Həftənin icmalı
Azərbaycanda Ramazan ayının başlayacağı tarix açıqlandı: 16 iyun
14.05.2015
Azərbaycan Milli Elmlər Akademiyası (AMEA) Şamaxı Astrofizika Rəsədxanası tərəfindən Ramazan ayının başlanması, Ramazan bayramı, Qurban bayramı və digər dini mərasimlərlə bağlı məlumatlar Qafqaz Müsəlmanları İdarəsi və Nazirlər Kabinetinə təqdim edilib.
Ölkə.Az-ın məlumatına görə, Şamaxı Astrofizika Rəsədxanasının direktoru Əyyub Quliyev APA-ya deyib ki, yekun təkmilləşmə başa çatandan sonra Qafqaz Müsəlmanları İdarəsi (QMİ) Ramazan Ayının başlanması ilə bağlı fətva verəcək.
Onun sözlərinə görə, Ramazan ayının başlanmasını tarixinin açıqlanması yalnız QMİ-nin səlahiyyətinə aiddir. Bu il də idarə rəsədxana tərəfindən təqdim ediləcək hesablamalara və məlumatlara uyğun fətva verəcək.
Qeyd edək ki, bu il astronomik təqvimə əsasən, Ramazan ayının başlanmasını xəbər verən yeni Ay iyunun 16-sı saat 19:07-də təzələnəcək. Ramazan ayından sonra ayın təzələnməsi isə iyulun 16-da saat 06:26 dəqiqədə baş verəcək.
Avtobus sürücülərinə son xəbərdarlıq: — Özünüzü yığışdırın, yerinizi itirəcəksiniz!
15.05.2015
Avropa Oyunları ilə əlaqədar Nəqliyyat Nazirliyi paytaxtda sənişindaşıma ilə məşğul olan avtobus marşrutlarının sahiblərinə və sürücülərə xəbərdarlıq etdi.
Nəqliyyat Nazirliyinin Mətbuat katibliyinin rəisi Namiq Həsənov bildirib ki, bu gündən etibarən paytaxtda özbaşınalıq edən avtobus sürücüləri və onların sahiblərinə qarşı sərt tədbirlərin görülməsinə başlanacaq.
Onun sözlərinə görə, ümumiyyətlə, əvvəlki dövrə nisbətən ictimai nəqliyyatın işi bundan sonra daha mütəşəkkil qaydada tənzimlənəcək.
Ali məktəblərin bu ilki qəbul planı açıqlandı
15.05.2015
2015-2016-cı tədris ili üzrə ali məktəblərə bakalavriat səviyyəsinə tələbə qəbulu üçün 39500-ə qədər plan yeri nəzərdə tutulub.
Bunu Təhsil Nazirliyinin Aparat rəhbərinin müavini Yaqub Piriyev deyib.
Onun sözlərinə görə, qiyabi təhsil forması üzrə plan yeri isə ümumi qəbulun 4 faizindən az təşkil edir.
Önəmli qərar: Azərbaycan vətəndaşlarının xaricdə təhsili qaydaları müəyyənləşdi
15.05.2015
Azərbaycan hökuməti “Azərbaycan Respublikası vətəndaşlarının xarici ölkələrdə, əcnəbilərin və vətəndaşlığı olmayan şəxslərin Azərbaycan Respublikasında təhsil alması Qaydaları”nın təsdiq edilməsi haqqında qərar qəbul edib.
Nazirlər Kabinetindən bildiriblər ki, bu qaydalar Azərbaycan vətəndaşlarının xarici ölkələrin təhsil müəssisələrində, əcnəbilərin və vətəndaşlığı olmayan şəxslərin (bundan sonra – əcnəbilər) tabeliyindən və mülkiyyət formasından asılı olmayaraq təhsilin bütün pillə və səviyyələri üzrə Azərbaycan Respublikasının təhsil müəssisələrində, həmçinin ali təhsilin doktorantura səviyyəsi üzrə elmi tədqiqat müəssisələrində və tibb təhsilinin rezidentura səviyyəsi üzrə klinik bazalarında (bundan sonra – təhsil müəssisələri) təhsil almasına dair ümumi tələbləri müəyyən edir.
İqtidar və müxalifət növbəti dialoq keçirir
15.05.2015
Bu gün Bakıdakı Beynəlxalq Mətbuat Mərkəzində Azərbaycanda fəaliyyət göstərən bir qrup müxalifyönlü partiya sədrlərinin iştirakı ilə növbəti iqtidar-müxalifət görüşü keçirilir.
