Anar Nəcəfli: "Çalışırdım ki, heç bir xanımı qırmayım"

Onunla söhbətimizi fərqli yerdə etmək istədiyimdən müsahibimə bir neçə məkan təklif etmişdim, ancaq Anar bəyin vaxtının azlığını nəzərə alaraq sonda Dənizkənarı Milli Parkda görüşməyə raşılaşdıq. Havanın mülayim olmasını görüncə, qərar verdik ki, elə söhbətimizi yürüyüşlə birlikdə edək.

Bəli, Ölkə.Az-ın bu həftəki qonağı tanınmış teleaparıcı Anar Nəcəflidir.

Anar Nəcəfli: 1980-ci ilin noyabr ayının 3-ü Ucar rayonunda anadan olub. Bakı Dövlət Universitetinin jurnalistika fakültəsində təhsil alıb. ANS-də yayımlanan "İç xəbər" verilişində, ardınca "Bürc FM" radiosu, daha sonra isə "Xəzər" telekanalında fəaliyyət göstərib. Hazırda yeni layihələr üzərində işləyir. Sevdiklərinə gəlincə, təbiət qoynunda, istirahət etməyi sevir. Qara geyinməyi xoşlamır. Daha çox həzin musiqiləri dinləyir. Yemək kaprizləri yoxdur.

Bir az hal-əhval tutduqdan sonra müsahibəyə başlayırıq.

-Deyəsən, yenidən efirə qayıdırsınız...

-Bəli, artıq hazırlıqlar gedir.

Mən ən başına qayıtmaq istəyirəm...

-Sizin efirdən getməyiniz bir qədər şayiələrin yayılmasına səbəb olmuşdu. Suriya məsələləri bir yana, hətta bunu efir zamanı “Sovetski” məsələsinə etdiyiniz şərhlə əlaqələndirənlər də oldu. Şayiə nə qədər real idi?

-Şayiələr həmişə var. Mənim efirdən ayrılmağıma səbəb kimi Suriyanı göstərəndə bu mənə qəribə gəlmişdi. Suriya hara, mən hara (gülür). Eləcə də “Sovetski”. Sadəcə mən həmin ərəfədə gördüm ki, daha zamanıdır, buna görə də ərizəmi yazıb, işdən ayrıldım. Bir müddət xəbərlərdən uzaq qalmaq istəyirdim. Çünki artıq yorulmuşdum. Başqa heç bir səbəb yox idi.

-“Xəzər TV”-nin keçmiş rəhbərliyi (İbrahim Ünlübostan) dəyişəndə sizin sevincli statuslarınıza rast gəldik. Deyəsən vəziyyətdən razı idiniz.

-Yox... Mən həmin gün həqiqətən başqa şad xəbər almışdım. Buna görə də "bir şad xəbər var" girişi ilə status yazdım. Amma həqiqətən bunun onunla heç bir əlaqəsi yox idi. Ola bilsin ətrafdan yanlış anlayıblar. Ya da ki, elə görünüb (gülür).

-Bəzi həmkarlarınız televiziyadan ayrıldıqdan sonra özlərini saytda yoxladılar. Bəzi saytlarda baş redaktorluğu öz üzərinə götürdülər. Bəs siz, hər hansı bir saytda baş redaktor olmağı heç düşündünüzmü?

-Bəli, bir ara bu barədə düşündüm. İstədim yeni sayt yaradım, sırf özümə məxsus olsun. Amma sonradan vaxt məhdudiyyəti olduğundan bunları yarımçıq buraxmalı oldum. Amma ola bilsin ki, gələcəkdə sayt barədə layihələrimi həyata keçirdim. Yəqin ki, kiminləsə əməkdaşlıq edəcəyəm. Sadəcə baş redaktoru mən olacağam.

-Aparıcı olduğunuz müddətdə “facebook” sosial şəbəkəsində nadir halda paylaşımlarınızı görürdük. Ancaq indi paylaşımlarınızın sayı çoxalıb. Bu nə ilə əlaqədardır?

-Çünki o zaman vaxtım olmurdu. Həm də ki, özümlə əlaqəli paylaşımların çox olmasından heç  də xoşlanmıram. Son zamanlar paylaşımlarımın artmasına səbəb o oldu ki, düşündüm fəaliyyətimlə əlaqəli fotoları paylaşmağım lazımdır. Çünki artıq bəzi insanlar “Anar Nəcəfli haradadır, nə işlə məşğuldur?” - soruşurdular. Mən də deməyə çalışıram ki, boş dayanmamışam. Qısacası hazırlıqlar gedir.

