AXCP, Milli Şura, mitinq və İŞİD bayrağı...
12 oktiyabr Milli Şura "Azad et!" adlı mitinq elan etdi. Öncədən bildirdilər ki, "bu toy deyil dəvətnamə göndərək. Kim, daha doğrusu hansı partiya istəyir buyurub iştirak edə bilər".
Son ana qədər hər kəsi düşündürən bir sual var idi. "Müsavat" partiyası mitinqdə iştirak edəcək ya yox? Mitinqdən bir neçə gün əvvəl müsavatçılar bildirdi ki, iştirak edəcəklər. Tural Abbaslı hətta sosial şəbəkədən müsavatçılara çağırış da etdi.
Ölkə.Az-a açıqlamasında Tural Abbaslı bildirdi ki, "partiya olaraq rəsmən qatılmasaq da mitinqdə iştirak edəcəyik", ancaq partiya rəhbərliyindən bu barədə heç bir səs çıxmadı.
Mitinq saat 15:00-a təyin edilsə də, Əli Kərimlinin və Cəmil Həsənlinin tıxaca düşməsi səbəbindən mitinq təyin edilən vaxtdan yarım saat gec başladı. Babalı öz boyunlarına, özləri dedilər ki, tıxaca düşüblər ancaq onsuz da bu günə qədər vaxtında başlayan mitinqə rast gəlməmişik. Nəysə məsələnin məğzi bu deyil...
Əli Kərimlini İsa Qəmbər tıxaca saldırıb?
Mitinq təşkilatçıları geciksə də, Müsavat funksionerləri mitinqin başlamasından bir neçə dəqiqə öncə meydanda idilər. Adama elə gəldi ki, İsa Qəmbər qəsdlə AXCP sədri Əli Kərimli ilə Milli Şuranın lideri Cəmil Həsənlini tıxaca saldırıb və cəbhəçilərə göstərir "görürsüz, sizin bəylər məsuliyyətsidir, biz Milli Şuradan ayrılsaq da hamıdan öncə gəlirik meydanlara". İsa Qəmbərdən əlavə, "Müsavat" partiyasının yeni başqanı Arif Hacılı, Gülağa Aslanlı, İlqar İbrahimoğlu, Elman Fəttah, Şəmşad Ağa, Tural Abbaslı və 10-larla müsavatçı mitinqdə iştirak edirdi.
Mitinq başlar-başlamaz xəbər yayıldı ki, müsavatçılar tirbunaya buraxılmayacaq və elə də oldu. Ancaq Əli Kərimli və Cəmil Həsənli bir şeyi unutmamalıdırlar ki, Azərbaycanda gəlmiş keçmiş ən yaxşı mitinq aparıcısı İsa Qəmbərdir. Həqiqətən də İsa Qəmbərin tirbunada yeri görsənirdi. Əvvəla onu qeyd edim ki, mitinqdə səsləndirmədə çox ciddi problem var idi, ikincisi də çıxış edənlər "facebook" statuslarını oxuyurdular. Əslinə qalsa mitinqin adı Milli Şuranın, dadı AXCP-nin idi.
Duruşundan, baxışından alkaşa bənzəyən "İŞİD bayraqdarı"
Mitinq başlayandan biraz sonra ara qarışdı və bir nəfər İŞİD bayrağı qaldırdığı üçün mitinq iştirakçıları tərəfindən polisə təhvil verildi. Bəs polis neynədi? Yəqin fikirləşəcəksiz ki, polis həmin adamı maşına basıb apardı bölməyə. Yox, düz tapmadınız. 5-10 dəqiqə sonra həmin İŞİD bayraqdarını yenidən buraxdılar meydana. Bayraqdar yenə İŞİD bayrağın qaldırırdı və yenə mitinq iştirakçıları onu sürüyüb gətirib polisə təhvil verdilər.
Əvvəla, polis meydana gələn hər bir kəsin üst-başını kifayyət qədər ciddi şəkildə axarırdı. Belə pis çıxmasın, adamın altındakı donuna kimi yoxlayırdılar. O İŞİD bayrağı necə meydana keçdi, anlamaqda çətinlik çəkirəm.
Polisin bayrağı meydana buraxması qədər də İŞİD bayraqdarı çox qəribə idi. Bizim bildiyimiz İŞİD-çilər uzun saqqallı, bığsız, qısa şalvarlı olurlar. Bu İŞİD bayraqdarı isə saqqalsız, bığlı və əynində özlərinin dili ilə desək şeytan yuvasının markası olan cins şalvar var idi. Adətən görmüşük ki, etiraz edən dindarlar "Allahu Əkbər!" deyə qışqırır ancaq nə hikmət idisə bu İŞİD bayraqdarının heç səsi də çıxmırdı.
Göydən yumurta yağır
"Məhsul" stadionun qarşısında hündür mərtəbəli bina var. Binadan çox az sayda adam mitinqə baxırdı. Dayandığımız yerə qəflətən göydən nəsə düşdü. Yerə baxdıq ki, yumurta. Ya o yumurta atan bizlə çox pis zarafat edirdi, ya da evdə yumurtanı qoymağa yer tapmırdı. Camaatı da qınamaq olmaz, bu qiymətə yumurta olar? Yumurtanın qiymətinı bir az qaldırmaq lazımdır ki, yumurta qiymətə minsin, onu göydən yerə yox, qazana, yağın içinə atsınlar.
"İmkan verməzsizdə istirahət edək!" deyən deputatlar özləri jurnalistlərə zəng edir ki, açıqlama vermək istəyirəm
Başqa vaxt, bir az tez və yaxud bir az gec, şənbə-bazar günləri hansısa deputata açıqlama üçün zəng edəndə, salamsız kalamsız sözləri bu olurdu, "İmkan verməzsiz də, istirahət edək". İŞİD bayrağı qalxandan dərhal sonra özü də bazar günü, deputatların açıqlamaları manşetlri bəzədi. San ki yarışa girmişdilər. Nə deyək, təki həmişə belə olasınız. İstəmiyənin gözü kor olsun.
Sakit bitən mitinq
Mitinq başladığı kimi sakit şəkildə də sona yetdi. Mitinqdən sonra nə qaç-qov, nə də tuthatut oldu. Bilmirəm, bu mitinqdən sonra siyasi məhbuslar azad olacaq ya yox, amma bu İŞİD bayraqdarı yeni və qatı xəmirdi, çox su aparacaq...
Səxavət Məmməd
Ölkə.Az
