Həftənin icmalı
Bakı-Sumqayıt qatarında gediş haqqının qiyməti açıqlandı
17.08.2015
Bakı-Sumqayıt qatarında gediş haqqı 50 və ya 70 qəpik ola bilər
Bunu Trend-ə açıqlamasında Dəmir Yolları Qapalı Səhmdar Cəmiyyətinin mətbuat xidmətinin rəhbəri Nadir Əzməmmədov deyib.
Onun sözlərinə görə, artıq bu barədə Nəqliyyat Nazirliyinin Sərnişin Daşıma Departamenti təkliflərini Tarif Şurasına təqdim edib.
Qiymətləri Tarif Şurasının müəyyənləşdirəcəyini deyən N.Əzməmmədov gediş haqqının kart sistemi ilə olub-olmayacağına da aydınlıq gətirdi: “Qiymətlər sosial yönümlü olacaq. Bununla bağlı təkliflər artıq verilib. Qərar yaxın vaxtlarda verilməlidir. Çünki sentyabrın 15-ə kimi Bakı-Sumqayıt qatarı istifadəyə verilməlidir. Qiymətlər barədə qərar veriləndən sonra çalışacağıq ki, burada da kart sistemini tətbiq edək. Amma yəqin ki, kart sistemi bir müddət sonra tətbiq olunacaq. Çünki bu, bir az zaman alan məsələdir”.
Həştərxanlı analar Azərbaycanın birinci xanımına təşəkkür etdilər
17.08.2015
Rusiyanın Həştərxan şəhərində 11 saylı yeni məktəbəqədər təhsil müəssisəsi 60 həştərxanlı uşaq üçün qapılarını açdı. Uşaqların bağçaya qəbulu davam etməkdədir.
Burada artıq tərbiyə almağa başlayan uşaqların valideynləri uşaq bağçasının rahat və müasir binasını dəyərləndirərək, Heydər Əliyev Fondunun rəhbəri, Azərbaycanın birinci xanımı Mehriban Əliyevaya təşəkkür məktubu yazıblar.
““Drujba” uşaq bağçası fondun birbaşa dəstəyi ilə tikilib. Məktubda analar gözəl və rahat bina, təmiz və ürəkaçan qruplar, həyətdə müasir oyun meydançası üçün təşəkkür ediblər.
Anar Məmmədov ABŞ-a səfər edəcək
17.08.2015
ABŞ-da təsis edilmiş və bu ölkədə fəaliyyət göstərən Azərbaycan-Amerika Alyansının rəhbəri, Makedoniyanın Azərbaycandakı fəxri konsulu Anar Məmmədov Azərbaycanın paytaxtı Bakının erməni daşnaklarından azad edilməsinin 97-ci ildönümü münasibətilə Vaşinqtona səfər edəcək.
Alyansın mətbuat xidmətindən Ölkə.Az-a verilən məlumata görə, ABŞ tarixinə qara hərflərlə yazılmış 11 sentyabr hadisələrinin növbəti ildönümü ərəfəsində baş tutacaq bu səfərin əsas məqsədi 15 sentyabr 1918-ci ildə Bakının erməni daşnakları, erməni terrorçularından azad edilməsi uğrunda Azərbaycan xalqının apardığı istiqlal mübarizəsi, daşnakların xalqımıza qarşı törətdiyi soyqırım barədə ətraflı məlumatlandırmaqdır.
Səfər çərçivəsində ABŞ-ın bir sıra tanınmış konqresmenləri və senatorları ilə görüşlər planlaşdırılır.
Bakı rusiyalı turistlər üçün ən bahalı şəhərdir
17.08.2015
Rusiyanın onlayn-bron xidməti Oktogo.ru məzuniyyət mövsümündə istirahət üçün yaxın xaricin hansı şəhər və kurortlarının populyar olduğunu müəyyən edib.
Reytinq 2015-ci ilin avqust ayının1-dən 31-nə kimi müstəqil səyahət edən turistlər tərəfindən edilmiş bronlara əsaslanır.
