Qayınata məhkəmədə gəlinin günahsız olduğunu bildirdi
"Ölkə.Az"ın APA-ya istinadən xəbərinə görə, hakim Cavid Hüseynovun sədrliyi ilə keçirilən prosesdə təqsirləndirilən şəxsin vəkili müdafiə çıxışı etməyə başlayıb. Bu zaman zərərçəkmiş şəxsin hüquqi nümayəndəsi, ölən Şəmsi Babayevin atası onun çıxışına etiraz edib.
Bildirib ki, oğlunu G. Mirzəyeva öldürməyib. O, oğlunun müəmmalı şəkildə öldürüldüyünü deyib və məhkəmə zalını tərk edib.
Proses oktyabrın 20-də davam edəcək.
Ötən iclas dövlət ittihamçısı çıxış edib. O, G. Mirzəyevanın 9 il müddətinə azadlıqdan məhrum edilməsini istəyib.
Qeyd edək ki, ötən il noyabrın 5-də Maştağa qəsəbəsindəki fərdi yaşayış evində 26 yaşlı Günər Mirzəyeva həyat yoldaşı, 32 yaşlı Şəmsi Babayevi bıçaqlayıb. Ş. Babayev aldığı xəsarətlərdən xəstəxanada ölüb.
Faktla bağlı Cinayət Məcəlləsinin 126.3-cü (qəsdən sağlamlığa ağır xəsarət yetirmə ölümə səbəb olduqda) maddəsi ilə iş başlanılıb.