Xəzər Universitetindəki elan qalmaqal yaratdı: \"Həddini aşıb, cəza veriləcək\" - FOTO

Xəzər Universitetinin həyətində yerləşdirildiyi bildirilən elan müzakirələrə səbəb olub.

Ölkə.Az xəbər verir ki, bu barədə təhsil eksperti Kamran Əsədov paylaşım edib. Sözügedən elanda tələbələrə xitabən qeyd olunub ki, kənardan yemək gətirmək qəti qadağandır, əks halda töhmət alacaqlar.

Məsələ ilə bağlı Ölkə.Az-a danışan Xəzər Universitetinin İctimai Əlaqələr və Media şöbəsinin direktoru Əlövsət Əmirbəyli artıq müvafiq addımlar atıldığını deyib:

“O elan bizim yeməkxana müdirinin səlahiyyətlərini aşan bir məsələdir. Həmin elanı gecə görmüşdüm. Səhər saat 07:30-da gəlib o elanları yığıb atmışam. Elanı verən qadın da rektorluğa dəvət olunub. Ona bu gün ciddi cəza veriləcək və bununla da o öz həddini aşdığını biləcək. O, həddindən artıq böyük səlahiyyətləri mənimsəyib. Birincisi, sən yeməkxana müdiri tələbəyə heç vaxt töhmət verə bilməz. İkincisi, yeməkxana müdiri elə bir elan asa bilməz. Üçüncüsü, orada müdiriyyət yazılıb. Bizdə müdiriyyət yoxdur. Rektorluq var. Özünə də demişik, təcili şəkildə universitetə çağırılıb. Saat 10:00-da rektor da gələcək. Onunla bağlı ciddi tədbir görüləcək. Yəni bu məsələ tamamilə yoluna qoyulub”, - deyə o söyləyib.

Billurə Yunus