“Oktogo.ru”nun məlumatına əsasən 10 ən populyar şəhərlərin siyahısına Minsk, Tbilisi, Almatı, Kiyev, İrəvan, Bakı, Astana, Bişkek, Kişinyov və Daşkənd daxildir.
Səfərlər üçün ən ucuz şəhər – Bişkek (sutkada 1,2 min rubl/19 manat), ən bahalı şəhər isə Bakıdır (6 min rubldan çox /96 manat). Minskdə oteldə qalmaq üçün turist orta hesabla sutkada 3 min rubl, Tbilisidə 3,2 min rubl, Almatıda isə 5 min rubl xərcləyir.
Kabel televiziyaları qiymətləri qaldırdı
17.08.2015
Azərbaycanın kabel televiziya operatorları sentyabrın 1-dən baza paketə vahid tarif – aylıq 10 manat - tətbiq edir.
Bu barədə Azərbaycanın telekommunikasiya bazarındakı mənbə məlumat verib.
Mənbə bildirib ki, bu yenilik kabel operatorlarının xarici TV-kontent tədarükçüləri ilə qarşılıqlı hesabatlarını dollarda aparması ilə əlaqədardır: “Kabel operatorlarının tarifləri 2006-cı ildən dəyişməyib. Operatorlar tərəfindən baza televiziya paketinə vahid tarifin tətbiq edilməsi məsələsinə çoxdan baxılırdı. Bu son dərəcə iqtisadi addımdır. Belə ki, kabel operatorları xarici kontenti, həmçinin lazımi texniki avadanlığı dollarla alır”.
Baza TV-paketin qiymətinin artması ilə bağlı məlumatı “B&BTV Communications”, “ATV Plus”, “Smart TV Plus”, “KATV1”, “AileTV” və “Connect” şirkətləri təsdiqləyib.
Azərbaycanın sərhəd sularını üç yeni gəmi qoruyacaq
18.08.2015
Yaxın gələcəkdə daha üç yeni gəmi sərhəd sularında xidmətə başlayacaq.
Ölkə.Az xəbər verir ki, bu barədə Dövlət Sərhəd Xidmətinin rəisi, Sərhəd Qoşunlarının komandanı general-polkovnik Elçin Quliyev “Azərbaycan” qəzetinə müsahibəsində deyib.
Onun sözlərinə görə, Dövlət Sərhəd Xidmətinin gəmi inşası zavodu dəniz sərhədlərimizin mühafizəsinə öz töhfələrini verməkdədir.
“Zavodun imkanları hesabına sərhəd sularında dövlət maraqlarımızın qorunması imkanları xeyli dərəcədə genişlənir və nəticə etibarilə dəniz sərhədlərimizin mühafizəsinin, sərhəd rejimi qaydalarının, karbohidrogen ehtiyatlarının hasilatı və nəqli infrastrukturunun təhlükəsizliyinin təmin edilməsinin səviyyəsi daha da yüksəlir. Artıq zavodda inşa olunan dörd gəmi dəniz sərhədlərimizin mühafizəsindədir”, - xidmət rəisi bildirib.
Nazirlik Göygölü zibilləyənləri cərimələdi
18.08.2015
Göygöl Milli Parkın ərazisini zibilləyən 15 nəfər cərimələnib.
Bunu Ekologiya və Təbii Sərvətlər Nazirliyinin Bioloji Müxtəliflik Departamentinin direktoru Vaqif Cavadov deyib.
Onun sözlərinə görə, ərazini çirkləndirən vətəndaşlar İnzibati Xətalar Məcəlləsinə uyğun olaraq cərimə edilib:
“Müxtəlif yerdə zibil qabları qutusu qoyulub, 10 minə yaxın zibil torbası alınıb. Bu cərimə ilə həll olunan deyil, ictimai nəzarət olmalıdır, insanlarda bir-birinə qarşı ictimai qınaq olmalıdır”
Azərbaycan və Türkiyə Hərbi Hava Qüvvələrinin birgə taktiki təlimləri keçiriləcək
18.08.2015
Azərbaycan ilə Türkiyə arasında illik hərbi əməkdaşlıq planına əsasən, iki ölkənin Hərbi Hava Qüvvələrinin iştirakı ilə “TurAz Qartalı - 2015” taktiki təlimləri keçiriləcək.
