20 min dollara görə Canpolad erməni türmə rəsinin işgəncəsində qalmamalıdır

"Canpolad Budaqovu Azərbaycana ekstradisiya etmək mümkündür, bütün sənətlər hazırdır, çatışmayan bir şey var - 20 min manat..."

Canpolad Budaqovun qadaşı Elman Budaqov bu məsələ ilə bağlı Ölkə.Az-ın suallarını cavablandıraraq məsələyə aydınlıq gətirib.

- Öncə Canpolad haqqında danışaq.

- Düzdür, unutqanıq, amma məncə Canpoladı tanımayan yoxdur. 1971-ci il təvəllüdlü Canpolad orta məktəbi qızıl medalla başa vurub və daha sonra isə Tibb Universitetinin müalicə-profilaktika fakültəsini bitirib, cərrah olub. Eyni zamanda tar və rəssamlıq kurslarına gedib. Canpolad 2 qat dünya, 3 qat Avropa çempionu, 7 dəfə beynəlxalq turnirlərin qalibi, 14 qat Azərbaycan çempionudur. Peşəkar idmanla məşğul olan Canpoladın sonuncu böyük uğuru 2001-ci ildə dünya kubokunu qazanmasıdır. Canpolad 2005-ci ilədək uşu-sanda üzrə Azərbaycan milli komandasının baş məşqçisi olub. 4 il baş məşqçilik edən Canpolad bu postdan ayrılandan sonra bir müddət özəl məşqlər keçərək tələbələr yetişdirib.

- Canpoladın idman karyerası necə ləkələndi?

- Səbəb pis ətraf oldu. Canpoladın borcları var idi. İndi idmançılar üçün əla şərait yaradıblar. 1992-ci ildən 2000-ci ilə kimi idmançılar borca-xərcə pul tapıb yarışlara gedirdi. Hal-hazırda beynəlxalq turnirlərdə qələbə qazanan bir idmançını qəhrəman kimi qarşılayırıq, amma Canpolad 1992-94-cü illərdə dünya çempionu olanda borc-xərc tapıb turnirə getmişdi. O zaman Canpolad çempion olub Azərbaycanın himnini səsləndirib, bayrağını dalğalandıranda Canpoladdan soruşublar ki, bu hansı ölkədi? Ölkəni siyasətçilər ilə yanaşı həm də idmançıları və sənətkarları dünyada tanıdır. 2007-ci ilin mayında Bakıda 2,53 qram heroinlə tutulan Canpolad 2 il həbsdə yatandan sonra 2009-cu ildə azadlığa çıxdı. Sizə deyim ki, qardaşım heç vaxt narkotik istifadəçisi olmayıb. Qardaşım qisas məqsədilə şərlənərək həbs edilib. Məhkəmədən sonra mənə onu kimin şərlədiyini də dedi.

- Canpoladın borca düşməsinə əsas səbəb nə idi?

- Canpolad yarışlara getmək üçün borca girirdi. Azərbaycanda idmana əsasən Prezidentimiz İlham Əliyevin 1997-ci ildə Milli Olimpiya Komitəsinin rəhbəri seçilməsindən sonra yüksək səviyyədə diqqət və qayğı göstərilməyə başlanıldı. Elə olub ki, Canpolad yarışlara getmək üçün bankdan pul götürüdü. İndi idmançılarımız yer tutanda onlara çox yüksək qoymət verirlər. Ancaq 1994-cü ildə Canpolad Avropa çempionatına getmək üçün faizə borc pul götürmüşdü. Çempion olub qayıdanda o zamankı gənclər, nazir Əbülfəs Qarayevlə görüşmüşdülər. Nazir Canpolada və digər idmançılara demişdi ki, sizə verməyə heç nə yoxdur, amma üç qərənfil verə bilərik.

- Bəs Canpoladın ölkədən getməyə nə məcbur etdi?

- Canpolad  2009-cu ildə azadlığa çıxandan sonra başına yeni oyun gəlir. Bu dəfə ona xuliqanlıq maddəsi ilə yeni cinayət işi açılır. Lakin Canpolad cinayət işi açılarkən Azərbaycanı tərk edir və onun barəsində axtarış elan edilir. Canpoladın xuliqanlıqda təqsirləndirilməsinin səbəbi qonşunu sillə ilə vurması oldu. Biz “Papanin”də qalırdıq. Canpolad maşınını dalanda saxlamışdı. Arxasında isə başqa bir maşın saxladığından o, maşınını çıxara bilmədi. Məhəllədə bunun üstündə mübahisə düşdü. Qonşulardan biri səs-küydən sonra Canpolada xəbərdarlıq elədi ki, sakit olsun. Bu zaman onların arasında mübahisə oldu. Mübahisə qızışanda qardaşım qonşuya bir sillə vurdu. Başqa bir qonşu 102-yə zəng eləmişdi. Bu zaman hadisə yerinə polis əməkdaşları gəldi. Hadisənin başvermə səbəbi budur - bir sillə.

