Onsuz keçən ilk ad günü…
Ermənistanın işğalçılıq siyasətində ən çox zərər görən isə mülki əhalimizdir. Bir ilə yaxındır ermənilərin əlində girov saxlanılan azərbaycanlıların ölkəmizə təhvil verilməməsi də rəsmi İrəvanın beynəlxalq hüququ görməzdən gəldiyi açıq-aydın ortadadır. Ata-baba torpaqlarını və valideyinlərinin məzarını ziyarət etmək üçün Kəlbəcərə gedən, orda Ermənistan hərbçiləri tərəfindən öldürlən Həsən Həsənovun ilk dəfə onsuz ad günü keçirilib.
Həsən Həsənovun doğum günü xəbərini dəqiqləşdirmək üçün atası Fərman kişiyə zəng vuranda "düzdür, ay bala, ad günüdür, 36 yaşı olacaqdı" dedi. Sizə gələ bilərəm süalıma da "gəl, əgər gələ bilsən, çünki yollarımız bərbaddır" cavabını eşitdim. Həqiqətən də Subunçuya gedən yol yol deyil, cəhənnəm əzabıdır. Amma əlbəttə Həsənin atası Fərman kişinin, anası Gilas nənənin çəkdiyi cəhənnəm əzabının yanında heç nədir.
Həsən Fərman kişi ilə Gilas nənənin 9 övladından 6-cısı idi. Amma əlbəttə hər övladın validyenin ürəyində öz yeri var. Həsənin də yeri başqaydı, deyir atası.
“Ağır itkidir. Həm də şərəflidir. Bütün xalq ağlayırdı. Üç mindən çox adam yığışmışdı dəfn mərasiminə. Onun özü mənim üçün toxtaqlıqdır. Biri var heç kim gəlməyə tək qalasan. Amma mən orada tək olmadım, bütün Azəbaycan xalqı orada idi”.
Oğlu ölən anadan ad günü təəssüratını soruşmazlar. Amma peşəmizin xüsusiyyəti bəzən bizi cəsarətli edir. Hətta bir ananın göz yaşlarını sakitcə seyr edəcək qədər cəsarətli.
“Bir boşqab ərik meyvəsinin ən yaxşılarını seçib onun qarşısına qoyub dedim ki, bunu ye. Yeyəndən sonra dedi ki, əriklər Cəbrayılda kənddəki əriyə necə də oxşayır”, – deyə Gilas Hüsüyeva bildirdi.
Həsəngilin ailəsində də bu gün əsas müzakirə mövzusu Avropa İnsan Haqları Məhkəməsinin onların müraciətlərinə verəcəyi cavabdır.
Xatırlayırsızsa, bu ilin əvəvlində Azərbaycan tərəfi Dilqəm Əsgərov və Şahbaz Quliyevin adından Avropa İnsan Haqları Məhkəməsinə müraciət göndərib. Həsən Həsənovun ermənilər tərəfindən öldürülməsilə bağlı şikayət isə bu məhkəməyə Həsənin ailəsi adından ünvanlanıb.
Girovlarımızın hüquqlarını müdafiə edən vəkil Anar Bağırovun sözlərinə görə, Həsən Həsənov heç də erməni tərəfinin bəyan etdiyi kimi uzaq məsafədən açılan atəş nəticəsində öldürülməyib, məhz işgəncə ilə öldürülüb. Bununla bağlı məhkəmə ekspertizasının rəyini xatırladan vəkil bu materialların da Avropa İnsan Haqları Məhkəməsinə təqdim edildiyini bildirib.
Üç aya yaxın vaxt keçsə də, müraciətə hələ də cavab verilməyib. Hansı ki, bu məhkəmənin obyektiv qərarı iki girovu, bir günahsız ruhu sevindirə bilər.
ANS TV
