Maqnit qasırğası davam edir

Elçin Babayev: "Martın 17-dən başlayan maqnit qasırğası davam edir, ürək-qan-damar xəstəliyi olan insanlar daha çox təsirə məruz qalırlar"

Ölkə.Az-ın "APA"ya istinadən verdiyi xəbərə əsasən, Azərbaycan Milli Elmlər Akademiyasının (AMEA) N. Tusi adına Şamaxı Astrofizika Rəsədxanasının elmi işlər üzrə direktor müavini Elçin Babayev bildirib ki, 20 mart tarixində maksimumu 9 olan şkala üzrə geomaqnit Kp indeksi hələ də 5 qiymətindədir:

"17 martda isə bu rəqəm 8-ə çatmışdı. Lakin fəallıq artıq aşağı düşəcək və sabahdan etibarən tədricən öz əvvəlki - nisbətən sakit vəziyyətinə qayıdacaq. Əvvəlki xəbərlərimizdə qeyd etdiyimiz kimi, artıq texnoloji sistemlərə olan təsirlər barədə də məlumatlar yayılır. 10 MHz tezliyində işləyən radio tezliklərdə olan problemlər barədə operatorlar Yeni Zelandiyadan xəbər verir. Geomaqnit qasırğasının nəticəsi olan əsrarəngiz təbiət hadisəsi – qütb parıltısı (Avrora Borealis) hətta ABŞ-ın aşağı coğrafi en dairələrində, Kanzas şəhərində belə müşahidə olunub. Bu hadisə nadir hallarda baş verir və adətən yuxarı en dairələrində daha çox müşahidə edilir".

Babayevin sözlərinə görə, son günlər bir çox insanlarda ürək döyüntülərinin artması, impulsiv baş ağrıları, halsızlıq kimi əlamətlər artıb:

"Ürək-qan-damar xəstəliyinə düçar olmuş insanlar isə daha çox təsirə məruz qalıblar. Nəzərə almaq lazımdır ki, meteoroloji şəraitin kəskin dəyişmələri də kosmik hava ilə yanaşı, öz mənfi effektlərini nümayiş etdirib. Yəni, bu günlərdə kosmik və “yerüstü” havalar unison olaraq mənfi təsir göstərib".

Ölkə.Az