Azərbaycanda məişət zorakılığı mövzusunda keçirilən beynəlxalq təlim yekunlaşıb

"Ölkə.Az" xəbər verir ki, təlimin qapanış mərasimində Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, BDU-nun rektoru Elçin Babayev, MEDİA agentliyininin nümayəndəsi iştirak edib.

Tədbirdə çıxış edən S.Qəhrəmanova məişət zorakılığı mövzusunun hər zaman aktual olduğunu bildirib. O, əlavə edib ki, bu istiqamətdə Komitə rəsmiləri əvvəlcə Litva və Avstriyaya səfər edərək xarici təcrübəni öyrənib.

S.Qəhrəmanovanın sözlərinə görə, məişət zorakılığının qarşısının alınması ilə bağı işlər təkcə dövlətin yox, həm də cəmiyyətin işidir:
“Məişət zorakılığı çox həssas və ictimai bir mövzudur. İnsanlar bəzən elə düşünür ki, bu, dövlətin işidir. Amma bu tək dövlətin işi deyil. Məişət zorakılığı ailədə olur. Qohumlar, ailə üzvləri, məktəb yoldaşları narahatlığı hiss edirlərsə durmamalı və aidiyyəti orqanlara məlumat verməlidirlər. Məsələn biz bələdiyyələrlə işləyirik. Onlar bilavasitə əhalinin içərisində olurlar. Bütün bələdiyyələrdə gender və məişət zorakılığı komissiyalarının yaradılması prosesi gedir. Bu gün praktiki olaraq tədbirlər həyata keçirir. Litva və Avstriya təcrübəsini öyrəndik ki, onlarda daha çox bələdiyyələr işləyirlər. Orada bələdiyyələr ailələri təhlil edirlər ki, ailələrin hansı risk qruplarına aiddir və s.”

Sədr müavini deyib ki, hazırda pilot layihə kimi Sabunçu rayonunda gender və uşaqlara qarşı zorakılıq üzrə monitorinq qrupu yaradılıb:
“Sabunçu RİH icra müavini bu qrupun rəhbəridir. Qrupda QHT rəhbərləri, polis işçiləri və digər aidiyyəti qurumların nümayəndələri təmsil olunub. Ümumiyyətlə, bu istiqamətdə tədbirlər məişət zorakılığı baş verən halda keçirilir. Lakin bu halın baş verməməsi üçün qabaqlayıcı tədbirlərin keçirilməsi çox vacibdir. Bələdiyyələr risk qruplarını müəyyənləşdirib onlarla işləməlidir ki, zorakılıq baş verməsin. Əhalinin sayına görə məişət zorakılığı o qədər də yüksək səviyyədə deyil amma inkişaf edir. Ən çox zorakılığıa məruz qalanlar uşaqlardır. O mühitdə yetişən uşaqlar psixoloji cəhətdən zəif və ya aqressiv insan kimi formalaşır. Litvada bütün regionlarda məişət zorakılığına məruz qalan uşağı ayırırlar və onunla məşğul olurlar.
Bəzən informasiya elə gedir ki, o situasiyada olan ailəyə və eyni halı yaşayan başqa şəxs düşünür ki, o da başını kəssə, öldürsə, situasiya bitəcək. Oxucuları və dinləyiciləri düşündürmək və bu əməllərdən çəkindirmək lazımdır. Məişət zorakılığına məruz qalan şəxsi reklam etmək lazım deyil”.

Rektor E.Babayev isə məişət zorakılığının məişət səviyyəsində baş verən anlaşmazlıqlar səviyyəsinə enəcəyinə və yavaş-yavaş bitəcəyinə ümidini ifadə edib.

Sonda təlim iştirakçılarına sertifikatlar təqdim olunub.