"Zamanı gələndə ermənilərin havadarları onlara kömək edə bilməyəcəklər"

Kollektiv Təhlükəsizlik Müqaviləsi Təşkilatının baş katibi Nikolay Bordyujanın Ermənistan səfəri və erməni prezidenti Serj Sarkisyanın bu təşkilatı Azərbaycana müdaxilə etməməkdə günahlandırmasını hərbi ekspert Üzeyir Cəfərov Ölkə.az-a şərh edib.

Üzeyir Cəfərov: “Kollektiv Təhlükəsizlik Müqaviləsi Təşkilatının baş katibi Nikolay Bordyuja işsiz qalan bir generaldır. Ona bu vəzifəni həvalə ediblər, o da, bekar qalmamaq üçün daha çox Ermənistana gedir. Bordyuja bir qədər yeyib-içməyə meyilli adamdır, yəqin Ermənistanda ona yaxşı baxırlar. Onun Kollektiv Təhlükəsizlik Müqaviləsi Təşkilatına daxil olan digər ölkələrə, Qazaxıstana, Belarusa getməsini çox nadir hallarda görürük. O, elə Moskva-İrəvan xətti arasnda gedib-gələn bir təqaüdçü generaldır. O da ora gedəndə iki xasiyyətcə, təbiətcə özünə yaxın olan adamların giley-güzarını dinləyir vədaha sonra Ermənistan prezidentinin mətbuat katibi dünyaya car çəkir ki, "bəs görüşdə hansısa müzakirələr oldu".

Onlar nə deyirlər, nə müzakirə edirlər etsinlər, Azərbaycan onlara əhəmiyyət verməməlidir. Ancaq Bordyuja cızığından çıxmamalıdır, Azərbaycan müstəqil dövlətdir və heç kim Azərbaycana zorla, məcburən nəyisə diqtə edə bilməz. Bordyujanın az da olsa vicdanı ağrıyırsa, Ermənistan rəhbərliyinə məsləht görər ki, beynəlxalq hüquq və normalara hörmət etsinlər.

Dünən ölkə başçısı İlham Əliyev nazirlər kabinetinin iclasını keçirib və iclasda Azərbaycanın yeni və daha dəqiq vuran silahlar alacağı il bağlı fikirlər səsləndirib. Bunu eşidən kimi Ermənistanda aləmi bir-birinə qatacaqlar ki, Azərbaycan yenə silahlanır, müharibəyə hazırlaşır. Azərbaycan nə etməlidir? Azərbaycan torpaqları işğal altındadır, Ermənistan bunu bir dəfəlik anlamalıdır. Onun havadarları da zamanı, vaxtı gələndə heç Ermənistana kömək belə edə bilməyəcəklər”.

Səxavət Məmməd

Ölkə.az