Azərbaycançılıq ideologiyası - bizi birləşdirən dəyər

“Bu gün bütün dünyada qloballaşma prosesi gedir. Qloballaşma prosesinin müsbət cəhətləri ilə yanaşı mənfi cəhətləri də mövcuddur. Bu prosesdə hansı xalq daha güclü olacaqsa, o xalq da prosesdən uduşla çıxacaq. Öz milli-mənəvi, tarixi, dini dəyərlərini qoruyub saxlayaraq gələcək nəsillərə ötürəcək. Belə bir vəziyyətdə Azərbaycanın qarşısında duran mühüm məqsədlərdən biri qlobal inteqrasiya prosesində qabaqcıl dövlətlərlə ayaqlaşmaq və bu zaman Azərbaycan xalqının milli zənginliyini dünyaya layiqincə təqdim etmək, milli-mənəvi dəyərlərimizin mütərəqqi dünya dəyərlərilə üzvi sintezinə nail olmaqdır”.

Bunu “Ölkə.Az”a açıqlamasında deputat Aydın Hüseynov azərbaycançılıq ideyasının təbliği ilə bağlı mövqeyini açıqlayarkən deyib. 

Onun fikrincə, azərbaycançılıq ideologiyası kimliyindən, siyasi mövqeyindən və baxışından asılı olmayaraq hamımızı birləşdirən əsas dəyər olmalıdır.

“Məhz xalqın bütün kəsimlərinin həmrəyliyinə nail olmaqla milli inkişaf yolumuzu təmin edə bilərik”, - o qeyd edib.

Deputat əlavə edib ki, bu gün Azərbaycanda qədim dövrlərdən başlayaraq bugünümüzə qədər Azərbaycan xalqının adət-ənənələrini, milli-mənəvi dəyərlərini, polietnik zənginliyini özündə yaşadan və birləşdirən baxışlar sistemi kimi azərbaycançılıq ideyası təşəkkül tapıb: “Azərbaycan tarixən çoxmillətli ölkə, milli və dini tolerantlığın bərqərar olduğu məkan kimi tanınıb və bu üstün cəhətlər azərbaycançılıq məfkurəsinin əsasını təşkil etmişdir. Xalqımızın böyük mütəfəkkirlərinin, dövlət adamlarının, ictimai xadimlərinin fəaliyyətində bu ideya zaman-zaman özünü göstərib. Lakin birmənalı şəkildə qeyd edə bilərik ki, azərbaycançılığın ümummilli ideya halına gəlməsi, bütün dünya azərbaycanlılarını birləşdirən məfkurəyə, müstəqil Azərbaycan dövlətinin ideya əsasına çevrilməsi məhz Heydər Əliyevin tarixi xidmətidir. Heydər Əliyev 1993-cü ildə hakimiyyətə qayıtdıqdan sonra Azərbaycanın müstəqilliyini möhkəmləndirməklə, onun güclü dövlətçilik xəttini, siyasi-iqtisadi əsaslarını yaratmaqla yanaşı, Azərbaycan xalqının milli inkişafının ideya təməli ola biləcək konsepsiyanın - azərbaycançılığın banisi olmuşdur.  

Ulu öndər Heydər Əliyevin azərbaycançılığı ümummilli ideologiya olaraq irəli sürməsi onun Azərbaycan dövlətçiliyi naminə göstərdiyi tarixi xidmətdir. Məhz azərbaycançılıq Azərbaycana qarşı bir çox istiqamətlərdən yönələn təhdidlərin, ölkəmizi etnik bölücülük əsasında parçalamaq cəhdlərinin qarşısında güclü ideoloji və siyasi sipər oldu. Çünki azərbaycançılıq bizim keçmişimizdən gələn dəyər olaraq vahid Azərbaycanın ideya əsası, ölkədə bütün konfessiya və etnosların həmrəylik və anlaşma içində birgəyaşayışının tarixi təcrübəsidir.

Heydər Əliyev öz çıxışlarında belə bir fikir səsləndirib: “Azərbaycan əhalisinin çoxmilli tərkibi bizim sərvətimizdir, üstünlüyümüzdür. Azərbaycanın ən başlıca sərvətlərindən biri qədimlərdən bu torpaqda yaşayan, öz taleyini, öz həyatını bu torpağa bağlayan müxtəlif dinlərə etiqad edən adamlardır. Biz bunu qiymətləndiririk və saxlayacağıq. Dövlət, ölkə nə qədər çox xalqı birləşdirsə, bir o qədər zəngin olur, çünki onların hər biri ümumdünya mədəniyyətinə və sivilizasiyasına öz töhfəsini verir. Azərbaycan onun ərazisində yaşayan bütün millət və xalqların ümumi vətənidir. Azərbaycanlı sözü bizi həmişə birləşdirib”.

