Keçmiş MTN generalının məhkəməsi davam edir

Bakı Hərbi Məhkəməsində ləğv edilmiş Milli Təhlükəsizlik Nazirliyinin Antiterror Mərkəzinin rəisi, general-mayor Elçin Quliyev və Antiterror Mərkəzinin əməkdaşı, polkovnik Azər Mehdiyevin cinayət işi üzrə məhkəmə prosesi davam etdirilib.

"Ölkə.Az"ın APA-ya istinadən məlumatına görə, hakim Elbəyi Allahverdiyevin sədrliyi ilə keçirilən prosesdə şahidlər ifadə verib.

Zərərçəkmiş Mətləb Mustafayevin epizodu üzrə şahid qismində ifadə verən Elşən Xəlilov deyib ki, hal şahidi olub və M. Mustafayevin evindən silah aşkar olunub.

Binəqədi Rayon Məhkəməsinin icra məmuru Şahmalı Əhmədov iş adamı Yalçın Abdullayev epizodu üzrə ifadə verib. O deyib ki, Y. Abdullayevə məxsus avtomobili dayanacağa yerləşdirib və sonra dayanacaqdan avtomobili kimin götürdüyünü bilməyib.

Digər şahid sabiq MTN əməkdaşı Mübariz Hüseynov isə bildirib ki, M. Mustafayevin dindirilməsində iştirak edib. Şahid qeyd edib ki, M. Musatafayevin evindən çıxan silahın ona məxsus olduğunu sübut ediblər.

Təqsirləndirilən Elçin Quliyev də şahidin dediklərini təsdiq edib. O, M. Mustafayevin səbəbsiz yerə həbs olunmadığını vurğulayıb.

Proses oktyabrın 2-də davam etdiriləcək.