Mübariz Qurbanlı ABŞ səfirini dövlət-din münasibətləri barədə məlumatlandırdı

Mayın 13-də Dini Qurumlarla İş üzrə Dövlət Komitəsinin sədri Mübariz Qurbanlı ABŞ-ın Azərbaycandakı səfiri Robert Sekutanı qəbul edib.

Komitədən Ölkə.Az-a verilən məlumata əsasən, görüşdə Mübariz Qurbanlı bildirib ki, Azərbaycanda din-dövlət münasibətləri Konstitusiya və “Dini etiqad azadlığı haqqında” Qanunla tənzimlənir.

“Bu gün Azərbaycan tolerantlıq və multikultural dəyərlərə görə dünyada nümunə ola biləcək ölkələrdən biridir. Müxtəlif konfessiyalar sərbəst və qarşılıqlı anlaşma şəraitində fəaliyyət göstərirlər. Ölkəmizdə məscid, sinaqoq və kilsələr insanların ixtiyarına verilib”, - komitə sədri deyib.

Mübariz Qurbanlı bildirib ki, ibadət evlərinin bir qisminin təmir və bərpası Azərbaycan hökumətinin hesabına həyata keçirilir.

Robert Sekuta öz növbəsində iki ölkə arasında münasibətlərin inkişaf etdirilməsi üçün səylə çalışdığını deyib.

O, qeyd edib ki, səfir kimi namizədliyi irəli sürülərkən ABŞ Senatındakı çıxışında Azərbaycanın yüksək tolerantlıq nümunəsi olduğunu xüsusi vurğulayıb.

Ölkə.Az