Ölkə.Az xəbər verir ki, APA-nın məlumatına görə, görüşdə iqtidar tərəfdən Azərbaycan prezidentinin ictimai-siyasi məsələlər üzrə köməkçisi, Prezident Administrasiyasının İctimai-siyasi məsələlər şöbəsinin müdiri Əli Həsənov, şöbənin müdir müavini Tahir Süleymanov, şöbənin sektor müdiri Elman Paşayev, Azərbaycan Sosial Rifah Partiyasının sədri Xanhüseyn Kazımlı, müxalifət tərəfdən isə Vətəndaş Həmrəyliyi Partiyasının sədri Sabir Rüstəmxanlı, Klassik Xalq Cəbhəsi Partiyasının sədri Mirmahmud Mirəlioğlu, Vəhdət Partiyasının sədri Tahir Kərimli, Böyük Quruluş Partiyasının sədri Fazil Mustafa, BAXCP baş katibi Zöhrab Abdullayev, Azərbaycan Demokratik İslahatlar Partiyasının sədri Asim Mollazadə, Vətəndaş və İnkişaf Partiyasının sədri Əli Əliyev, ADP sədri Sərdar Cəlaloğlu, Böyük Azərbaycan Partiyasının sədri Elşad Musayev, Ədalət Partiyasının sədri İlyas İsmayılov, Azərbaycan Sosial Demokrat Partiyasının sədri Araz Əlizadə, Azadlıq Partiyasının sədri Əhməd Oruc, Azərbaycan Milli İstiqlal Partiyasının sədri Yusif Bağırzadə, Aydınlar Partiyasının sədri Qulamhüseyn Əlibəyli, Milli Dirçəliş Hərəkatı Partiyasının sədri Fərəc Quliyev iştirak edir.
İnquşetiyanın başçısı Şeyxə orden verdi
15.05.2015
Rusiya Federasiyası İnquşetiya Respublikasının başçısı Yunusbek Yevkurov Qafqaz Müsəlmanları İdarəsinin sədri Şeyxülislam Allahşükür Paşazadəni “Fəal ictimai-siyasi və dini-maarifçi fəaliyyətinə görə” RF İnquşetiya Respublikasının “Xidmətlərə görə” ordeni ilə təltif edib.
Ölkə.Az Qafqaz Müsəlmanları İdarəsinin məlumatına istinadla xəbər verir ki, təltifetmə mərasimi İnquşetiya Respublikasının Maqas şəhərində keçirilən «Dində mötədillik – sülh, dinc qonşuluq və tərəqqiyə gedən yoldur» mövzusunda keçirilən Beynəlxalq İlahiyyat Konfransında baş tutub.
Ramil Usubov Avropa Oyunlarını 24 mindən çox polislə mühafizə edəcək
14.05.2015
Daxili işlər naziri, general-polkovnik Ramil Usubov mayın 14-də BP şirkətinin Azərbaycan, Gürcüstan və Türkiyə üzrə regional prezidenti Qordon Birrelliniqəbul edib.
DİN-in mətbuat xidmətindən Ölkə.Az-a verilən məlumata əsasən, nazir Böyük Britaniya ilə Azərbaycan arasında ikitərəfli əlaqələrin bir çox sahələrdə uğurla inkişaf etdiyini bildirib.
Azərbaycanda müəllim olmaq istəyənlər üçün qiyabi təhsil ləğv olundu
14.05.2015
Bu ildən Azərbaycanın ali məktəblərində müəllimlik ixtisaslarına qiyabi təhsilalma forması üzrə tələbə qəbulu dayandırılır.
Bunu Təhsil Nazirliyindən Trend-in sorğusuna cavab olaraq bildiriblər.
Nazirlikdən qeyd edilib ki, yeni tədris ili üçün ali təhsil müəssisələrində bakalavriat səviyyəsinə qiyabi təhsilalma forması üzrə plan yerlərinin sayı azaldılıb.
“Müsavat”da “yarpaq tökümü”
14.05.2015
“Müsavat” Partiyası Xətai rayon təşkilatının bir bir qrup üzvü bəyanat yayıb.
Ölkə.Az xəbər verir ki, APA-ya daxil olan bəyanatda deyilir:
“Biz, Müsavat Partiyası Xətai rayon təşkilatının bir qrup üzvü partiyanın VIII qurultayını və qurultaydan sonra partiya daxilində baş verən antidemokratik fəaliyyəti, verilən qərarları böyük narahatlıq, səbr və dözümlə izlədik. Düşündük ki, partiya rəhbərliyi buraxılmış səhvlərdən, edilən tənqidlərdən düzgün nəticə çıxararaq özünün qeyri-legitimliyi haqqında şübhələri dağıtmaq üçün təşkilat daxilində sabitliyi qoruyacaq, qurultay zamanı və sonra baş vermiş hüquq pozuntularını aradan qaldıracaqdır. Amma gözlədiklərimizin əksi olaraq rəhbərlik nizamnamədən kənar fəaliyyətini davam etdirərək partiyadaxili siyasətə qarşı edilən tənqidlərdən nəticə çıxartmadı.