Azərbaycançılıq ideologiyası, bir tərəfdən, Azərbaycan türklərinin ölkədəki digər etnik qruplara tolerant münasibətinin, sülh içində yaşamaq istəyinin bariz göstəricisidirsə, digər yandan, Azərbaycanın türk dünyasının ayrılmaz parçası olduğunun təsdiqidir. Odur ki azərbaycançılığı realist milli inkişaf modeli olaraq qəbul edən Azərbaycan türk dövlətləri arasında da bəlağət və pafosdan uzaq, səmimi və qarşılıqlı faydalı tərəfdaşlıqdan yana olduğunu daima nümayiş etdirir.

Ulu öndər tərəfindən əsası qoyulan bu siyasət son 18 ildə cənab Prezident İlham Əliyev tərəfindən uğurla həyata keçməkdədir. Prezident İlham Əliyevin rəhbərliyi altında, dövlət siyasətinin bütün sahələrində olduğu kimi, azərbaycanlı diasporunun güclənməsi, azərbaycançılığın ümummilli ideologiya olaraq möhkəmlənməsi istiqamətində ardıcıl addımlar atılır.

Cənab Prezident İlham Əliyev hələ 2006-ci ildə  dünya azərbaycanlılarının II qurultayında çıxışı zamanı deyib: “Biz hər istiqamətdə çox sürətlə, düşünülmüş proqram və konsepsiya əsasında irəliləyirik. Bu işdə Azərbaycan diasporunun böyük rolu var. Mən istəyirəm ki, həm Azərbaycanın dünyada təbliğ edilməsində, Azərbaycan həqiqətlərinin dünya birliyinə çatdırılmasında, azərbaycanlıların yaşadıqları ölkələrin ictimai-siyasi həyatında fəal iştirakında bu rol daha da güclü olsun. Bu, bizim mövqelərimizi möhkəmləndirir. Biz 50 milyonuq. Bu, dünya miqyasında böyük xalqdır. Çalışmalıyıq ki, doğma Vətənimizi möhkəmləndirək, zənginləşdirək, qüdrətli dövlətə çevirək”.            

Onu da xüsusi ilə qeyd etmək lazımdır ki, bu gün cənab Prezidentin azərbaycançılıq ideyasının təbliğində, uğurla icra olunmasında Birinci vitse-prezident Mehriban xanım Əliyevanın,  Heydər Əliyev Fondunun birinci vitse-prezidenti Leyla xanım Əliyevanın müstəsna rolunu, xidmətini qeyd etmək lazımdır. Birinci vitse-prezident Mehriban xanım Əliyeva və  Heydər Əliyev Fondunun birinci vitse-prezidenti Leyla xanım Əliyeva çox ciddi fəaliyyət göstərirlər. Məhz bu fəaliyyətin bariz nəticəsidir ki, xalq bir yumruq kimi cənab Prezident İlham Əliyevin və hakimiyyətin ətrafında sıx biləşərək, qarşımızda duran problemlərin həllində ölkə başçısına dəstək verir, onun yürütdüyü siyasəti birmənalı şəkildə dəstəkləyir. Elə bu fəaliyyətin nəticəsində bu gün Azərbaycan qarşısında duran bir nömrəli problem olan Qarabağ  münaqişəsini həll edib, yağı düşməni torpağımızdan silib atdı”.

Deputat onuda bildirib ki, bundan sonra da  dünyada yaşayan  hər bir azərbaycanlı Azərbaycan dövlətinin, dövlətçiliyinin güclənib, qüdrətlənməsi, xalqımızın gələcək rifah halında yaşaması  naminə  azərbaycançılıq ideologiyasının bizi birləşdirən meyar olmasını əsas tutaraq, buna uyğun əməli fəaliyyət göstərməliyik. 

“Ancaq milli birliyi, həmrəyliyi təmin etməklə  üzləşdiyimiz bütün çətinlikləri dəf edə bilərik. Biz ancaq bu yolla qloballaşma prosesinin mənfi xüsusiyyətlərini dəf edib, dünyanın böyük  tarixə malik bir xalqı kimi qalib çıxa bilərik”.

