8-ci km bazarı: epidemiya ocağından

Deyirlər, küçədən bir şey almayın, bazarlardan alın. Səbəb kimi antisanitar vəziyyəti göstərirlər. Aydınlaşdırmaq istədik, görəsən bazarlarda vəziyyət necədir?

Ölkə.az-ın əməkdaşları bazarlardakı vəziyyəti öyrənmək üçün paytaxtın ən iri bazarlarından biri olan "8-ci klometr" bazarında olub.

Qarşımızda açılan mənzərə bizi şoka saldı. 8-ci kilometr bazarından sözün əsl mənasında mikrob yağırdı.

Bazarın içərisi ilə gəzirik. Ətraf zibilliyi xatərladır. İnsanlar nəsə almaq üçün sanki minalanmış sahə ilə gedirmiş kimi hərəkət edir ki, ayağı nəyəsə bulaşmasın, ayağının altında "mina", yəni pomidor partlayıb özünün və ətrafındakıların üstünü batırmasın.

Bazarı başdan başa gəzirik. Hər tərəfdə vəziyyət eynidir. Hər tərəfin zibil içində batmasına baxmayaraq bir nəfər də olsun təmizlikçi gözümüzə dəymir. Ticarət nöqtələrinin aylıq icarəsinin qiymətlərinə görə şəhərin ən bahalı bazarlarından biri kimi tanınan bu bazarın görəsən 5-10 nəfər təmizlikçi saxlamağa imkanı niyə yoxdur? Dəhşətlisi isə buur ki, bu bazardan şəhərin az qala yarısı ərzaq məhsulu alır. Yenə paltar bazarı olsa idi dərd yarı idi...

Bazarda olduğumuzun arıq rəhbərliyə çatdırıldığını hiss edirik. Bizə iki mühafizəçi yaxınlaşır. Bildirirlər ki, əvvəlcə rəhbərliklə görüşün, onlar icazə versələr çəkiliş edərsiz. Gəlirik bazar rəhbərliyinin yerləşdiyi bölməyə. Vəsiqələrimizi göstərdikdən sonra özünü təqdim etməyən bazar müdriyyətinin işçisi mühafizəçilərdən birini də bizə qoşur. Yenidən qayıdırıq bazarın içərisinə. Gördüklərimiz bizi yenidən şoka salır. Sanki bazarın içində sanki iməclikdir. Bir neçə əli süpürgəli, xəkəndazlı qadın və kişi bazar polkalarının arasını ildırım sürəti ilə təmizləyirlər. Zibil, meyvə və tərəvəz tullantıları o qədər çoxdur ki, yanlarındakı zibil arabası dəqiqə çəkməmiş zibil tayası ilə dolur.

Bazarın kənarına çıxırıq. Yol tamamilə zibilin içindədir. Tapdalanmış pomidorlar bizə İspaniyadakı "tomat festivalını" xatırladır. Səkinin yaxınlığındakı zibilqabılara baxırıq, zibil qutulardan kənara daşıb. Üfunət iyinin təsirindən yenidən geri qayıdırıq. Yanımızdakı mühafizəçi bildirir ki, buranın bazara heç bir aidiyyatı yoxdur. Buraya Nizami rayon icra hakimiyyəti baxır. Vəziyyəti görəndən sonra belə başa düşüldük ki, Nizami rayon icra hakimiyyəti bura ümumiyyətlə baxmır. Ətrafından zibil dağından belə qənaətə gəlmək olar ki, bu qutular günlərlə boşaldılmır. Maraqlıdır, bəs görəsən Nizami rayon icra hakimiyyəti hara baxır?

Ətrafdan keçən bir-neçə rayon sakimi ilə danışırıq. Hamısı bazarlardakı antisanitar vəziyyətdən şikayət edir. Sadəcə digər yerlərlə nisbətdə bu bazara çeşid bolluğuna və nisbətən ucuzluğa görə bura gəldiklərini bildirirlər. 8-ci kilometr bazarının təkcə meyvə tərəvəz satılan hissəsində yox, elə pal-paltar satılan hissəsində də eyni acınacaqlı vəziyyətlə üzləşirik.

Bazar boyu diqqətimizi çəkən əsas şeylərdən biri də heç bir yerdə belə zibil qutusuna rast gəlməməyimiz oldu. Kimin nə əlinə gəlirsə, atır yerə. Ətrafda isə kifayət qədər insan gördük ki, əlindəki zibili atmaq üçün yer axtarır, amma tapmır, sakitcə əlindəki tullamaq istədiyi əşyanı bir kənara qoyub arxasınca da baxır ki, görəsən görən olmadı.

İndi isə gəlin epidemiya ocağından heç nə ilə fərqlənməyən 8-ci km bazarına qısa bir səyahət edək:

Ölkə.az, Monitorinq şöbəsi