Rusiyada yaşayan azərbaycanlı qadınlar bir araya gəldilər
Moskvada Beynəlxalq Qadınlar Günü 8-Mart münasibəti ilə diasporamızın qadınlarını dəyirmi masa arxasına Azərbaycan Mədəniyyətinin Intibah və Inkişaf Fondu və Azərbaycan Slavyan Gənclər Assosiasiyasının Rusiya nümayəndəliyi yığdı.
Dəyirmi masa Təşkilatcılar fond rəhbəri Şamil Tağıyev və Assosiasiyasının Rusiya Nümayəndəliyinin rəhbəri Toğrul Allahverdiyev tərəfindən təbrik nitqləri ilə açıldı. Qadınların diaspor həyatındakı önəmi qeyd edildi.
Şamil Tağıyev çıxışında qeyd edib ki, qadınlarla bağlı bir çox humanist addımlar Şərq dünyasında ilk dəfə məhz Azərbaycanda reallaşıb. Belə ki, Şərqdə ilk dəfə Azərbaycanda qadınlara seçki hüququ verilməsi, eləcə də ilk qızlar gimnaziyası açılması buna əyani nümunədir. Ş.Tağıyev Azərbaycan qadının dünyada mərd, cəsur və nümunəvi obraz olduğunu xüsusi olaraq vurğuladı: “Bircə onu qeyd etmək kifayətdir ki, Qarabağ müharibəsində qadənlarımız da əsgərlərlə çiyin-çiyinə döyüşüblər”
ASGA Rusiya nümayəndəliyinin rəhbəri Toğrul Allahverdiyev isə öz növbəsində Heydər Əliyev Fondunun prezidenti, Azərbaycanın birinci xanımı Mehriban xanım Əliyevanın simasında dünyada mərd, savadlı və işgüzar Azərbaycan qadının obrazı yarandığını qeyd etdi: “Bundan başqa xüsusi olaraq vurğulamalıyam ki, Heydər Əliyev Fondunun Vitse-prezidenti, RAGT-ın sədri Leyla xanım Əliyevanın nümunəvi diaspor fəaliyyəti, eyni zamanda dünya miqyasında apardığı müxtəlif sosial kompaniyalar birmənalı şəkildə ölkəmizin beynəlxalq aləmdə imicini formalaşdırır”
Dəyirmi masa şairə, publisist Afaq Şıxlının cıxışı ilə davam etdirildi. Tədbirin mahiyyətini qeyd edən şairə Azərbaycan qadınlarının bayramını təbrik etdi.
Çıxışcılar ilk öncə öz peşələri, Azərbaycan diasporunun Rusiya cəmiyyətinin həyatında oynadığı rolu qeyd etdilər. Azərbaycan tarixində, elmində, mədəniyyətində, siyasətində qadınların oynadığı rol qeyd olundu.
“Hər güclü bir kişinin arxasında Güclü bir qadın dayanır” ifadəsi də tədbirin əsas lozunqlarından oldu.
Tədbirin gedişatında 8 ildir Moskvada müəllimə kimi fəaliyyət göstərən Bella Musayevanın Azərbaycan Respublikasının Prezidenti İlham Əliyev tərəfindən əməkdar müəllim adı verilməsi xüsusi qeyd olundu.
Tədbir cərcivəsində, həmçinin, Rusiyada “Qadınlar Kulubu” da yaradıldı. Gizli səsvermə nəticəsində səkkiz qadın kulubun məsləhət şurasına üzv secildi. Kulubun məqsədi Rusiyada yaşayan azərbaycanlı qadınları bir araya toplamaq, problemləri müzakirə etmək, qadınların cəmiyyətin sosial həyatında yaxından iştirakını təmin etmək oldu.
Sonda təşkilatcılar adından qadınlara hədiyyələr verildi. Xatirə şəkli çəkdirilərək bayram süfrəsinə dəvət olundular.
ÖlkəAz