Müdafiə Nazirliyinin mətbuat xidmətindən ÖLkə.Az-a bildiriblər ki, avqustun 22-dən başlayacaq təlimlərə Azərbaycan və Türkiyə Hərbi Hava Qüvvələrinə məxsus 30-dan artıq aviasiya vasitəsi, o cümlədən “MiQ-29”, “F-16” qırıcı, “Su-25” hücum, “F-4E” bombardmançı, “C-130 Herkules” hərbi-nəqliyyat təyyarələri, “Mi-35” döyüş, “Mi-17” və “Sikorski UH-60” döyüş-nəqliyyat, “Cougar AS532” axtarış-xilasetmə helikopterləri cəlb olunacaq.
Cəbhəyə ezam ediləcək jurnalistlər MTN-nin rəyi əsasında akkreditasiyadan keçəcəklər
19.08.2015
Nazirlər Kabineti “Jurnalistlərin cəbhəboyu zonada akkreditasiyası və cəbhəboyu zonaya xidməti ezamiyyətlərinin Azərbaycan Respublikasının Müdafiə Nazirliyi ilə razılaşdırılması Qaydası”nı təsdiq edib.
Bu Qayda jurnalistlərin Azərbaycan Respublikası Silahlı Qüvvələrinin Ermənistan Respublikasının Silahlı Qüvvələri ilə təmas xəttinə bitişik ərazilərdə (cəbhəboyu zona) akkreditasiyası, o cümlədən kütləvi informasiya vasitələri ( KİV) nümayəndələrinin cəbhəboyu zonaya xidməti ezamiyyətlərinin Müdafiə Nazirliyi ilə razılaşdırılması qaydasını müəyyən edir.
Göygölə giriş bağlandı
19.08.2015
Göygöl Milli Parka buraxılış bir neçə saatlıq dayandırılıb.
Ölkə.Az xəbər verir ki, bu barədə APA-nın müxbiri Vusal Mammadov (fotolar müxbirə məxsusdur - red.) sosial şəbəkədə yazıb.
“İki gündür “Göygölü zibil basıb” deyənlərə "şad” xəbər. Bu gün təmizlik məqsədi ilə gölə buraxılış bir neçə saatlıq dayandırılıb”, - deyə, hadisə yerində olan jurnalist yazıb.
Dövlət Komitəsi: Hər il ölkədə 800-900 uşaq övladlığa götürülür
19.08.2015
“2006-2015-ci illəri əhatə edən “Dövlət uşaq müəssisələrindən uşaqların ailələrə verilməsi və alternativ qayğı Dövlət Proqramı”nda ailələrə verilən uşaqların sayının artması, dövlət uşaq müəssisələrində olan uşaqların və belə müəssisələrin, eləcə də dövlət uşaq müəssisələrinə yerləşdirilən uşaqların sayının azalması qarşıya məqsəd qoyulmuşdu. Amma təəssüf ki, biz bu gün Dövlət Proqramında qarşıya qoyulan məqsədə çatmamışıq”.
Ölkə.Az xəbəbr verir ki, bunu APA-ya Ailə, Qadın və Uşaq Problemləri üzrə Dövlət Komitəsinin İnformasiya və Analitik araşdırmalar şöbəsinin müdiri Elgün Səfərov deyib.
Azərbaycanda generalın oğluna hökm oxunub
19.08.2015
Daxili İşlər Nazirliyinin (DİN) İnsan Alverinə Qarşı Mübarizə İdarəsinin rəisi, general-mayor Şərif Əsədullayevin oğluna hökm oxunub
Ölkə.Az APA-ya istinadən xəbər verir ki, Bakı Ağır Cinayətlər Məhkəməsində hakim Azad Məcidov sədrliyi ilə keçirilən prosesdə Tamerlan Əsədullayevin cinayət işi üzrə məhkəmə prosesi yekunlaşıb. Məhkəmənin hökmü ilə T. Əsədullayevə şərti cəza verilib və o, məhkəmə zalından azadlığa buraxılıb.
