Yolu kriminaldan keçmiş tanınmış meyxanaçılar

Meyxanaçı Vahid Qədimin axtarışda olduğu haqda xəbərlər yayıldı.

Xatırladırıq ki, bir müddət öncə isə daha bir məşhur meyxanaçı Bayram Kürdəxanılı da həbs edilmişdi.

Ötən əsrin sonlarına yaxın xalq folkroru olan meyxana inkişaf edərək populyarlıq qazandı. Bir zamanlar içib, "mal"dan vurub tində-bucaqda deyilən kimi tanınan meyxana artıq elit səviyyəyə gəib çıxıb və böyük bir inkişaf yolu keçib. İş o yerə gəlib çıxıb ki, hətta dövlət tədbirlərində də meyxana deyənlərə söz verilir. Bir neçə il ANS kanalında "De gəlsin" adlı meyxana müsabiqəsi də təşkil edilmişdi.

Ancaq meyxana elit səviyyəyə gəlib çatsa da meyxanaçlar haqqında fikirlər demək olar ki, dəyişməyib. Adlarını çəkmək istəmirəm, ancaq hamı hansı meyxanaçının hansı narkotik maddədən istifadə etdiyini çox yaxşı bilir.

Təsadüfi deyil, Bayram Kürdəxanılı saxlanılanda bildirdi ki, "22 yaşımdan, nəşə çəkirəm. Məclislərdə mənə narkotik təklif edirlər ki, təbim gəlsin". Məncə bu cümlə hər şeyi deyir. Bunu Bayram Kürdəxanılı etiraf etməsə də bilirdik ki, meyxanaçıların böyük əksəriyyəti nəşə çəkib sonra "deyir". Nəşə meyxanaçılar arasında bir növ "təb gətirən" dərman kimi istifadə edilir.

Ümumiyyətlə nəşənin "təb gətirməsi" məsələsi təkcə meyxana ilə bağlı deyil. Çox tanınmış sənətkarlarımız belə təb üçün nəşədən istifadə edib, edir...

Hətta məclislərdə maraqlı müqayisələr də yaranır, "Bax buna nəşədən əvvəl gör necə ifa edirdi, nəşədən sonra gör nələr edir..."

Bayram Kürdəxanılının həbsinin üzərindən bir müddət keçməmiş daha bir məhşur meyxanaçı, Vahid Qədimin axtarışda olduğu ortaya çıxdı. Vahid Qədimin də narkotiklə arasının pis olmadığı deyilir.

Ancaq Vahid Qədimin başını bəlaya salan narkotik yox, uğursuz biznesidir. Özünə şərikli biznes quran meyxanaçı şərikinin güdazına gedib, borc bataqlığında batır. Sonradan məlum olur ki, Vahid Qədimin biznesindən əlavə də borcları olub.

Dələduzluqda da adı hallanan Vahid Qədim meyxanaçı yoldaşlarının dediyinə görə, 3-4 ildir ki, Azərbaycanda yaşamır.

Vahid Qədim məşhur meyxanaların birində deyir:

Atıram, hey satıram, baş qatıram, aldatıram milləti hər gün

Çoxunun vəzyyəti gərgin və didərgin

Bizə aid deyil ancaq nə utanmaq, ay utancaq

Avam axmaq, mənə bax, bax öyrən özünçün bacım oğlu...

Bacısı oğluna verdiyi məsləhət indi Vahid Qədimin öz başında çatlayıb. Vahid Qədimə sözün əsl mənasında bacısı oğluna məsləhət gördüyü kimi bir "day-day" lazımdır.

Bundan başqa məşhur meyxanaçı Namiq Qaraçuxurlu da vaxtı ilə bir neçə dəfə polis tərəfindən saxlanıldığını bildirib. Ancaq bunun hansı səbəblərdən olduğunu məşhur meyxanaçı deməyib. Namiq Qaraçuxurlunu polis bölməsindən xalq artisti İlhamə Quliyevanın çıxardığı da deyilir.

Məşədibaba isə adam öldürdüyünə görə 6 il məhbəs həyatı yaşayıb. Məşədibaba dostu meyxanaçı Elçin Atakişiyevi aralarında yaranan münaqişə zamanı qətlə yetirib. 6 il dəmir barmaqlıqlar arasında qalan Məşədibaba 2000-ci ildə həbsdən çıxıb. Əsərlərinin çoxunu da həbsdə olarkən yazıb...

Meyxana aləmində söz deməkdən əlavə "vurub-tutmaq", "alıb-aldatmaq", "çəkib-şellənmək" dəbdir. Onların çoxu bunu həyat tərzi hesab edir.

Səxavət Məmməd
Ölkə.az