Politoloq: "Diasporanın formalaşmasına mane olan qurum elə Diaspor Komitəsidir"

"Azərbaycan höküməti Diaspora təşkilatlarına külli miqdarda pul ayrır ancaq nəticəsi sıfıra bərabərdir"

Milli Məclisin bu günkü iclasında diaspora təşkilatlarının fəaliyyəti müzakirə edilib, onların zəif fəaliyyətinə diqqət çəkilib.

Bununla bağlı politoloq Zərdüşt Əlizadə Ölkə.az-a fikirlərini bildirib.

Zərdüşt Əlizadə: "Xarici ölkələrdəki diaspora təşkilatlarına qarşı Diasporla İş üzrə Dövlət Komitəsi müharibə aparırdı. İstədiklrini parçalayırdı və zəiflədirdi. Sonda ona nail oldular ki, azərbaycanlılar diaspora kimi demək olar ki, yox dərəcəsindədirlər. Üzdə hansısa kiçik-kiçik diaspora təşkilatı var, onlar da hökumət qurumlarının şöbəsi kimi fəaliyyət göstərir. Hökumətin diaspora formalaşdırmaq üçün külli miqdarda vəsait xərcləməsinə baxmayaraq ortada heç nə yoxdur. Bu təşkilatlar əslində Azərbaycana işləmirlər, diaspora kimi tanınmırlar, heç bir hörmətləri də yoxdur".

Qeyd edək ki, qondarma "erməni soyqırımı"nın 100 illiyi zamanı Rusiyadakı diaspora təşkilatlarımızın başıpozuq fəaliyyəti cəmiyyətimizin ciddi narahatlığına səbəb olmuşdu.

Səxavət Məmməd
Ölkə.az