Azərbaycanda yeni seçki məntəqələrinin yaradılması planlaşdırılır
19.08.2015
Mərkəzi Seçki Komissiyasi aşağı seçki komissiyası üzvlərinin maarifləndirilməsinin təşkilinə dair tədbirlər keçirəcək. Bu barədə Mərkəzi Seçki Komissiyasının (MSK) sədri Məzahir Pənahov MSK-nın bu gün keçirilən iclasında deyib.
Onun sözlərinə görə, Azərbaycan Prezidentinin təsdiq etdiyi Milli Fəaliyyət Proqramına əsasən, bununla bağlı əhatəli proqramlar hazırlanır: "Tədbirlərdə müxtəlif dövlət qurumlarının, eləcə də beynəlxalq təşkilatların nümayəndələri iştirak edəcəklər. Bu tədbirlər əvvəlki illərdəkindən daha geniş olacaq. Tədbirlər avqustun 25-26-da yerlərdə keçiriləcək. Bununla əlaqədar MSK üzvləri həmin yerlərə ezam olunacaq".
Prezident heyvandarlığın inkişaf etdirilməsi ilə bağlı sərəncamlar imzaladı
19.08.2015
Azərbaycan Prezidenti İlham Əliyev Heyvandarlığın inkişafına dövlət dəstəyinin gücləndirilməsi haqqında sərəncam imzalayıb.
Sərəncamı Prezident Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan Respublikasında ərzaq təhlükəsizliyi ilə bağlı tədbirlər çərçivəsində heyvan mənşəli məhsulların istehsalının daha da artırılması və cins iribuynuzlu damazlıq heyvanlara olan tələbatın ödənilməsi məqsədi ilə verib.
Evsizlərə şad xəbər
19.08.2015
Azərbaycanda sosial mənzillərin tikilməsi ilə bağlı məsələ Milli Məclisin payız sessiyasında gündəmə gətiriləcək.
Ölkə.Az xəbər verir ki, bunu Trend-ə Milli Məclisin Sosial siyasət komitəsinin üzvü Musa Quliyev deyib.
M.Quliyev bildirib ki, sosial mənzillərin tikilməsi və güzəştli şərtlərlə insanlara verilməsi ilə bağlı ya bir qanun qəbul edilməli, ya da bu məsələ aktuallaşdırılaraq Nazirlər Kabinetinin nəzərinə çatdırılmalıdır:
“Hər il Azərbaycanda 80-85 min arası insan evlənir və onların çoxunun yeni mənzillərə ehtiyacı var. Düzdür, ipoteka, o cümlədən sosial ipoteka kreditləri verilir, amma bunlar kifayət etmir, hər kəsin əmək haqqı ipoteka ilə mənzil almağa imkan vermir. Mənzil problemini həll etmək üçün dünya dövlətlərinin sosial evlərin tikilməsi və uzun müddətə insanlara verilməsi sahəsində çox gözəl modeli var. Hesab edirəm ki, onu Azərbaycana tətbiq etmək olar”
Səhiyyə Nazirliyi idarə və müəssisələrə xüsusi tapşırıq verdi
20.08.2015
“Bakı şəhərində fəaliyyət göstərən Səhiyyə Nazirliyinin tabeliyində olan səhiyyə idarə və müəssisələrin rəhbər və işçilərinin şəxsi avtomobillərinin iş vaxtı ümumi qaydaya uyğun həyətyanı ərazilərdə parklanması” ilə bağlı tapşırıq verilib.
Səhiyyə Nazirliyindən Ölkə.Az-a verilən məlumata görə, qurum sözügedən məsələ ilə bağlı toplantı keçirib. Toplantıda iştirak edən idarə və səhiyyə müəssisələrinin rəhbərlərinə bildirilib ki, nəqliyyatın hərəkətinin tənzimlənməsinə dair ölkə başçısının tapşırıqlarının icrası məqsədilə 30 iyun 2015-ci il tarixində Azərbaycan Respublikası Nazirlər Kabinetində Yol Hərəkəti Təhlükəsizliyi Komissiyasının iclası olub və “Bakı şəhərində nəqliyyatın hərəkətinin təkmilləşdirilməsi üzrə əlavə tədbirlər haqqında” Protokol imzalanıb.
