Qanun layihəsi millət vəkilləri arasında fikir ayrılığı yaratdı

“Ölkə.Az” xəbər verir ki, qanun layihəsi barədə məlumat verən millət vəkili ƏIi Hüseynli bildirib ki, Cümhuiriyyətin yüz illik yubileyi ərəfəsində belə medalın təsis edilməsi tarixi hadisədir.

“Medal Xalq Cumhuriyyəti liderlərinin varisləri və Azərbaycan Xalq Cümhuriyyəti irsinin tədqiqində və təbliğində, dövlət müstəqilliyinin qorunub saxlanmasında və inkişafında, ölkənin ictima-siyasi həyatında xüsusi xidmətlərinə görə Azərbaycan Respublikası vətəndaşları, əcnəbilər və vətəndaşlığı olmayan şəxslər təltif ediləcək”.

Millət vəkili Fazil Mustafa bildirib ki,  medalla təltif edilən edən şəxslər siyahısına təkcə Cümhuriyyət liderlərinin varisləri deyil, Azərbaycan Xalq  Cümhuriyyətinin qurulmasında fədakarlıq etmiş şəxslərin varisləri də bu siyahıya əlavə edilməlidir.

“Təkcə qurucuların varisləri ilə kifayətlənməməliyik.  Bundan başqa istiqlalçı deputatların da adı siyahıya əlavə edilməlidir. Biz onların pensiya təminatını da həll etmədik,  heç olmazsa Cümhuriyyətin yüz illik yubileyi ilə bağlı Azərbaycan müstəqilliyinə səs verənlərə də bu medal verilməsi məsələsinə baxa bilərik”.

Əflatun Amaşov bildirib ki, varisliyimizi əməli nümunələrdə də göstərməliyik və yubiley medalı Cümhuriyyət irsinə hörmətin bariz nümunəsidir:
“Hələ də, Cümhuriyyətlə bağlı mübahisələr var. Lakin bu məsələ siyasi konyukturadan uzaq olmalı, elmi müstəvidə müzakirə edilməlidir”.
Millət vəkili Siyavuş Novruzov istiqlalçı deputatlar məsələsinin birdəfəlik həll edilməsini təklif edib:

“O zaman 350 nəfər parlament  üzvü olub və onlar müstəqilliyə səs verib.Ayaz Mütəlliboyun ittifaq müqaviləsinə səs verənlər istiqlalçı deputatlar deyillər. Bu məsələyə parlamentdə aydınlıq gətirməliyik ki, istiqlalçı deputatların hüquqları məsələsi birdəfəlik həll olsun. Azərbaycanın müstəqilliyinin elan edilməsində 350 deputatın hamısı səs verib. Burada köhnə deputatlar var, onların da münasibət bildirməsini xahiş edirəm. Xahiş edirəm Oqtay müəllim Milli Məclisdə o siyahını çıxarıb assınlar. Hamı da bilsin”.

Vasif Həsənli
Ölkə.Az