Rəis Rəsulzadə: \"O, elə bir simadır ki, onu cümlələrlə izah etmək çətindir\"

Bu gün Azərbaycan Xalq Cümhuriyyətinin (1918-1920) banilərindən və Azərbaycan siyasi mühacirətinin liderlərindən biri olan Məhəmməd Əmin Rəsulzadənin doğum günüdür.

Dahi şəxsiyyət 31 yanvar 1884-cü ildə anadan olub. O, Azərbaycan tarixinin ən görkəmli və böyük şəxsiyyətlərindən olub. Onun "Bir kərə yüksələn bayraq, bir daha enməz!" ifadəsi XX əsrdə Azərbaycanda müstəqillik hərəkatının şüarı olmuşdur. Bu söz XXI əsrdə də öz sehrini qoruyub, saxlayıb.

Ölkə.az-a dahi şəxsiyyətin nəvəsi Rəis Rəsulzadə danışıb. O, bu Rəsulzadə barədə danışmağın çox çətin olduğunu bildirdi.

"O tək mənim doğmam deyil, eyniylə sizin də doğmanızdır. Onun barəsində sizlər danışmalı, sizlər təbliğ etməlisiniz. O, elə bir simadır ki, onu cümlələrlə izah etmək çətindir.
Bu mövzuda jurnalistlərin üzərinə ciddi məsuliyyət düşür, mən onun barədə saatlarla, günlərlə danışaram, ancaq onu ictimaiyyətə sizlər təbliğ etməlisiniz.

O, nadir, böyük bir şəxsiyyətdir. Mənim üçün qürur yeri, fəxr yeridir. Bu dövr hər birimizin qürur dövrü, fəaliyyəti isə hər birimizin fəxridir".

Fatimə İbrahimova
Ölkə.az