Dələduz vəkilin cinayət işi ləğv olundu

Sumqayıt şəhərində özünü vəkil kimi təqdim edən Baxışova Nüşabə Şahbaz qızının cinayət işi ləğv olunub.

“Ölkə.Az”ın məlumatına görə, bu gün Ali Məhkəmənin hakimi Əziz Seyidov Nüşabə Baxışova barədə qərar çıxardıb.

Qeyd edək ki, N.Baxışova Sumqayıtda 16 nəfər şəxsə qarşı ümumilikdə 180 min manat dəyərində dələduzluq edib. Belə ki, o, özünü vəkil kimi təqdim edib və həmin şəxslərin işini məhkəmələrdə həll edilməsi barədə vədlər verib. Lakin N.Baxışova vədinə əməl etməyib.

Hətta Nüşabə Baxışovanın Sumqayıtda 10-cu mikrorayon ərazisində ofisi olub. Əksər vətəndaşlar da vəkillə həmin ofisdə görüşüb. Həbs edilən N.Baxışova bir müddət əvvəl “Dünya TV” və “İnter Az” kanallarında yayımlanan proqramlarda vəkil kimi iştirak edib və həmin proqramlarda vətəndaşlara hüquqi problemlərlə bağlı məsləhətlər verib. Belə ki, vətəndaşlar müxtəlif məsələlərlə bağlı Nüşabə Baxışovaya müraciət ediblər. Kimisi pensiyasını düzəltmək, kimisi ərindən boşanmaq, kimisi problemli mülkünü geri almaq üçün N.Baxışova ilə müqavilə bağlayıb. Müştəriləri ilə müqavilə bağlayan vəkil onlara vəd etdiyi xidmətləri göstərməkdən imtina edib.

Həmçinin Nüşabə Baxışova 2008-ci ildə Cinayət Məcəlləsinin 178.3.2-ci (küllü miqdarda dələduzluq etmə) maddəsi ilə ittiham olunub. Ağır Cinayətlərə Dair İşlər üzrə Məhkəmədə keçirilən prosesdə N.Baxışova 8 il müddətinə azadlıqdan məhrum edilib. Daha sonra isə Bakı Apellyasiya Məhkəməsi qərar çıxararaq onu 5 il müddətinə şərti azadlıqdan məhrum edib.