İcra başçısı: Respublikada ilk "Zebra" təsərrüfatı bizim rayondadır

Tərtər rayonunna təşkil edilən "Sərsəng Yürüşü"ndə iştirak edən Ölkə.az-ın əməkdaşı rayon icra hakimiyyətinin başçısı Müstəqim Məmmədovdan ayaqüstü müsahibə alıb.

Həmin müsahibəni oxucularımızın diqqətinə çatdırırıq:

- Müstəqim bəy, Tərtərdə hal-hazırda su problemi hansı səviyyədədir?

- Tərtər rayonunun 30 min hektar ərazisinin suvarılması Sərsəng su anbarından gələn su ilə suvarılırdı. Tərtər rayonunda kənt təsərüfatı məhsulları, əsasən də taxıl əkilir. Ancaq hal-hazırda o əraziləri suvarmaq müşkül məsələyə çevrilib. Öz hesabımıza artezian quyuları vurdurmuşuq ki, əhali əkinçiliklə davamlı məşğul olsun, ancaq artezian suyu Sərsəngdən gələn suyun keyfiyyətində deyil. Əvvəllər hektara 60 sentiner taxıl götürmək olurdusa, indi bu rəqəm çox aşağı düşüb. Hazırda əkinçi 1 hektara 10-15 sentner taxıl götürür. Bu da əhalinin maddi durumunu ildən ilə pisləşdirir.

- Hər bir rayonda olduğu kimi Tərtər rayonundan da gənclər işləmək üçün Bakıya üz tutur. Gəncləri rayonda saxlamaq üçün hansı işlər görürsüz?

- 2012-ci ildə Tərtər rayonunda Gənclər Mərkəzi fəaliyyət göstərməyə başlayıb. Keçən ildən başlayaraq Tərtər rayonunda Olimpiya kompleksinin tikintisi başlayıb. Ha-hazırda şəhərin mərkəzində şahmat məktəbinin tikintisinə də başlamışıq. Gənclərin rayonda asudə vaxtını səmərəli təşkil etməsi üçün internet klublar, dil kursları, komputer kursları da fəaliyyət göstərir.

- Tərtər təmas xəttində olan bir rayondur. Bəzən xəbərlər yayırlar ki, camaat yaşaya bilmir, buradan qaçmağa çalışır...

- Bunlar hamısı şaiyədir. Bu bizi istəməyənlərin yaydığı əsassız şaiyələrdir. Əhalimizin hamısı 100% yerindədir. Bu gün də əkirlər, biçirlər, heç bir qorxu da yoxdur.

- Əhalinin işlə təmin olunması üçün hansı işlər görülür?

- Tərtər kənt təsərrüfatı rayonudur...

- Ancaq kənt təsərüfatı mövsümi bir işdir. Bəs mövsüm bitəndə..?

- Gənc fermerlər var ki, Almaniyadan 63 baş iri buynuzlu heyvan gətirib. Respubilkada ilk Zebr təsərüfatı bizim rayondadır. Günəbaxan tumu istehsal edən zavodların çoxusu Tərtər rayonundadır. "Rekord", "Patron", "Oskar" günəbaxan tumları Tərtər rayonunda istehsal edilir. Bunlar hamısı həm də iş yerləri deməkdir. Pambıq zavodumuz var, əhali həyətlərində bağlar salıb məhsulunu satıb dolanışıqlarını təmir edirlər.

- Saydıqlarınızı əhalinin hamısına aid etmək olmaz axı. Yoxsulluq həddində yaşayan insanların sayı daha çoxdur...

Müstəqim Məmmədov gülümsəyir və bu sözümü şərh etmədən iti addımlarla məndən uzaqlaşır...