Qurban Azərbaycanda düzgün yerinə yetirilirmi?

Qurban İslam dininin iki vacib bayramlarından biridir. Bu bayramın hikməti insanlara Allaha yaxınlaşmağı öyrətmək və zəngin insanların səxavətini yoxlamaqdır. 

Qurban bayramının Azərbaycanda şəriətə uyğun yerinə yetirilib-yetirilmədiyinə gəlincə isə, bu məsələni Ölkə.az-a ilahiyyatçı Rəsul Mirhəşimli şərh etdi:

- Qurbanı kimlər kəsməlidir?

- Qurban kəsmək yalnız həcc ziyarətində olanlara vacib olan əməldir. Həcdə olmayanın qurban kəsməsi vacib sayılmır. Amma bu, qurban kəsmək olmaz anlamına da gəlmir. Kimlərin qurban kəsməyə imkanı var, onlar qurban kəsməlidir. Yəni borca girməklə qurban kəsmək düzgün deyil.

- Şərikli qurban kəsmək olarmı?

- Qoç kəsən adamlar bunu tək yerinə yetirir, yəni haqqını təkbaşına ödəyir. Amma böyük baş heyvanlar kəsildikdə, insanlar bir neçə nəfər yığışıb, şərik qurban kəsə bilərlər.

- Qurbanlıq heyvanın ətinin neçə hissəsi paylanmalıdır?

- Qurbanlıq heyvanın əti üç hissəyə bölünür. Onun üçdə biri qurbanı kəsən tərəfindən götürülür, üçdə biri qohum-qonşulara verilir, geridə qalanı hissəsini isə ehtiyacı olan insanlara paylanır. Bu bayramda qurbanlıqlar yalnız Allahın adına kəsilir. Yəni nəzir-niyyət olaraq qurban kəsmək olmaz.

Səxavət Məmməd

Ölkə.az