Bakının ictimai nəqliyyat sisteminə ciddi “əl gəzdiriləcək”
20.08.2015
Bakının sərnişin nəqliyyatı sistemində, xüsusən avtobus marşrutları ilə bağlı ciddi islahatlar aparılacaq.
Nəqliyyat Nazirliyi yaxın bir ay ərzində paytaxtın sərnişin nəqliyyatı sistemini, xüsusən də avtobus marşrutlarını sahmana salmaq niyyətindədir. Nazir bu sahədə dəyişikliyə yeni kadr təyinatları ilə başlayıb.
Bir müddət öncə nazirin imzaladığı əmrə əsasən, Nəqliyyatın İntellektual İdarəetmə Mərkəzinin (NİİM) baş direktoru Elnur Abdullayev vəzifəsindən azad edilərək Dövlət Avtomobil Nəqliyyatı Xidmətinin (DANX) rəisi vəzifəsinə təyin olunub. Nazirin digər əmri ilə isə NİİM-də İnnovativ inkişaf və ictimaiyyətlə əlaqələr şöbəsinin rəisi Rüfət İmanov NİİM-in baş direktoru vəzifəsinə gətirilib. Bundan əlavə, NİİM-in daha bir şöbə müdiri Ziya Bünyadzadə isə "Bakı Sərnişin və Yük Daşımalarının Təşkili" MMC-nin rəhbəri təyin olunub.
Sürücüləri ən çox aldadan yanacaqdoldurma məntəqələri
20.08.2015
Sorğuda yanacaq kəsən yanacaqdoldurma məntəqələri arasında «Azpetrol» birinci, «Lukoil» ikinci, SOCAR isə üçüncü yerdədir
Azərbaycanda elə bir sürücü tapılmaz ki, yanacağın keyfiyyətindən, yanacaqdoldurma məntəqələrində isə yanacağın çənə fərqli, yəni az vurulmasından narazılıq etməsin. Hər yanacaqdoldurma məntəqəsində yanacaq çəninə fərqli tutumda yanacaq vururlar. Məsələn, elə yanacaqdoldurma məntəqəsi var ki, çəni yarıya kimi doldurub 300 km sürmək olur, amma eləsi də var ki, heç 250 km-i normal getmək olmur.
Avtosfer.az bu və digər məqamları nəzərə alaraq maraqlı bir sorğu keçirib. Sorğu iki aya yaxın müddətdə davam edib. Ümumilikdə, sorğuda 4389 nəfər ihtirak edib. «Hansı yanacaqdoldurma məntəqəsində daha çox benzin kəsirlər» sualına respondentlər aşağıdakı şəkildə cavab veriblər:
Azpetrol 1440 nəfər
LUKoil 1362 nəfər
SOCAR 1021 nəfər
X-Petrol - 80 nəfər
BNQ Petrol - 34 nəfər
İST Petrol - 523 nəfər
ABU Petrol - 316 nəfər
Çiraq Petrol - 64 nəfər
OSCAR Petrol - 83 nəfər
Zakir Həsənov ordunu həyacan siqnalı ilə ayağa qaldırdı
20.08.2015
Azərbaycan müdafiə naziri general-polkovnik Zakir Həsənov cəbhəboyu zonada yerləşən birlik və birləşmələrin döyüşə hazırolma səviyyəsini yoxlayıb.
Ölkə.Az Müdafiə Nazirliyinin məlumatına istinadla xəbər verir ki, qəfil həyacan siqnalı ilə qaldırılan qoşunların hərtərəfli döyüş hazırlığı, qarşıya qoyulan vəzifələri qısa müddətdə yerinə yetirmək üzrə bacarıqları və manevr imkanları yoxlanılmaqla praktiki döyüş atışları icra olunub.
Müdafiə naziri yoxlanılan hərbi hissələrin döyüş və əməliyyat imkanlarını, hərbi əməliyyatları aparmaq qabiliyyətini yüksək qiymətləndirib.
