Rusiyada parad zamanı hərbi texnika alovlandı

Hadisə Çitada olub.

Ölkə.Az xəbər verir ki, Rusiyanın Çita şəhərində keçirilən Qələbə paradında “Buk” raket qurğusu yanıb.

Bu gün baş verən hadisəni parad izləyicilərindən biri çəkərək "Youtube" kanalında yerləşdirib. Yanğınsöndürən maşınının köməyi ilə qısa zamanda alovun qarşısı alınıb və parad davam edib.

Xatırladaq ki, bu gün İkinci Dünya Müharibəsində qələbənin 70 illiyi münasibətilə Rusiyanın əksər şəhərlərində təntənəli tədbirlər başlanıb. Moskvanın Qırmızı Meydanında 9 may Qələbə paradı keçirilir.

Qələbə paradında 16500 hərbçi iştirak edir və onların arasında Azərbaycan, Ermənistan, Belarus, Qazaxıstan, Qırğızıstan, Monqolustan, Türkmənistan, Hindistan, Serbiya, Çindən olan hərbçilər də var. Qırmızı meydanda parada fəxri qonaq qismində 2,3 min müharibə veteranı qatılıb. Qələbənin 70 illiyi münasibətilə 30 dövlət və hökumət başçıları, habelə beynəlxalq təşkilat rəhbərləri Moskvaya səfər edib.

Rəşid Mustafazadə

Ölkə.Az