Gömrükdə 3 rəis işdən çıxarıldı
13.05.2015
Dövlət Gömrük Komitəsinin (DGK) sədri Aydın Əliyev üç rayonun gömrük idarəsinin rəisini işdən çıxarıb.
DGK-dakı mənbələrdən verilən məlumata görə, vəzifəsini itirənlər Astara, Xaçmaz və Biləsuvar rayonlarının gömrük idarələrinin rəisləridir.
Burada ən maraqlı məqam işdən çıxarılan hər üç rəisin Naxçıvanın Nehrəm kəndindən olmasıdır (bu kəndin ən məşhur sakinlərindən biri olan iş adamı Hacı İbrahim Nehrəmli də bu gün saxlanılıb).
Aydın Əliyevin üç rayonun gömrük idarəsinin rəisini işdən azad etməsinin səbəbləri hələlik bilinmir.
Təhsil Nazirliyi: Avropa Oyunları ölkəmizdə təhsil alan əcnəbilərin sayının artmasına səbəb olacaq
13.05.2015
"I Avropa Oyunlarının Azərbaycanda keçirilməsi ölkəmizdə təhsil alan əcnəbilərin sayının artmasına səbəb olacaq".
Bu barədə Təhsil Nazirliyindən bildiriblər.
Nazirlikdən qeyd edilib ki, Avropa Oyunlarının Azərbaycanda keçirilməsi ümumilikdə ölkəmizin bütün dünyada tanınmasına töhfə verəcək: “Bu da öz növbəsində, ölkəmizdə təhsil alan xarici ölkə vətəndaşlarının sayının artmasına müsbət təsir göstərəcək”.
Fələstin səfiri: Avropa Oyunları Azərbaycanın dinamik inkişafını təsdiq edir
13.05.2015
"Bakıda I Avropa Oyunlarının keçirilməsi Azərbaycanın öz dinamik iqtisadi və sosial inkişafında nə qədər irəli getdiyini təsdiq edir, eləcə də Azərbaycanın müstəqillik əldə etməsindən etibarən müxtəlif sahələrdə qazandığı tərəqqi və uğurlardan xəbər verir".
Bunu Fələstinin Azərbaycandakı səfiri Nasir Əbdül Kərim deyib.
Onun sözlərinə görə, Azərbaycanı belə vacib tədbir keçirən gənc dünyəvi dövlət qismində görməkdən xoşbəxtdir.
I Avropa Oyunları ilə əlaqədar parklama xəbərdarlığı
13.05.2015
Bu gün I Avropa Oyunları ilə bağlı narahatlıq doğuran ən ciddi məsələ Bakı yollarında tıxac və avtomobillərin parklanması problemidir.
TBu fikir Azərbaycan Dövlət Televiziyasının (AzTV) “Əsas məsələ” proqramının I Avropa Oyunları ilə bağlı nəqliyyat və təhlükəsizlik məsələlərinin həllinə həsr olunmuş buraxılışında çıxış edən dövlət qurumlarının yüksək vəzifəli rəsmiləri tərəfindən səsləndirilib.
Nəqliyyat nazirinin müavini Musa Pənahov bildirib ki, yollarda avtomobillərin qanunsuz park edilməsi ciddi narahatlıq doğurur: “Ən böyük problemlərdən biri avtomobillərin yollarda atılıb gedilməsidir, yəni parklama məsələləridir. Ona görə maksimum dərəcədə çalışıb parklama yerlərindən istifadə etmək lazımdır”.
DİN-dən əminlik: I Avropa Oyunlarında təhlükəsizlik tam təmin ediləcək
13.05.2015
Cəsarətlə deyə bilərəm ki, bu gün DİN-in bütün əməkdaşları Daxili Qoşunlarla birlikdə, digər hüquq-mühafizə orqanları ilə əlaqəli, eləcə də Nəqliyyat Nazirliyi ilə inteqrasiya sayəsində I Avropa Oyunları ilə bağlı tədbirlərin keçiriləcəyi ərazilərdə təhlükəsizliyə tam nəzarət edirlər. Əmin edirəm ki, bu gün bizim üçün ictimai asayişin mühafizəsində elə bir təhlükəli vəziyyət gözlənilmir. Əgər hər hansı hadisə baş verərsə də, hər bir əməkdaş bunun qarşısını almaq üçün qabaqlayıcı tədbirlər görməyə və onu aradan qaldırmağa hazırdır.
Hacı İbrahimin həbs xəbəri yayıldı
13.05.2015
Bu gün səhər yayılan məlumatlara görə, “Avesta” konserninin rəhbəri, tanınmış iş adamı Hacı İbrahim Nehrəmli saxlanılıb.
Ölkə.az vinegret.az saytına istinadən xəbər verir ki, dünən gecə Azərbaycanın ən zəngin iş adamlarından biri Hacı İbrahim Nehrəmli həbs olunub.