Vasif Talıbov naziri işdən çıxartdı
20.08.2015
Azərbaycanın Naxçıvan Muxtar Respublikasının mədəniyyət və turizm naziri vəzifəsindən azad edilib.
Ölkə.Az xəbər verir ki, APA-nın məlumatına görə, bununla bağlı Naxçıvan Muxtar Respublikası Ali Məclisinin sədri Vasif Talıbov sərəncam imzalayıb.
Sərəncama əsasən Sarvan İbrahimov Naxçıvan Muxtar Respublikasının mədəniyyət və turizm naziri vəzifəsindən azad edilib.
Dövlət qulluğunda işləyənlər üçün növbəti şans
21.08.2015
Azərbaycan Respublikasının Prezidenti yanında Dövlət Qulluğu Məsələləri üzrə Komissiya tərəfindən 31 dövlət orqanında inzibati vəzifələrin beşinci – yeddinci təsnifatlarına uyğun olan 211 vakant dövlət qulluğu vəzifəsinin tutulması üçün elan edilmiş müsabiqə başa çatıb.
Komissiyadan Ölkə.Az-a bildiriblər ki, müsabiqədə iştirak etmək üçün Komissiyada 844-ü qadın namizəd olmaqla 2850 namizəd qeydə alınmışdır. Qeydə alınmış 2850 namizədin 75,72%-ni gənclər təşkil edib.
Sentyabrda dəmir yollarında gücləndirilmiş iş rejimi tətbiq ediləcək
21.08.2015
2015-2016-cı il yeni tədris ilinin başlaması ilə əlaqədar "Azərbaycan Dəmir Yolları" Qapalı Səhmdar Cəmiyyəti gücləndirilmiş iş rejiminə keçəcək.
Ölkə.Az xəbər verir ki, bunu Trend-ə açıqlamasında qurumun mətbuat xidmətinin rəhbəri Nadir Əzməmmədov deyib.
Sentyabrın 15-də dərs illinin başlaması ilə əlaqədar sıxlığın olacağını istisna etməyən N.Əzməmmədov qeyd etdi ki, bununla bağlı artıq işlərə başlanılıb və çox güman ki, xəttə əlavə qatarlar qoşulacaq: “Hər il sentyabrda dərs ilinin başlaması həm avomobil yolları, həm də dəmir yolu ilə gələnlərin artmasına səbəb olur. Ona görə də biz hər il olduğu kimi bu il də bir sıra qabaqlayıcı tədbirlər həyata keçirməyi düşünürük. Adətən biz bunu bilet satışına olan tələbatdan bilirik. Sentyabrın 5-ə qədər bilet satışının çox olduğunu görsək, xəttə əlavə qatarlar qoşacağıq. Ümid edirəm ki, sərnişindaşımada, insanların gediş-gəlişində heç bir problem yaşanmayacaq”.
Azərbaycanda daha bir iş adamı axtarışa verildi
21.08.2015
Azərbaycanda daha bir iş adamı axtarışa verilib.
Ölkə.Az xəbər verir ki, APA-nın məlumatına görə, “Şatl” MMC-nin təsisçisi və rəhbəri Sərvər Şeyxov Cinayət Məcəlləsinin 178.3.2-ci (dələduzluq – külli miqdarda ziyan vurmaqla törədildikdə) maddəsi ilə təqsirləndirilir.
Məlumata görə, S. Şeyxov dəfələrlə vergi və bank borcları ilə bağlı dəfələrlə məhkəməyə verilib. Lakin o borcları ödəməkdən boyun qaçırıb.
Hazırda polis onun tutulması istiqamətində əməliyyat-axtarış tədbirlərini davam etdirir.
Zakir Həsənov Küveyt səfiri ilə görüşdü
21.08.2015
Avqustun 21-də Azərbaycanın müdafiə naziri general-polkovnik Zakir Həsənov Küveyt Dövlətinin ölkəmizdəki fövqəladə və səlahiyyətli səfiri cənab Səud Əbdüləziz Məhəmməd əl-Şəmlan əl-Rumi ilə görüşüb.
