Qızıl alverçilərini aldadan qadın bəraət istəyir

Qızıl alverçilərinə qarşı dələduzluq etməkdə təqsirləndirilən Yasəmən Nəcəfova 1-ci instansiya məhkəməsinin qərarından apellyasiya şikayəti verib.

“Ölkə.Az”ın məlumatına görə, mart ayının 28-də hakim Rizvan Səfərovun sədrliyi ilə qadının apellyasiya şikayətinə baxılacaq.

Qeyd edək ki, Yasəmən Nəcəfovaya ötən ilin oktyabr ayında Bakı Ağır Cinayətlər Məhkəməsində hökm oxunub. Hökmə əsasən, Y. Nəcəfova barəsində şərti cəza seçilib və o, məhkəmə iclas zalından azadlığa buraxılıb.

Xatırladaq ki, Bakı şəhər sakini 1984-cü il təvəllüdlü Etibar Akif oğlu Musayev ərizə ilə 17-ci Polis Bölməsinə müraciət edərək bildirib ki, 2017-ci ilin yanvar-avqust aylarında 1973-cü il təvəllüdlü Yasəmən Sabir qızı Nəcəfova onun etibarından sui-istifadə edərək 40 min manat alıb və qaytarmayıb.

Həmçinin Bakı şəhər sakinləri Naibə Həsənova və Gülnarə Cəlalova polisə ərizə ilə müraciət ediblər. N.Həsənova Yasəmən Nəcəfovanın ondan 15 min manat, G.Cəlalova isə Yasəmən Nəcəfovanın ondan 53 min manat dəyərində qızıl-zinət əşyaları aldığını və 3 il ərzində pulunu ödəmədiyini bildiriblər.

O, Cinayət Məcəlləsinin 178.3.2 (dələduzluq, külli miqdarda törədildikdə) maddəsi ilə ittiham edilib.