Beynəlxalq Yoqa Günü elan edilib

BMT Baş Assambleyası iyunun 21-ni gününü Beynəlxalq Yoqa Günü elan edib. 

Müvafiq qətnamə Hindistan tərəfindən təqdim olunub və yekdilliklə bəyənilib.

Pan Gi Mun qərarı şərh edərək deyib: “21 iyun gününü Beynəlxalq Yoqa Günü elan etməklə Baş Assambleya müasir dünyamızda bu qədim təcrübənin sağlamlıq və əmin-amanlıq üçün hərtərəfli faydasına diqqəti cəlb edib”.

BMT-nin rəhbəri qədim hindu fiziki və mənəvi təcrübəsinin nəinki sağlamlıq baxımından əhəmiyyətini, həm də onun cəmiyyəti sıx birləşdirməyə və qarşılıqlı hörmət tərbiyə etməyə qadir olduğunu bildirib. Baş katib sözünə əlavə edərək deyib: “Yoqa inkişafa və barışığa töhfə verə biləcək idmandır. Yoqa hətta ekstremal vəziyyətlərdə insanların stresi aradan qaldırmasına kömək etməyə qadirdir”. Qətnamədə qeyd edilib ki, yoqa “sağlamlığa və əmin-amanlığa kompleks yanaşmaya” imkan verir. Baş Məclis BMT-nin bütün dövlətlərinə milli ənənələrə uyğun olaraq yoqanın faydası barədə öz sakinlərinin biliklərini artırmaq üçün yeni əlamətdar günü qeyd etməyi təklif edib.

Qətnamə rekord sayda tərəfdaş toplayıb: Baş Assambleyada təmsil olunan 175 dövlətin hamısı qətnamənin “lehinə” səs verib.

Yoqa ortodoksal induizm məktəblərindən biridir. Bütün dünyada bu anlayış daha geniş mənada şərh edilir: o, induizmin və buddizmin müxtəlif istiqamətlərinin təklif etdiyi mənəvi, psixi və fiziki təcrübələrin məcmusunu birləşdirir. Yoqa ilə məşğul olmaq dedikdə xüsusi hərəkətlərin köməyi ilə öz bədənini, psixikanı və fizioloji funksiyalarını idarə etmək səyi başa düşülür. (AzərTAc)

Ölkə.Az