Xaçmazlı iş adamını qətlə yetirən dəstə üzvləri hakim qarşısında

Xaçmazda iş adamını qətlə yetirməkdə təqsirləndirilən Vüsal Rüstəmov, Firudin Axverdiyev və Qalib Kərimovun cinayət işi üzrə məhkəmə prosesi başlayıb.

“Ölkə.Az”ın xəbərinə görə, prosesə Bakı Ağır Cinayətlər Məhkəməsində hakim Azər Paşayev sədrlik edir.

Məhkəmə baxışı mayın 4-də təyin edilib.

Qeyd edək ki, qətl hadisəsi 2016-cı il iyunun 16-da Xaçmazda baş verib.

Şəhər sakini İlqar Məmmədovun meyiti evinin həyətində tapılıb. Onun evinin həyətində tapılan meyitinin üzərində zorakılıq əlamətləri olub. Hadisə Mirzə Fətəli Axundov küçəsində baş verib. Uşaqları tələbə olduğundan ailəsi Bakıda yaşayan mərhum ərzaq mallarının topdansatışı ilə məşğul olub. Mərhum bıçaqla qətlə yetirilib. Polis və prokurorluq orqanları əməkdaşlarının həyata keçirdikləri əməliyyat-axtarış tədbirləri nəticəsində İ.Məmmədovu qarət məqsədilə qətlə yetirməkdə şübhəli bilinən Xaçmazın Ağyazı Buduq kənd sakini 25 yaşlı Qalib Nəcməddin oğlu Kərimov və Firudin Axverdiyev həbs edilib. Dəstənin başçısı kimi bilinən V.Rüstəmov isə ölkədən qaçıb. 1984-cü il təvəllüdlü Rüstəmov Vüsal Arif oğlunun Rusiyaya, oradan da Qazaxıstana qaçması müəyyən edilib.

Xaçmaz Rayon Polis Şöbəsi əməkdaşlarının həyata keçirdiyi tədbirlərlə V.Rüstəmov Qazaxıstanda tutularaq Azərbaycana gətirilib və istintaqa təhvil verilib.

Dəstə üzvlərinin müxtəlif dövrlərdə quldurluq, oğurluq və digər cinayətləri törətdikləri ortaya çıxıb.

Onlara Cinayət Məcəlləsinin bir neçə maddəsi ilə ittiham verilib.

Onu da qeyd edək ki, qətlə yetirilən 53 yaşlı İ.Məmmədov Xaçmazda ticarət mallarının topdan satışı ilə məşğul olan biznesmen kimi tanınıb.

Qətl Baş Prokurorluğun Ağır Cinayətlərə Dair İşlər Üzrə İstintaq İdarəsinin əməkdaşları tərəfindən araşdırılıb və cinayət məcəlləsinin 120.2.11-ci maddəsi ilə araşdırılıb.