 

-Hazırlıqlar gedir demişkən, yeni verilişin çəkilişləri nə vaxt bitəcək?

-Çəkilişlər çoxdan başlayıb, amma nə vaxt bitməsi və nə zaman efirdə yayımlanması haqqında dəqiq məlumat yoxdur. Hələki çalışırıq, yəqin yaxın zamanda tamaşaçıların ixtiyarında olacaq. Sonuncu dəfə çəkilişlə əlaqədar Rusiyada olduq. Demək olar ki, hər şey öz qaydasında idi.

-Anar bəy, saytlarda sizin efirə qayıtmağınız barədə mart ayından başlayaraq davamlı xəbərlər gedir, ancaq hələki heç nə olmadığına görə, bəzi insanlar bunu sırf gündəmdə qalmaq üçün etdiyinizi deyir.

-Bilirsiniz, həmişə kimlərsə nəsə deyir. Buna görə təəccüblənmirəm. Elə mən də bunu fərq etdiyim üçün son zamanlar fəaliyyətimlə bağlı fotolar paylaşmağa başladım. Ümumilikdə isə paylaşdıqlarıma hər zaman diqqət edirəm. Çünki bir də görürsən hərlədib-fırladıb nəsə çıxardırlar (gülür). Niyə belə edirlər, anlamıram. Məncə, üzdə olan insanlar gərək paylaşdıqlarına diqqət etsinlər.

-Paylaşdıqlarınızı ilk “like” edən hər zaman özünüz olursunuz, nəyə görə? (zarafatyana)

...(Gülür) Nə bilim... Mənim xoşum gəlir ilk “like” edən özüm olanda. Çünki orada belə bir şey var ki, "ilk like edən sən ol" buna görə də, ilk "like" edən özüm olum deyə elə edirəm.

-Necə istirahət etməyi xoşlayırsınız?

-Sakit məkan, heç kimin olmadığı bir yer, təbiətlə əlaqədə olduğum yerlərdə. Bu cür yerlərdə həqiqətən istirahət edirəm, insan bütünlüklə yenilənir.

-Gəlin, bir az evliliyinizdən danışaq. Xanımınızla necə tanış oldunuz?

-Elə universitetdə. Əvvəl başqa universitetdə oxuyurdu, sonra bizim universitetə keçid aldı. Mən ondan iki kurs yuxarı oxuyurdum. Eyni fakültənin tələbələri idik. Sonra onunla rastlaşdım və xoşum gəldi. Mən 2002-ci ildə universiteti bitirdim və hərbi xidmətə yollandım. Qayıtdıqdan sonra 2005-ci il iyunun 26-ında toyumuz oldu.

-Adətən bəylər toy tarixlərini unudur, halaldır sizə (zarafatyana)...

-Bizim toyumuz Silahlı Qüvvələr Günü ilə üst-üstə düşdüyündən yadımda qalıb (gülürük).

-Aparıcı olduğunuz müddətdə yəqin ki, sizinlə tanış olmaq istəyən xanımlarla az rastlaşmamısınız. Nə edirdiniz elə olanda?

-Hə, çox olub. Bəzən hər hansısa vasitələrlə nömrəmi tapıb, zəng edirdilər. “Facebook”da da yazanlar olurdu, amma mən çalışırdım ki, heç bir xanımı qırmayım. Qırmayım deyəndə birdən çoxları yanlış anlayar (gülür). Yəni ki, onlara sərt reaksiya vermirdim, çalışırdım izah edim ki, mən evliyəm. Elə xanımlar olurdu ki, bunu anlayırdı, elələri də olurdu ki, qır-saqqız kim yapışırdılar (gülür).

-“Facebook” şifrəniz xanımınızda var?

-Bəli, var. Hətta arada girib nəzərdən də keçirir, amma təbii ki, buna elə də çox vaxtı olmur. Çünki uşaqlarla, onların tərbiyəsi, təhsili ilə məşğul olur. Həmçinin bizim aramızda bir-birimizə inam var.

P.S yəqin ki, bundan sonra Anar Nəcəfliyə yazan xanımlar diqqətli olacaqlar.

-Övladlarınızı gələcəkdə jurnalist görmək istəyərdiniz?

