Şəmkirdə "Arşın mal alan"ın rəngli versiyası təqdim olundu

Tamaşaçılar rənglənərək bərpa edilmiş "Arşın mal alan" filmini izləyiblər.

Ölkə.Az xəbər verir ki, Şəmkir Heydər Əliyev Mərkəzində Heydər Əliyev Fondunun təşəbbüsü ilə rənglənərək bərpa edilmiş "Arşın mal alan" filminin təqdimatı keçirilib.

Təqdimatda bir çox dövlət rəsmiləri, ictimaiyyət nümayəndələri, məktəb direktorları iştirak edib. Təqdimatı giriş sözü ilə açan Şəmkir Heydər Əliyev Mərkəzin direktoru Məleykə Əlizadə Milli mədəniyyətimizin bütün dünyada tanıdılması istiqamətində Heydər Əliyev Fondunun misilsiz xidmətlərindən söz açıb.

Daha sonra tamaşaçılar rənglənərək bərpa edilmiş "Arşın mal alan" filmini izləyiblər.

Qeyd edək ki, Azərbaycan kino sənətinin əfsanəsi olan "Arşın mal alan" filmi 1945-ci ildə dahi bəstəkar Üzeyir Hacıbəylinin eyniadlı operettası əsasında ağ-qara formatda çəkilib.

"Arşın mal alan" filmi Heydər Əliyev Fondunun təşəbbüsü və dəstəyi ilə dünya kino sənayesinin əsas mərkəzi olan "Hollywood"da rənglənərək bərpa edilib. Doqquz ay ərzində həyata keçirilən bu layihə üzərində Asiya, Avropa və Amerikadan olan 157 nəfərlik heyət çalışıb. Onların arasında "Oskar" mükafatına layiq görülmüş peşəkar mütəxəssislərlə yanaşı, Azərbaycanın kino işçiləri də olub.