Dilqəmdən oğluna məktub

Ermənilərin Qarabağda girov saxladığı Rusiya vətəndaşı Dilqəm Əsgərovun ailəsinə göndərdiyi məktubun məzmunu məlum olub. Məktubda D.Əsgərov əsasən oğluna müraciət edib.

Girovun oğlu Kürdoğlu Əsgərovun bildirdiyinə görə, D.Əsgərov vəziyyətinin yaxşı olduğunu yazır.

"Kürdoğlu, salam. Məndən nigaran qalmayın. Oğlum, Bakıda çox qalma. Yerim istidir. Gündə 3 dəfə yemək verirlər. Heç bir problem yoxdur", deyə Dilqəm Əsgərov məktubunda yazır.

K.Əsgərov isə atasının məktubunda yazılanların həqiqətə uyğun olmadığını dedi. Onun sözlərinə görə, D.Əsgərovu məktubu bu formada yazmağa məcbur edirlər. O, atasının vəziyyətinin yaxşı olmadığını deyir.

"Beynəlxalq Qırmızı Xaç Komitəsinə dəfələrlə müraciət etmişəm. Demişəm ki, mənə atamın videosunu gətirsinlər. Orada necə danışdığını görüm. Onda inanaram ki, vəziyyəti yaxşıdır. Gətirdikləri isə sadəcə kağız parçasıdır", deyə K.Əsgərov bildirdi.

Qeyd edək ki, oktyabrın 6-da Beynəlxalq Qırmızı Xaç Komitəsi nümayəndələri Qarabağda girov saxlanılan azərbaycanlılara baş çəkib.

Xatırladaq ki, Ermənistan tərəfi öz doğma dədə-baba toqpaqlarına səfər etmiş Azərbaycan vətəndaşları Dilqəm Əsgərov və Şahbaz Quliyevi girov götürüb. Qondarma Dağlı Qarabağ Respublikasında qurulan məhkəmədə isə həmyerlilərimiz ittiham olunacaq.

Öz torpaqlarında işğalçılar tərəfindən məhkəməyə çaxarılması planlaşdırılan azərbaycanlılar müxtəlif cinayətlər törətməkdə günahlandırılır. Məhkəmə prosesinin vaxtı tam dəqiqləşməsə də, yaxın günlərdə baş tutması gözlənilir. (anspress)

Ölkə.Az