Deputat: “Ancaq milli-mənəvi, dini dəyərlərimizə riayət etməklə pandemiyaya qalib gələ bilərik”
Bunu “Ölkə.Az”a açıqlamasında millət vəkili Aydın Hüseynov deyib.
Onun sözlərinə görə, Azərbaycan Prezidenti koronavirus pandemiyasının qarşısının alınmasına dair effektiv tədbirlər görülməsi məqsədi ilə bir sıra sərəncam və fərmanlar imzalayıb.
“Koronavirus pandemiyasına qarşı mübarizədə Prezident İlham Əliyev və Birinci vitse-prezident Mehriban xanım Əliyeva cəmiyyətə nümunə olaraq prosesin önündə gedirlər. Ölkə başçısı və Briinci vitse-prezident cəmiyyətə nümunə olaraq bir illik əməkhaqqılarını Koronavirusla Mübarizə Dəstək Fonduna keçiriblər. Məhz ölkə başçısı və Birinci vitse-prezidentin göstərdiyi şəxsi nümunəsi nəticəsində ölkəmizdə bu sahədə ciddi irəliləyiş əldə olunub. Artıq bir sıra ölkələrə Azərbaycan təcrübəsindən faydalanırlar”,- deyə deputat bildirib.
A.Hüseynov əlavə edib ki, ölkə başçısının tapşırığı ilə Nazirlər Kabineti yanında koronavirusla bağlı yaradılan Operativ Mərkəzin martın 24-də ölkə ərazisində tətbiq edilən bir aylıq karantin rejimi vaxtında atılan addımdır.
Deputat hesab edir ki, dünyanı cənginə alan koronavirus pandemiyasına qarşı mübarizədə təkcə administariv metodlarla mübarizə yetərli deyil: “Bu məsələdə cəmiyyət həmrəylik və birlik nümayiş etdirməlidir. Vətəndaş olaraq üzərimizə düşən məsuliyyəti dərk edərək, tətbiq edilən qaydalara ciddi riayət etməklə belə bir epidemiyanın öhdəsindən gələ bilərik. Hesab edirəm ki, bu məsələdə vətəndaş nəzarəti nə qədər güclü olarsa, insanlar bir-birini bu qaydlara riayət etməyi təşviq edərlərsə, pandemiyaya qarşı daha effektiv mübarizə aparmaq olar. O baxımdan hesab edirəm ki, xalqımızın adət-ənənələri, milli-mənəvi, dini dəyərləri ilə bu virusla mübarizədən qalib və az itki ilə çıxa bilərik.
O baxımdan da dünyaya örnək olan milli-mənəvi, dini dəyərlərimiz vasitəsi ilə bir cəmiyyət olaraq bütün gücümümüzü səfərbər etməklə həm birliyimizi, həm sağlamlığımızı, həm təhlükəsizliyimizi, həm də gələcək inkişafımızı təmin etmiş olacağıq. Eyni zamanda bu dəyərlərimizdən irəli gələrək karantin rejimi dövründə yaşlılarımıza olan diqqəti birə on artırmaqla, onlara daha həssas yanaşmalı və onların karantin qaydalarına riayət etməsi üçün əlimizdən gələni etməklə bir daha dünyaya böyük bir xalq olduğumuzu sübut etmiş olacağıq. Birliyimiz, həmrəyliyimiz təkcə sağlamlığımızın, təhlükəsizliyimin təmin edilməsi deyil, eyni zamanda gələcək inkişafımızdır. Odur ki, gəlin sabahımız naminə bir olaq! Azərbaycan Prezidenti tərəfindən sağlamlığımızın, təhlükəsizliyimizin təmin edilməsi məqsədi ilə atılan bütün qərarlara ciddi riayət edək”.
Mürtəza
Ölkə.Az
