Bakı yollarında təhlükəsizlik tədbirləri ilə bağlı Nazirlər Kabinetinə

Ötən il yol hərəkəti işitrakçılarının təhlükəsizliyinin təmin edilməsinə ehtiyac duyulan küçə və prospektlərdə yol nişanlarının, işıqfor obyektlərinin quraşdırılması və yolların xətlənməsi ilə bağlı Bakı şəhər Dövlət Yol Polisi İdarəsi tərəfindən Nazirlər Kabineti yanında Yol Hərəkəti Təhlükəsizliyi Komissiyasına 68 təklif verilib.

Bu barədə Bakı şəhər Baş Polis İdarəsindən məlumat verilib.

Məlumata görə, 2014-cü il ərzində paytaxtın küçə və prospektləri üzrə 18 yeni işıqfor obyekti, 1264 yeni yol nişanı quraşdırılıb, 4294 ədəd yol nişanı isə dəyişdirilib.

Bakının inzibati ərazisi üzrə yollarda quraşdırılmış texniki nizamlama vasitələrinə baxış keçirilən zaman 533 yol nişanının sıradan çıxaraq düşməsi, 29 nişanın standarta uyğun quraşdırılmaması, eləcə də piyada zolaqlarının silinməsi barədə aidiyyatı üzrə məlumat verilib.

Məlumatda qeyd olunub ki, hazırda paytaxtın inzibati ərazisinə düşən küçə və prospektlərin ümumi uzunluğu 2229 km-dir. Bu küçə və prospektlərdə 654 yolayrıcı, 67 yeraltı və yerüstü piyada keçidi, 288 işıqfor obyekti, 62 dəmiryol keçidi, 68 körpü və tunel var.(Trend)

Ölkə.Az