Türkiyənin “Mərdəkan”ında başçı olmaq istəyən ağdamlı Zülfiyyə xanım kimdir? - MÜSAHİBƏ

Türkiyədə 31 mart 2024-cü il tarixində yerli özünüidarəetmə orqanlarına ümumi seçkilər keçiriləcək. Artıq 35 siyasi partiya namizədlərinin siyahısını Türkiyə Ali Seçki Şurasına təqdim ediblər. 

Seçkilərdə Türkiyənin Məmləkət Partiyasının bələdiyyə sədrliyinə namizədlərindən biri də azərbaycanlı Zülfiyyə Günəşdir.

Ölkə.Az seçki ərəfəsində Z.Günəşlə söhbətləşib.

- Salam, Zülfiyyə xanım, əvvəlcə özünüz haqqında məlumat verərdiniz?

- 1973-cü ildə Ağdam rayonunun Gülablı kəndində andan olmuşam. İbtidai təhsilimi kəndimizdə almışam. 15 yaşımda təhsilimi Bakıda A.S.Makarenko adına Respublika Humanitar Fənlər Təmayüllü Gimnaziyada davam etdirmişəm. 1991-ci ildə Azərbaycandan Türkiyəyə gələn ilk 50 nəfər tələbənin içərisində yer alan 3 qızdan biri idim. İstanbul Universitetinin tarix fakültəsində təhsil alırdım. 1993-cü ildə - 6 apreldə Kəlbəcərdə döyüşmək üçün Azərbaycana qayıtdım, amma bizi yenidən Türkiyəyə geri göndərdilər. 
1995-ci ildə İstanbul Universitetini bitirdim və o zamandan bəri Türkiyədə yaşayıram.

- Türkiyədə qalıb işləməyə qərar verdiniz...

- Bəli, uzun illər məktəblərdə müəlllim kimi çalışdım. Bu dönəmdə eyni zamanda yerli qəzet və radiolarda çıxışlarım, yazılarım oldu. "Gözlərim yol çəkər Qarabağ" kitabı mənimlə müsahibə əsasında hazırlanıb. 1992-ci ilin fevralında Azərbaycana gəldim. O vaxt Ağdamda vəziyyət gərgin idi, evlər atəşə tutulurdu. Hətta qonşumuzda bir qadın vəfat etmişdi. Elə o vaxtdan bizimkilər də Gülablıdan çıxdılar. Daha sonra isə kəndimiz işğal edildi.
Vətəndən uzaqda olsam da, daim onun üçün çalışmışam. Müharibə Veteranı Qadınlar Dərnəyinin türkiyə təmsilçisi olaraq 50-yə yaxın universitetdə konfrans verdim, müxtəlif radio və televiziyalarda çıxışlar etdim, eyni zamanda müəllimlik fəaliyyətimə də davam edirdim.
İllər sonra torpaqlarımız işğaldan azad ediləndə Gülablıya kəndimizdən ilk qadın olaraq ziyarətə getdim.

 - Bildiyim qədərilə təkbaşına aksiya da keçirmisiniz.

 - 2019-cu ildə erməni kilsəsinin önündə təkbaşına pankart açaraq aksiya keçirmşdim. Pankartda ingiliscə, fransızca və ermənicə "xahiş etsəm, 27 il öncə Azərbaycandan - Xocalıdan ermənilərə əsir düşən qadınlarımız üçün də dua edə bilərsinizmi?" sözləri yazılmışdı. Buna görə polis tərəfindən bir neçə saatlığa saxlanılsam da, daha sonra sərbəst buraxıldım.
Bundan sonra Ziya Şahin "Qarabağda savaşan qadınlar" kitabını yazdı. Orada da mənim haqqımda 15 səhifəlik məlumat yer alıb. Həmin kitab türk diasporu tərəfindən ABŞ-də ingilis dilinə tərcümə edilir. 

- Yaşadığınız Silivri rayonunda Azərbaycanı tanıyırlarmı?

- Silivri bölgəsində 25 ildir yaşayıram. Buranın müxtəlif məktəblərində dərs demişəm, xalqı tanıyıram. Əhalisinin sayı 240 min nəfərdir.
Nə qədər Türkiyə türkcəsində danışsam da, səsimdən, danışığımdan azərbaycanlı olduğum bilinir. Müşahidələrim onu deməyə əsas verir ki, burada azərbaycanlılara qarşı çox böyük sevgi yox idi. Türkiyədəki yanğınlardan sonra Azərbaycandan buraya yardım göndərilməsi, həmçinin 6 fevral zəlzələsindən sonra Azərbaycan xalqının öz dostluğunu, qardaşlığını bir daha göstərməsi, burada əhalinin münasibətinin xeyli dəyişməsinə səbəb oldu. Yəni əhalinin Azəbaycana qarşı sevgisinin artdığını müşahidə etdim.
Ümumilikdə Silivridə çox azərbaycanlı yaşamır. Bura ümumiyyətlə, kənardan gələnlərin sayı çox azdır. Silivrini hər zaman Mərdəkana bənzədirəm. Məndən "harada yaşayırsan" soruşulanda "Türkiyənin Mərdəkanı"nda deyirəm. 