Ölkə.Az Müdafiə Nazirliyinin məlumatına istinadla xəbər verir ki, görüşdə regiondakı hərbi-siyasi vəziyyət, Azərbaycan Respublikası ilə Küveyt Dövlətinin Silahlı Qüvvələri arasında hərbi əməkdaşlağın perspektivləri və qarşılıqlı maraq doğuran digər məsələlər müzakirə olunub.
Nazirlik: Azərbaycanda qanunsuz balıq ovlayanların sayı azalıb
21.08.2015
Azərbaycanda qanunsuz balıq ovu edənlərin sayı azalıb.
Ölkə.Az xəbər verir ki, bunu Trend-ə açıqlamasında Ekologiya və Təbii Sərvətlər Nazirliyinin Su Hövzələrində Bioloji Resursların artrılması və mühafizəsi departamentinin baş müfəttişi İsmayıl Yunusov deyib. Onun sözlərinə görə, qanunsuz balıq ovu ilə məşğul olanların qarşısını almaq məqsədilə nazirlik əməkdaşları yerlərdə maarifləndirmə və təbliğat işləri aparır.
Nəqliyyat Nazirliyində kadr təyinatı
21.08.2015
Azərbaycanın Nəqliyyat Nazirliyi yanında Dövlət Avtomobil Nəqliyyatı Xidmətinə yeni rəis müavini təyin olunub.
Nəqliyyat naziri Ziya Məmmədovun 21 avqust 2015-ci il tarixli əmri ilə bu vəzifəyə İbrahim Əliyev təyin edilib,
Qeyd edək ki, bundan öncə İbrahim Əliyev Nəqliyyatı İntellektual İdarəetmə Mərkəzində baş direktorun müavini - texniki direktor vəzifəsində çalışıb.
Siqaret çəkməyin qadağan edilməsi ilə bağlı yeni qaydaların tətbiqi gözlənilir
21.08.2015
Azərbaycanda ictimai yerlərdə siqaret çəkməyin qadağan edilməsi gələn ilin sonuna qədər qanun çərçivəsində həll oluna bilər.
Bu barədə Ölkə.Az-a Milli Məclisdən məlumat verilib.
Bildirilib ki, ictimai yerlərdə siqaret çəkməyin qadağan olunması hissə-hissə həyata keçirilir və bu da yaxşı nəticələr verib: “İlk olaraq bir neçə il bundan əvvəl ictimai nəqliyyatda siqaret çəkməyi qadağan edən qanun qəbul edildi. Bu qanun artıq işləyir. Bundan əlavə, ötən ilin sonuncu iclasında Vergi Məcəlləsinə əlavə və dəyişikliklər oldu. Tütün məmulatlarına aksiz vergiləri qaldırıldı və onun qiymətləri artırıldı”.
Azərbaycanda bəzi kolleclər universitetlərin nəzdində fəaliyyət göstərəcək
21.08.2015
Nazirlər Kabineti "Azərbaycan Respublikası Təhsil Nazirliyinin strukturuna daxil olmayan tabeliyindəki qurumların Siyahısı"nda dəyişikliklər edilməsi haqqında qərar qəbul edib.
Qərara əsasən, bundan sonra Azərbaycan Maliyyə-İqtisad Kolleci, Bakı Texniki Kolleci və Bakı Dövlət Rabitə və Nəqliyyat Kolleci bundan sonra hər biri ayrılıqda Azərbaycandakı müxtəlif universitetlərin nəzdində fəaliyyət göstərəcək.
Şahdağda yeni polis bölməsi yaradıldı
21.08.2015
Azərbaycanda yeni polis bölməsi yaradılıb.
Daxili İşlər Nazirliyinin mətbuat xidmətindən Ölkə.Az-a verilən məlumata görə, Qusar rayonunda ictimai qaydanın qorunmasının, ictimai təhlükəsizliyin təmin edilməsinin səmərəsini artırmaq və vətəndaşların polisə müraciətlərini asanlaşdırmaq məqsədi ilə, rayon mərkəzindən uzaqlığını nəzərə alaraq, Azərbaycan prezidentinin tapşırığı ilə, Şahdağ Qış-Yay Turizm Kompleksinin də daxil olduğu Zindan-Muruq, Kuzun, Aladaş və Ləzə kəndlərini əhatə edən ərazi polis bölməsi yaradılıb.
