“İsti yay aylarında qida məhsulları ilə bağlı diqqətli olmaq lazımdır”

Yay fəslində havaların isti keçməsi ilə əlaqədar olaraq insanların daha çox sərinləşdirici içkilərə, dondurmalara, sulara, bostan məhsullarına və mövsümi meyvələrə tələbat artır. Lakin bu məhsullardan istifadə edən insanlar bir çox hallarda zəhərlənir, allergiyaya məruz qalır və digər infeksion xəsətliklərə yoluxurlar. Səbəb isə həmin məhsulların keyfiyyətsiz olması, standartlara uyğun olmayan şəraitdə hazırlanması, antisanitar yerlərdə satılması, məhsulun yararlılıq vaxtını keçməsidir. Ona görə də bəzi hallarda bu məhsullardan istifadə edən şəxslərin ölüm halı baş verib.

Bəs necə etmək lazımdır ki, insanlar istifadə etdiyi sərinləşdirici içki və qidalardan sağlamlıqlarını qoruya bilsinlər, həm də keyfiyyətsiz məhsulların satışının qarşısı alınsın. Məsələ ilə bağlı Azad İstehlakçılar Birliyinin sədri Eyyub Hüseynova müraciət etdik.

“Ölkə.Az”a açıqlamasında Eyyub Hüseynov bildirib ki, havalar isti keçdiyindən qida və bostan məhsullarına və digər qidaların tərkibində kimyəvi atkivlik müşahidə olunduğundan, onların daha etibarlı formada qorunması zərurəti yaranır.

“Sanitar qaydalara əməl olunmayan və uyğun yerlərdə saxlanılmayan məhsullardan istifadə sonda insan sağlamlığına ciddi təhlükə yaradır. Həm qida, həm sərinləşdirici içkilər, dondurmalar, sular, bostan məhsulları, meyvələr antisanitar yerlərdə satıldıqda və yaxud keyfiyyətsiz, saxta, yararlılıq vaxtı keçəndə insan sağlamlığına ciddi təhlükələr yaradır və biz bunun dəfələrlə şahidi olmuşuq. Bununla bağlı uzun illərdir əhali arasında maarifləndirmə, xəbərdarlıq işləri aparılsa da, elə də ciddi nəticə əldə edə bilmirik. Biz bunun əksinin şahidi oluruq”,- E.Hüseynov bildirib.

O, əlavə edib ki, biz bu gün küçələrdə, yol kənarlarında, çimərliklərdə, istirahət mərkəzlərində və onlara yaxın ərazilərdə isti günəş altında plastik qablarda suların, şirələrin, dondurmaların, digər məhsulların və meyvələrn, bostan məhsullarının satıldığının şahidi oluruq. Harada gəldi satırlar. Hamımız kvasın yuxarıda sadaladığım yerlərdə satıldığının şahidi oluruq. Lakin həmin kvasların nə zaman doldurulduğu və yararlılıq müddəti barədə məlumatsızıq. Saxta, keyfiyyətsiz məhsullarla bağlı da problemlər mövcuddur. Bu günlərdə Suraxanı rayonu ərazisində məhşur marketlərin birində NZS pivəsi adı altında keyfiyyətsiz pivə satışı barədə bizə müraciət edilib. Hazırda məsələ araşdırılır. Yəni, biz istehlakçıların aldadıldılması halının davam etdiyinin şahidi oluruq.

Burada cəmiyyətin köməyi də lazımdır. O baxımdan burada ictimaiyyət özü də sağlamlığın qorunması və gözlənilən təhlükələrlə üzləşməmək üçün aktiv rol oynamalıdır. İctimaiyyət müəyyən mənada bir az aktiv olarsa biz nəticədə xoşagəlməz hallardan uzaq ola bilərik”,- E.Hüseynov bildirib.

Mürtəza
Ölkə.Az