Mən ATV-nin dostuyam, siz Xoşqədəmin?

İntiqam VALEHOĞLU

Son 3-4 gündə medianın gündəmində elə medianın özüdür. Əvvəlcə Xoşqədəm Hidayətqızının ATV-dən ayrılıb ANS-ə getməsi haqda xəbərlər, ardınca Aşıq Ədalətin çəkiliş vaxtı var-yox söyüşü söyməsi. İndi də elektron medianın, saytların bir-birini təkzib üçün növbəyə dayanması. Gəlin lap əvvəldən başlayaq.

Xoşqədəm Hidayətqızının ATV-dən getməsi haqda xəbəri ilk olaraq "show.az" yaymışdı. Ardınca ATV-dən özəl açıqlamanı şəxsən özüm aldım. Sonra mənə deyilən sözlər mətn şəklində əksər saytların elektron poçtuna göndərildi.

Elə hər şey də bundan sonra başladı. Mətbuatda heç bir halda müqayisəmiz mümkün olmayan bəziləri iradlar bildirməyə, guya kimlərəsə nələrisə göstərməyə çalışdılar. Şübhəsiz ki, hamısı susduruldu. Bəziləri isə etdiyi yanlışı daha tez anlayaraq özləri susmağa üstünlük verdilər.

Telekanaldakı mötəbər mənbəyə istinadən yazdığım xəbərlər isə söylənilməsi təvazökarlıqdan uzaq da olsa, şok effekti yaratdı. Bu haqda sosial şəbəkədə yazmışam və bir daha qeyd etməyə lüzum görürəm. Əziz həmkarlar, nə ATV-yə, nə ANS-ə, nə Vüqar Qaradağlı, nə də Xoşqədəm Hidayətqızına qarşı qərəzli deyiləm. Hərçənd ki, məcburiyyət qarşısında jurnalist qismində Xoşqədəm Hidayətqızının toyunda iştirak etmişəm. Bir dəfə də Saraydakı qonşusu redaksiyamıza müraciət edib, evinin teleaparıcı tərəfindən sökdürüldüyünü deyib, mən də işıqlandırmışam. Vüqar Qaradağlı isə iki il işlədiyim "Mərkəz" qəzetinin baş redaktoru olub. Yəni, adını sadaladığım bu şəxslər və media quruluşları nə dostumdur, nə düşmənim.
Hətta olub ki, aylarla işsiz qalmışam və nə Vüqar Qaradağlıya, nə də ATV-nin digər rəhbər şəxslərinə müraciət etməmişəm. Bu da belə. Bu qədər xırdalıqlara varmağımın səbəbi var.

Dünən bəzi saytlar mənim bir neçə gün öncə yazdığım yazını təkzib edəcək və özləri demişən, şok faktlarla dolu yazı dərc ediblər. Əgər kimin imkanı olsa "Xoşqədəm Hidayətqızı Vüqar Qaradağlının yerinə keçmək istəyirmiş" yazısıyla həmin materialları uzlaşdırsın. Az-çox mətbuatdan anlayışı olan istənilən adama göstərsən biləcək ki, müəllif birinci yazının - yəni mənim yazdığımı qarşısına qoyub bütün fikirləri tam tərsinə izah etməyə çalışıb.

Dostlar, heç vaxt işlədiyim sayta, onun rəhbərinə görə heç bir həmkarımla münasibətləri pozmamışam və pozmaram da. İstər Ölkə.Az istərsə də, digər işlədiyim digər saytlar mənim üçün iş yeridir və buradan əməkhaqqı alıram. O üzdən jurnalist kimi bacardığımın ən yaxşısını etməliyəm. Ancaq yenə də heç kimlə kin saxlamaq, nifaqa yol açmaq fikrim yoxdur.Çünki gündə bir sayt açılır, beş sayt bağlanır. İşlədiyimiz hər sayta görə dost itirsək, gərək bir özümüz olaq, bir də özümüz. Əgər məni, yaxud hazırda yazılarımın dərc olunduğu saytı ATV rəhbərliyinə yaxın hesab edirsinizsə, yanılırsınız. Əgər Xoşqədəm Hidayətqızına xoş olmayan açıqlamalarla dolu (həmin açıqlamaları ATV rəhbərliyinə yaxın mənbələrdən almışıq) yazı ATV rəhbərliyinə yaxın olmaqdırsa, bunun əksini yazmaq nədir? Sizin məntiqinizlə düşünsək, cavab aydındır.

Ölkə.Az