Azərbaycanı tərk edən Canpolad 2009-cu ildə Moskvaya - dostlarının yanına gedir. Orada restoran işlətməyə başlayır. Bir müddət sonra Canpoladın Samaradkı dostları qardaşıma deyir ki, Samaraya gəl, zal götürmüşük, məşqçilik et. Qardaşım Moskvadan Samara şəhərinə gedir. Samarada doslarının ona açdığı zalda məşq keçməyə başlayıb.

 

 

Qeyd: Xuliqanlıq maddəsi ilə açılan cinayət işinə görə, Canpolad Budaqov 2013-cü ilin sentyabrında Bakıya gətirilib. Nəsimi Rayon Məhkəməsinin hökmü ilə 6 ay həbsə məhkum olunan Canpolad Budaqov məhkəmə qərarı qüvvəyə minəndən sonra Samara həbsxanasına geri qaytarılıb.

 

- Canpoladın ermənini öldürməsi və türməyə düşməsi necə olub?

- “Canpolad 3 azərbaycanlı dostu ilə “Vodopad” kafesinə gedib. Onun əynində üzərində Azərbaycan atributları olan köynək olub. Həmin vaxt kafedə qadınlı-kişili 60 nəfər erməni varmış. Onlar ölən Samvel Mehrabovun atasının ad gününü qeyd edirmiş. Ermənilərdən bəziləri Canpoladgili görəndə qıcıqlanıblar. Dava 4 azərbaycanlıdan birinin döyülməsi ilə başlayıb. Canpoladgil masada əyləşəndə onlardan biri çölə çıxıb. Qayıdanda ermənilər buna sataşıblar. Aralarında mübahisə düşüb və 6-7 erməni azərbaycanlı gənci döyməyə başlayıb. Canpoladgildə buna müdaxilə etmək istəyib. Onların çox olduğunu görən Canpolad mətbəxdən bıçaq götürüb, onları qorxutmaq istəyib. Lakin qarışıqlıqda məhz polis olan erməni bıçaqlanıb. Bıçaq bilərəkdən ona dəyməyib.

Canpolad dedi ki, əgər öldürmək istəsəydim, tək onu öldürməzdim, ordakıların hamısını öldürərdim və bir bıçaq zərbəsi də endirməzdim. Davanın səbəbkarı da ölən polisin böyük qardaşı olub.

- Canpoladın dostları ona dəstək olur?

- Bu günədək Canpolada naxələf çıxmayan dostları ona dəstək olub. Canpolad üçün çəkilən xərclərin böyük hissəsini onlar öz üzərinə götürüb. Lakin Canpoladın vaxtilə dəstək olduğu, özünə yaxın bildiyi bir çox insanlar indi vəziyyətləri yaxşı olsa da onun haqqında qətiyyən fikirləşmirlər. Həbsxana həyatı çətindir, amma bu həyat Canpolad üçün son 6 ayda daha da çətinləşib. Bu 6 ay ərzində o, həbsxana rəisi tərəfindən işgəncələrə, təzyiqlərə məruz qalıb. Səbəb isə yeni rəisin erməni əsilli olmasıdır. Yeni rəis Canpoladın erməni polisinin qətlinə görə həbsxanada olduğunu bildiyindən ona təzyiqlər edir, bütün hüquqlarını məhdudlaşdırır, yeri gəldi-gəlmədi “kars”a salır, psixoloji təzyiqlərə məruz qoyur. Canpolad hər ayın 20 gününü "kars"da keçirir...