Deputat Ramin Həsən isə qeyd edib ki, biz hər birimiz bir vətəndaş kimi azərbaycançılıq ideologiyasının inkişafında iştirak etməliyik: “Hər birimizin əsas vəzifəmiz, işimiz azərbaycançılıq ideologiyasına xidmət etməkdən ibarət olmalıdır. Bütün sahələrdə  bu istiqamətdə fəaliyyət göstərməliyik. Bu istər mədəniyyət, istər ədəbiyyat, istər musiqi, istər kino, istər elm və digər sahələrdə də gördüyümüz bütün işlərdə özünü göstəməlidir”.

Deputat əlavə edib ki, Ulu öndər Heydər Əliyev hakimiyyətə gəldikdən sonra milli ideologiyanın təməlini müəyyən edərkən, bütün insanları bir arada tuta biləcək, milli şüurun formalaşmasında  güclü rol oyanaya biləcək  azərbaycançılıq ideyasının, məfkurəsinin  önə çıxması ilə bağlı atmış olduğu tarixi, misilsiz addımlar heç şübhəsiz ki, bu gün Azərbaycan prezidenti cənab İlham Əliyev tərəfindən çox uğurlu şəkildə həyata keçirilməkdədir. Milli şüura, məfkurəyə sahib gənc nəslin yetişdirilib, formalaşdırılması, vətənpərvərlik ruhunun aşılanması istiqamətində atdığı addımlar və siyasətinin bu gün canlı şahidləriyik. Məhz bu siaysətin nəticəsidir ki, Azərbaycan Zəfər qələbəsini qazanıb.  Azərbaycançılıq ideologiyasına sadiq qalan gənclərimiz bu gün canlarından keçib şəhidlik zirvəsinə yüksəlməklə, qazi olaraq erməni faşistlərini torpağımızdan təmizləyərək, azad edib, ərazi bütövlüyümüzü təmin ediblər. Odur ki, milli ideologiya, milli şüur və məfkurə nə qədər güclü olarsa, bu, dövlətimizin daha da güclü inkişaf etmiş  dövlətə və xalqımızın xoş firvəan həyat sürməsi istiqamətində böyük bir töhfə olar.Ancaq bu yolla bütün dünyaya öz kimliyimizi bəyan edə bilərik. Necə ki, 202-ci ilin sentyabrında Qurtuluş savaşı zamanı sübut etdik.Azərbaycanın gələcək inkişafını və uğurlaırnı təmin etmək üçünsə Azərbaycanı sevənlər azərbaycançılıq ideologiyası ətrafında sıx birləşməlidir. Azərbaycanı sevmək, onun tarixini, dilini, torpağını sevib təbliğ etməkdir, küll halında azərbaycançı olmaqdır. Biz bu ölkənin var olmasını, bu mədəniyyətin yaşamasını istəyiriksə, hamımız birmənalı şəkildə azərbaycançılıq ideyasının, ideologiyasının təbliğatçısı olmalıyıq”.

Deputat onu da bildirib ki, azərbaycançılıq ideologiyasının təməllərini nə qədər dərindən öyrənsək uğurlarımız bir o qədər çox olar: “Təbii ki, şüarlarla deyil, işimizlə, əməlimizlə, davranışımızla, millətimizə, dövlətimizə xidmətimizlə. Öz mədəniyyətimizlə, dilimizlə, tariximizlə, əxlaqımızla, milli-mənəvi dəyərlərimizlə böyük dünya mədəniyyətinin bir hissəsinə çevirilməyi bacarmalıyıq və işimizi bu istiqamətdə qurmalıyıq. Bu gün bütün dünya azərbaycanlılarının – dünya türklərinin artıq şüarına çevrilən bir fikir var. Azərbaycanın dövlət müstəqilliyinin qorunub saxlanmasında müstəsna xidmətləri olan Heydər Əliyevin “Bir millət, iki dövlət” fikri bütün türk xalqlarının bütövlüyünü və birliyini nəzərdə tutur.

Beləliklə, azərbaycançılıq ideologiyası milli dövlətçiliyimizin inkişafında mühüm rola malikdir. Başqa sözlə, azərbaycançılıq dünya azərbaycanlılarını milli maraqlarımız ətrafında birləşdirməklə yanaşı, milli-mənəvi dəyərlərimizin qorunması və inkişafında vacib faktor kimi çıxış edir”.

Mürtəza
Ölkə.Az

QEYD: Bu material MEDİA Agentliyinin maliyyə yardımı əsasında "azərbaycançılıq ideologiyası bizi birləşdirən əsas dəyərdir" mövzusu ilə əlaqədar dərc olunub.