Dünya Azərbaycanlıları Assambleyasından Gürcüstanda yaşayan soydaşlarımıza ÇAĞIRIŞ

DAA-dan “Ölkə.Az”-a daxil olan müraciətdə Rəşad Quliyev soydaşlarımızı Gürcüstanın fəal siyasətçilərindən biri olan soydaşımız Əhməd İmamquliyevin namizədliyini dəstəkləməyə və seçkilərdə ona səs verməyə çağırıb. 

Müraciəti olduğu kimi təqdim edirik:

“Hörmətli xanımlar və cənablar,

Seçki hər ölkənin taleyində rol oynayacaq ciddi və tarixi marafondur. Bu hadisə ölkənin, xalqın, millətin taleyini həll edir və gələcəyə baxışını formalaşdırır. Bu hadisələrdən biri də bu yaxında Gürcüstanda baş verəcəkdir. Kiməsə elə gəlməsin ki, biz qonşu və dost Gürcüstanın daxili işlərinə qarışır, daxili siyasi çəkişmələrdə tərəf tuturuq. DAA ilk yarandığı gündən dünyanın müxtəlif ölkələrində yaşayan həmyerlilərimizin məsələlərinə önəm verəcəyini bəyan etmişdi. Məhz bu baxımdan Gürcüstan azərbaycanlılarının məsələsi, Borçalılı qardaş və bacılarımızın problemlərinin bizim üçün 3-cü, 4-cü məsələ olmadığını xüsusi həssaslıqla vurğulamaq istəyirəm. Qeyd etdiyim kimi, Gürcüstanda Marneuli bölgəsi xüsusi, vacib və bizim üçün həssas bölgədir. Bu bölgədə yüz minlərlə həmyerlimiz yaşayır və işləyir. Aldığım məlumatlara görə təəssüff ki, illərdir bu bölgəyə rəhbərlik edənlər həmyerlilərimizin problemini köklü şəkildə həll edə bilməyiblər. Bu məslənin bir çox obyektiv və subyektiv səbəbləri var. Ancaq bir məsələni təəssüflə qeyd etməliyəm ki, illərdir bu bölgəyə mer olaraq azərbaycanlı xidmət göstərməyib. Burada niyələr çoxdur. Ancaq bu məsələnin üstünə çox getmədən sizlərə müraciət etmək istəyirəm. Gürcüstanın fəal siyasətçilərindən biri, gənc həmyerlimiz, intellektual səviyyəsi yüksək olan namizədə dəstək olmağa, Əhməd İmamquliyevə səs verməyə çağırıram. Unutmayın ki, Əhməd bəy sizin aranızdan çıxan, o bölgənin problemlərinə dərindən bələd olan bir siyasətçidir və əminik ki, o seçilərsə bölgənin illərdən bu yana yığılıb qalan problemləri öz həllini tapacaqdır! İnanıram ki, Gürcüstanda fəaliyyət göstərən təşkilatlarımız da bu məsələdə dəyərli həmyerlimizin yanında olacaq, ona seçki marafonunda ciddi və əməli dəstək olacaqlar".

Vasif Həsənli
Ölkə.Az