-Yox, istəməzdim. Çox istəyərdim onlar özlərini başqa sahədə yoxlasınlar, misal üçün hüquq sahəsində. Bilirsiniz, bizdə jurnalistika inkişaf etməyib. Çatışmazlıqlar var. Xəbərdən məlumatsız, görünüşü efirə uyğun olmayan insanları teleaparıcı edirlər. Çatışmazlıqların aradan qalxması üçün isə illər lazımdır. Buna görə də, istəməzdim övladlarım jurnalist olsunlar.

-Efirə uyğun olmayan insanlar demişkən, uyğunsuz kosmetika edib efirə çıxan teleaparıcılar, xüsusən də xəbər aparıcıları son zamanlar daha çox tamaşaçıların qıcığına səbəb olmağa başlayıb. Aparıcının gözqamaşdıran dodaq boyasından istifadə etməsi nə qədər doğrudur?

-Aparıcı özü bəzənməməlidir, bunu qrim ustaları etməlidir. Bizdə bunu ya aparıcı özü edir, ya da gözəllik salonlarından gətirilən ustalar. Nəticədə isə aparıcı toy kosmetikası ilə efirə çıxır. Amma biz Rusiya, Türkiyə təcrübəsinə baxsaq, görərik ki, orada efir qrimi ilə məşğul olan xüsusi mütəxəssislər hazırlanır. Ona görə də, onların teleaparıcılarının üzündə heç bir qüsura rast gəlmək mümkün deyil.

-Aparıcılar adətən maaşlarının az olduğundan şikayətlənir. Doğrudanmı azdır?

-Bəli, aparıcı gərək efir vaxtı başqa şeylər haqqında düşünməsin. Bunun üçünsə gərək aparıcı normal maaş alsın. Əgər aparıcı efir zamanı axşam evə övladlarına nə alıb, aparacağı barədə düşünürsə, o heç vaxt uğurlu aparıcı ola bilməz. Mən bu illər ərzində maddi heç nə qazanmadım, heç bir qazancım olmadı. Tək qazandığım simam, adım Anar Nəcəfli oldu.

-İctimaiyyət içinə çıxdıqda tanınmış sima kimi hansı çətinlikləri yaşayırsınız?

-Çətinliklər deməzdim, amma hamının mənə baxdığını görəndə özümü narahat hiss edirəm. Bir də görürsən ki, qarşımdan keçən yanımdakının qulağına nəsə pıçıldadı. Elə buna görə də, çalışıram şəhərin mərkəzində çox olmayım. Sırf bu səbəbdən də sizin təklif etdiyiniz yerləri seçmədim.

-Bəlkə oturaq çay içək, deyəsən üşüdünüz...

-Yox, mənim duruşum belədir.

Müsahibimə çay içməkdə israr edirəm...

-Çay içsək, gedəcəyim yerə gec qalacam. Bir azdan iş görüşməm olacaq.

-Hansı iş görüşməsi? Sirr deyilsə, bizimlə bölüşərdiniz.

-Özümü yeni bir sahədə yoxlamaq istəyirəm. Bir filmdə rol almaq üçün təklif gəlib. Dramaturq Ramiz Abdullayevin "Biznesmen" əsəri əsasında, baş rolda oynadığım eyniadlı filmin çəkilişlərinə başlayırıq. Bu həm mənim üçün, həm də Nail Naiboğlu üçün debüt olacaq. Mənim aktyor kimi, Nail Naiboğlunun isə kino rejissor kimi ilk işimizdir. İstəyirəm özümü bu sahədə də yoxlayım.

-Aktyorluğunuz uğurlu alınsa, xəbər aləmindən gedəcəksiniz?

-Xeyr, o mənim peşəmdir. Onu tərk etməyi düşünmürəm, amma aktyorluq uğurlu alınsa, burada da özümü yetişdirəcəm. Necə alınacağını isə filmin çəkilişlərindən sonra biləcəyik.

-Sonda jurnalistlərə nə tövsiyyə edərdiniz?

-Özlərinə başqa iş tapsınlar (gülürük).

Saat 13-14 göstərir. Danışdığımız kimi onu 13-15-də sərbəst buraxmalı idim. Və çalışıram ki, heç bir cığallığa yol vermədən onunla söhbətimizi yekunlaşdırım. Beləcə, onunla sağollaşır, fotoqrafımız ilə şəhərdə gəzməyə gedirik.

Söhbətləşdi: Fatimə İbrahimova

Fotolar: Çinarə Vahabzadə

 

Ölkə.Az