- Bu illər ərzində müəllimlik, yazı fəaliyyəti diaspor işi ilə məşğul olmusunuz. Deyirlər ki, ağdamlılar ticarəti yaxşı bacarır. Bu sahədə özünüzü sınamısınızmı?

- Mən balıq bürcüyəm, bu bürcdən olanlar ümumiyyətlə, ticarətdə gəlir əldə etməyən tiplərdir. Ağdamlı olsam da, ticarət mənə yaraşmır. Çünki nə satsam, pulsuz verirəm. Ona görə mənə satış qadağan olunub (gülür). 

- Necə oldu ki, seçkilərdə iştirak etməyə qərar verdiniz?

- Əslində, burada rəfiqəm bələdiyyə sədrliyinə namizəd olmağa hazırlaşırdı.  Sadəcə, müəyyən səbəblərdən onun namizədliyini vermək alınmadı. Məmləkət Partiyası bizim bölgədən namizəd çıxarmalı idi və mənim namizədliyimi irəli sürdülər.

Çünki mən burada uzun illərdir, yaşayıram, çox kəndlərində müəllim işləmişəm, insanlarla münasibətlərim də yüksək səviyyədədir. Məhərrəm İncənin köməkçilərindən biri Silivridə kimi namizəd göstərəcəklərini fikirləşdiyi bir vaxtda təbii ki, burada CV-lərimizə baxdılar, fəaliyyətlərimizə nəzər saldılar və məni seçdilər.

- Seçkilərdə namizədlərin vədləri olur. Siz seçiləyiniz təqdirdə hansı işləri görəcəksiniz?

-Silivri əkinçilik üçün münbit torpaqları olan bölgədir. Bu mənada xalqa dəstək göstərməyi düşünürəm. Yəni tanzim satış (bazarda əsas istehlak məhsullarının qiymətinin artmasının qarşısını almaq və istehlakçıların daha sərfəli qiymətlərlə alış-veriş etmələrini təmin etmək məqsədilə həyata keçirilən satınalma) etməyi düşünürük. Yəni məhsulu birbaşa fermerdən alıb satışını təşkil edəcəyik. Çünki Silivri elə bir yerdir ki, nə əksən bitəcək, amma sata bilmədikdən sonra məhsul əldə qalıb xarab ola bilər. Bu da onunla nəticələnəcək ki, fermer torpağını satıb işləmək üçün böyük şəhərlərə üz tutacaq. Bizim də məqsədimiz budur ki, fermerin əlində məhsul qalmasın. 

Bundan əlavə, turizm üçün də müəyyən addımlar atmağı düşünürük. Məsələn, turist cəlb etmək məqsədilə sahilə yaxın Kale parkda Atatürkün selanikdəki evinin eynisinin tikintisini planlaşdırırıq.

Eyni zamanda burada mövcud olan problemlərdən biri də gənclər arasında narkotik maddələrdən istifadə yaşının getdikcə azalmasıdır. Bu rəqəm artıq 12-yə enib. Bunun qarşısının alınması üçün maarifləndirmə tədbirlərinin görülməsi, həmçinin reabilitasiya mərkəzlərinin yaradılması və asılılığı olan şəxslərin xilas edilməsi istiqamətində addımlar atmağı düşünürük.

Digər tərəfdən Azərbaycanı da unutmamışıq. Əgər seçilsəm, Ağdam ilə Silivrini qardaşlaşmış rayon olaraq görmək istəyirəm. 

- Soyadınızı Akdağdan Günəşə dəyişmisiniz. Bunun səbəbi nədir?

- Bir çox yerdə Zülfiyyə Günəş kimi tanınıram. "Günəş" təxəllüsünü qədim Azərbaycanın simvolu olaraq götürmüşəm.

- Nə vaxta birdəfəlik Azərbaycana qayıtmaq fikriniz varmı? 

- Açığı, qayıtmaq məsələsini hələ özüm də bilmirəm. Allah bilər. 

- Vaxt ayırdığınız üçün təşəkkür edirəm.

- Siz də sağ olun.

Billurə Yunus