Binanın yanmasına səbəb olan "penoplast" üzlük nədir?
Artıq Bakıda uzun müddətə başa gələn, ancaq keyfiyyətli olan daş örtükləri fasada eyni görünüşü verən, lakin yanğına çox həssas olan penoplast örtüklər əvəzləməyə başlayıb.
Materialı Azərbaycanda bir çox şirkət o cümlədən "Qlobal Konstrakşn - Global Construction" şirkəti hazırlayır. Şirkətin Bakının Binəqədi Rayon İcra Hakimiyyətinin başçısı Xaləddin İsgəndərova aid olduğu haqqında gəzən söz-söhbətin əsassız olmadığına rayon ərazisindəki yaşayış binalarına baxsaq kifayətdir.
Elə bu gün Binəqədi rayonu, Azadlıq prospekti 200/36 ünvanında 16 mərtəbəli binada baş verən misli görünməmiş yanğına da bu penoplast üzlük səbəb olub. Klassik fasad üçün yüngül, ucuz və tez başa gələn bu material hamıya tanışdır. Adətən televizor alanda qoruyucu ağ baloncuqlardan ibarət olan materialla küncləri bərkidilmiş olur. Penoplast həmin materialdır. Artıq tikinti sektoruna da girən bu material həm, fasad örtükləri, həm mərtəbələr arası örtüklər həm də dam örtüyü kimi istifadə olunur.
Bu fasad örtüyünün demək olar ki, əksər ölkələrdə qadağan edildiyi hər kəsə bəllidir. Lakin Bakının bir çox rayonlarında, ən çox da Binəqədi rayonu ərazisindəki binaların bir çoxunda bu keyfiyyətsiz üzlüklərin olması bu günkü kimi yanğın hadisələrinə səbəb yaradan ən böyük amildir. İcra başçısının binaların fasadına bu üzlüyün çəkilməsində isə xüsusi marağı var - yuxarıda qeyd etdiyimiz şirkətinin bu materialı istehsal etməsi. Yəni özü alır, özü bişirir, özü də "yeyir".
Ancaq bu dəfəki "yemək" boğazında qalacaq kimi görsənir. Çünki ortada onlarla can itkisi var.
Qiymət baxımından çox sərfəli olan və 3 manatdan olan bu üzlüklərin neçə manatdan sənədləşdirilməsi isə növbəti yazımızda olacaq.
Penoplastın necə və nədən hazırlandığına aid fotoları təqdim edirik.
Ölkə.Az