Azərbaycanda həkim tanınmış jurnalisti hədələdi: \"Sənin başını kəsdirərəm\"

Azərbaycanda həkim xəstə yaxını ilə valideyni ilə qeyri-etik formada rəftar edib.

Ölkə.Az xəbər verir ki, bu barədə tanınmış jurnalist Elşad Paşasoy paylaşım edib. O bildirib ki, uşağın səhhətində yaranmış problemlərlə əlaqədar ailənin tanığı pediatr Milli Hematologiya və Transfuziologiya Mərkəzinə müraciət etməyi məsləhət görüb.

Fotoda Elşad Paşasoy

Jurnalistin dediyinə görə, Ələmşah Əliyev adlı həkimə övladı ilə bağlı sual ünvanlasa da, həkim dəstəyi üzünə asıb:

"Ehtiramla müraciət etdiyim həkimdən “nə məsləhət görürsünüz, uşağı təkrar müayinə üçün Milli Hematologiya və Transfuziologiya Mərkəzinə gətirimmi, soruşanda od götürdü. Sən hara zəng edibsən? Bilmirsənmi mən orada işləmirəm?"

E.Paşasoy deyib ki, o növbəti dəfə həkimə zəng edəndə Ə.Əliyev onu hədələyib:

"Doğrusu, çox pis təsir etdi. Təkrar yığdım ki, bəs siz həkimsiniz, vətəndaşa bu nə münasibətdir? Açdı “gül” ağzını: “axmaq”, “sənin başını kəsdirərəm, bilirsən mən kiməm?” Valideynlərimi təhqir etdi. Yəni belə bir əxlaq sahibi"- o qeyd edib.

Jurnalist məsələ ilə əlaqədar Tibbi Ərazi Bölmələrini İdarəetmə Birliyinə də müraciət etdiyini söyləyib.

"Milli Hematologiya və Transfuziologiya Mərkəzindən öyrəndik ki, elə o cür davranışlarına görə həkim artıq bir ildən çoxdur orada işləmir", - o əlavə edib.

Billurə Yunus