivələr"i nəzərə alanda, "hədəf"imiz ən azı 5 il əvvəl fəxri ada layiq görülməliydi.

Son olaraq, bəzi aktyorlardan onun barəsində eşitdiyim bir neçə kəlməni də sizinlə paylaşım. R.Kərimduxt intriqaya meyilli şəxs deyil, adətən "Azdrama"da baş verən hadisələrdən ən sonda xəbər tutanlardan biridir, gizli, yaxud açıq formada heç vaxt mübarizə aparmır. Elə İsrafil İsrafilov olaylarında da Kərimduxt müşahidəçi mövqeyində idi. Düzdür, həmin vaxt səhhətində olan problemləri də nəzərə almaq mümkündür. Lakin görünən budur ki, hətta səhhətində heç bir problem olmasaydı belə, baş verənlərdə yaxından iştirak etməyəcəkdi.

Görünür, elə işlədiyi bütün rəhbərlər də "ağlamayan uşağa pəpə yoxdur" prinsipini əsas götürüb Kərimduxtu hər zaman fəxri ad siyahılarından kənar saxlayıblar. Və o "pəpə" ola bilsin ki, (çox güman ki də belədir) müxtəlif əsaslarla digərlərinə peşkəş edilib.