Saytın yazdığına görə, iş adamı bu gecə hüquq-mühafizə orqanlarının əməkdaşları tərəfindən saxlanılıb.
Yayılan bu məlumatı Hacı İbrahimin layihəsi olan “Xəzər İsland”da çalışan məsul şəxslərdən biri təsdiqləyib. O, AzNews.az-a bildirib ki, hər gün adalarda olan Hacı İbrahim bir neçə gündür ki, iş yerinə baş çəkmir: “Dünən axşam isə eşitdik ki, onu həbs ediblər”.
Bir həftə əvvəl işdən çıxarılan yüksək vəzifəli şəxs saxlanıldı
12.05.2015
“Azİmport” şirkətinin sahibi Rəşad Məmmədov və onun şirkətdəki şəriki Azər Əsgərov bu gün saxlanılıblar.
“Azİmport”dakı mənbələrdən verilən xəbərə görə, mülki geyimli şəxslər bu gün şirkətin ofisinə gedərək hər iki şəxsi saxlayıblar.
Məlumata görə, həmin mülki geyimlilər bir müddətdən sonra Azər Əsgərovla birlikdə şirkətin ofisinə qayıdıblar. Onlar ofisdən zəruri sənədləri götürərək A.Əsgərovla birgə yenidən naməlum istiqamətə gediblər.
"Avropa Oyunları zamanı nəqliyyat xidmətləri yüksək səviyyədə göstəriləcək"
12.05.2015
I Avropa Oyunları zamanı nəqliyyat xidmətlərinin göstərilməsi ən yüksək səviyyədə həyata keçiriləcək.
Bunu nəqliyyat nazirinin müavini Musa Pənahov deyib.
Onun sözlərinə görə, bu tədbirin yüksək səviyyədə təşkili üçün yol infrastrukturu, o cümlədən, Olimpiya məkanlarına gedən yollar, dayanacaqlar yenidən qurulub: “Eyni zamanda, oyunlar zamanı sərnişinlərə daha yüksək səviyyədə xidmət göstərmək üçün yeni nəqliyyat vasitələri də gətirilib. Tədbirdə iştirak edən idmançılara və onlara bərabər tutulmuş heyətə, qonaqlara, vətəndaşlarımıza xidmət göstərən müasir avtobuslar şəhərdə fəaliyyətə başlayacaqlar”.
İcra başçısının oğluna hökm oxundu — 5 il 6 ay həbs
12.05.2015
Bu gün Bakı Ağır Cinayətlər Məhkəməsində Səbail rayon icra başçısı Asif Əsgərovun oğlu İlham Əsgərli və "McDonalds Azərbaycan"ın sədri Maqsud Mirzəyevin oğlu Sənan Mirzəyevin düşdüyü qəza ilə bağlı hökm oxunub.
Məlumata görə, hakim Ramella Allahverdiyevanın sədrliyi ilə keçirilən iclasda 17 yaşlı İlham Əsgərli 5 il 6 ay, yük avtomobilinin sürücüsü Əhliman Süleymanov isə 6 il müddətinə azadlıqdan məhrum edilib.
İlham Əsgərli və Əhliman Süleymanov məhkəmə zalında həbs edilib.
Yer kürəsində 1 həftə davam edəcək maqnit qasırğaları başlayır
11.05.2015
Sabahdan etibarən Yer kürəsində maqnit qasırğaları gözlənilir.
Ölkə.Az xəbər verir ki, Şamaxı Astrofizika Rəsədxanasının Günəş və Günəş-Yer əlaqələri şöbəsinin müdiri Namiq Cəlilov APA-ya açıqlamasında deyib ki, 1 həftə davam edəcək qasırğanın gücü zəif olacaq.
Onun sözlərinə görə, maqnit qasırğalarının gücü J1-dən J9-a qədərdir: “Yaxın günlərdə müşahidə ediləcək maqnit qasırğaları J1 gücündə olan zəif qasırğalar olacaq.
Azərbaycan və Türkiyə ordusunun hərbi təlimləri başlayır
11.05.2015
Azərbaycan və Türkiyə ordusu bu gündən hərbi təlimlərə başlayır.
Ölkə.az-ın Türkiyə Genelkurmay başkanlığının (Baş Qərargahın) rəsmi saytına istinadən verdiyi məlumata görə, hərbi təlimlər mayın 11 – 15-də Naxçıvanda və Bakıda baş tutacaq.
Məlumatda bildirilir ki, hərbi təlimlərin məqsədi Türkiyə və Azərbaycan Quru Qoşunları arasında dostluq, əməkdaşlıq və koordinasiyanın inkişafı, qarşılıqlı məlumat və təcrübə mübadiləsi həyata keçirərək və birgə hərbi fəaliyyəti inkişaf etdirməkdir.
Ölkə.az