Canpoladın dostluq etdiyi insanlar arasında hazırda Milli Məclisdə təmsil olunan iki deputat da var. Canpoladı bir zamanlar özünə dost bilənlər arasında icra başçısı, məmurlar, biznesmenlər də olub. Lakin Canpoladın başına gələnlərdən sonra necə deyərlər, onlar dostluğu, duz-çörəyi unudublar. Canpoladın yaxşı vaxtlarında yanında olan, indi isə yaxşı imkanı olan şəxslər yaxın durmur. Onların çoxu bu yardıma etiraz edib dəstək olmaq istəmir. Yəqin fikirləşirlər ki, Canpolada 13 il iş verilibsə, qoy yatsın. Hətda məhşur bir idmançımız var, ona zəng elədim bu barədə, dedi, "brat vaxtım yoxdur". Canpoladın ən yaxın və imkanlı dostu Şakir adlı biznesmen olub. O, çətin günlərdə Canpolada çox dəstək olurdu. Lakin sonra həmin iş adamı vəfat edib. Ərk elədiyimiz, kömək istəyə biləcəyimiz şəxslərə ağız açmışıq. Daha olmur. Hər kəsin problemi var. Bir dəfə kömək edənə bir də ağız açmaq olmur. Anam yaşlı qadındı. Bu məsələlərə görə təsəvvür edin onun da banka borcu var. Mənim 4 banka borcum var.

- Canpoladla axırıncı dəfə nə zaman danışmısız?

- Canpolad anamın nömrəsin əzbər bilir. Ona görə də anama zəng edir daha çox. Axırıncı dəfə 15 gün əvvəl anamla danışıb. Yəqin yenə "kars"dadır. Canpolad əvvəl evlə tez-tez əlaqə saxlaya bilirdi. İmkan olanda hətta "skaype" vasitəsi ilə də danışırdıq. Ancaq yeni rəis gələndən sonra danışmaq çətinləşib. Öz nömrəsinə zəng çatmır.

- Canpoladın Azərbaycana ekstradisiyası üçün hansı işlər görülüb?

- Canpoladın Azərbaycana ekstradisiyası mümkündür. Bunun üçün lazım olan sənədlərin hamısı artıq hazırdır. Yeganə əngəl məhkəmənin təyin etdiyi qanpulunun ödənilməməsidir. Əgər bu məbləğ qarşı tərəfə ödənilsə, Canpolad Azərbaycana qaytarılacaq. Məbləğ 1 milyon rubldur (təxminən 20 min dollar). Ermənilər qanpulu olaraq 3 milyon rubl istəyirdi. Buna da imkanımız yox idi. Vəkilimiz Daşdəmirovun səyləri nəticəsində bu məbləğ 1 milyon rubla endirildi. Azərbaycan Ədliyyə Nazirliyi Canpoladın Azərbaycana ekstradisiya olunması üçün Rusiyaya müraciət edib. Biz nazirlikdə qəbulda olmuşuq. Nazirlik də bu işlə məşğuldur, bütün problem həll edib. Razılıq əldə olunub. Canpoladın özü də bütün sənədlərə qol çəkib. Məbləğ ödəniləndən sonra Canpolad Azərbaycana göndəriləcək. Sənədlər artıq bir aydır ki, hazırdır. Çatışmayan bir şey var - 20 min dollar...

- Canpoladın hal hazırda sağlıq vəziyyəti necədir?

- 1994-cü ildə Avropa çempionatında iştirak edəndə sağ ayağı qırılmışdı. Qırıq ayaqla hətda çempion da olmuşdu. Çempionatdan qayıtıqdan sonra ayağından əməliyyat olundu. Ayağı 3 ay gipsdə qaldı. Onun ayaqlarına su yığılır. "Skaype" vasitəsi ilə danışanda göstərirdi, hər ikisi şişmişdi. Bu vəziyyətdə bir neçə ay da qalsa, ya öləcək, ya da ayaqlarını kəsəcəklər.

- Dövlətdən və cəmiyyətdən istəyiniz nədi?

- Biz Canpoladın azadlığa buraxılmasını istəmirik. Cinayət edib cəzasın çəksin, amma öz doğma vətənimizdə çəksin o cəzanı. Erməni türmə rəisi qardaşıma işgəncə verə-verə öldürəcək. Bunun üçün 20 min dollar pul ödəməliyik, amma o pulu tapa bilməmişəm... Biz niyə unutqanıq bilmirəm. Amma Azərbaycan üçün hər şey edən biri 20 min dollara görə indi erməni işgəncəsində qalmamalıdır. Qardaşımın Azərbaycanda cəza çəkməsi üçün  dövlətə müraciət etməkdən başqa bir əlacım yoxdur...

 

Səxavət Məmməd

Foto: Nurlan Gülməmmədov

Ölkə.Az