Hacı Sabirə yeni vəzifə verildi

Bakıda yeni istifadəyə verilmiş “Heydər” məscid kompleksinə rəhbər təyin edilib. 

Məscidin rəhbəri tanınmış ilahiyyatçı alim, Bakı İslam Universitetinin rektoru, Qafqaz Müsəlmanları İdarəsinin sədr müavini Hacı Sabir Həsənlidir. 

Xəbəri dəqiqləşdirmək üçün Qafqaz Müsəlmanları İdarəsinin sədri Allahşükür Paşazadənin qardaşı, deputat Cavanşir Paşazadə ilə əlaqə saxlayıb. Məlumatı təsdiqləyən millət vəkili Hacı Sabirin məscidə sədr təyin edildiyini bildirib. Onun sözlərinə görə, hələ ki, “Heydər” məscidinə axund təyinatı olmayıb.

Qeyd edək ki, dövlət başçısının tapşırığı ilə inşa olunan bu yeni məscid 12 min kvadratmetr sahədə salınıb. Məscidin fasadı Şirvan-Abşeron memarlıq üslubunda xüsusi daşlarla üzlənib, ornamentlərin zənginliyi fasadda xüsusi arxitektura harmoniyası yaradıb. 

Burada 95 metr hündürlüyündə 4 minarə inşa olunub. Ümumi sahəsi 4200 kvadratmetr olan məscidin daxilində də xüsusi bəzək elementlərindən istifadə olunub, günbəzin kənarlarına Quran ayələri yazılıb. 55 metr hündürlüyündə olan baş günbəz, o cümlədən hündürlüyü 35 metr olan ikinci günbəzi var. (qafqazinfo)

Ölkə.Az