Qazaxıstan-Azərbaycan aviareyslərinin qiyməti qalxır
21.08.2015
“Air Astana” aviaşirkəti Qazaxıstanın milli valyutası tengenin devalvasiya ilə əlaqədar biletlərin qiymətini qaldırır.
“Air Astana”dan verilən məlumata görə, milli valyutanın üzən məzənnəyə keçməsi ilə əlaqədar avqustun 22-dən etibarən beynəlxalq reyslərin tarifləri 25%-dən başlayaraq artacaq.
“Bildiyiniz kimi, dünya aviasənayesi bütün əməliyyatları əsasən ABŞ dolları ilə həyata keçirir. “Air Astana” da gəlirinin əsas hissəsini tengedə aldığından şirkət öz dollar öhdəliklərini ödəmək üçün tarifləri artırmaq məcburiyyətindədir”, - şirkətdən qeyd ediblər.
Elçibəyin vəfatından 15 il ötür
22.08.2015
Bu gün Azərbaycanın eks-prezidenti Əbülfəz Elçibəyin vəfatından 15 il ötür
24 iyun 1938-ci ildə Naxçıvan MR-nin Ordubad rayonunun Kələki kəndində anadan olmuş Elçibəy 7 illik Unuskənd məktəbini bitirdikdən sonra Ordubad şəhər 1 saylı orta məktəbində təhsilini davam etdirib. 1957-ci ildə Bakı Dövlət Universitetinin şərqşünaslıq fakültəsinin ərəb filologiyası şöbəsinə daxil olub. Buranı bitirdikdən sonra (1962) təyinatla SSRİ Hidrolayihə İnstitutunun Bakı şöbəsində tərcüməçi işləyib. 1963-cü ilin yanvarında Misir Ərəb Respublikasına göndərilən Elçibəy 1964-cü ilin okyabrına kimi Asuan bəndinin tikintisində tərcüməçi kimi çalışıb. Xarici ezamiyyətdən dönərək 1965-ci ildə BDU-nun aspiranturasına daxil olub və aspirantura təhsilini 1968-ci ildə uğurla tamamlayıb. "Tulunilər dövləti (868-905)" mövzusunda dissertasiya müdafiə edərək tarix elmləri namizədi alimlik dərəcəsi alıb (1969). BDU-nun "Asiya və Afrika ölkələri tarixi" kafedrasında müəllim və baş müəllim işləyib (1968-1975).
Mingəçevirdə nə baş verir? — Hadisə yerindən reportaj
22.08.2015
İki gün əvvəl Mingəçevir polis şöbəsində ölümlə nəticələnən hadisə baş verib.
Ölkə.Az xəbər verir ki, “Mingəçevir işıqları” qəzetinin yazdığı xəbərə görə, qəzetin əməkdaşı mərhumun yaşadığı Mingəçevir kəndində ailəsinə baş çəkib, əzizlərinin və hadisə iştirakçılarının fikirlərini öyrənməyə çalışıb. 17 yaşlı Əzizov Vaqif Kazım oğlu deyib ki, yoldaşları ilə birgə axşam radələrində bilyard oynamaq üçün kənddən çıxıb: ”Üç nəfər idik: Bəhruz, Dilqəm və mən. Qəbiristanlığın yanına çatanda serjant Samir Həmidov qabağımıza çıxdı. O, 12 nömrəli məktəbdə Bəhruzla məktəb yoldaşı olub. Bir sinif aşağıda oxuyub. Bəhruzla yaxşı münasibəti vardı Samirin maşınının arxasınca da bir 015 gəldi. İçində 3 nəfər vardı. Mən onları tanımadım. Bircə Samiri tanıyırdım. Samir bizə yaxınlaşdı. Dedi ki, oturun maşına, gedirik şöbəyə. Biz etiraz etdik, nə səbəbə aparmaq istədiyini soruşduq. O isə bildirdi ki, səbəbini şöbədə deyəcək. Bundan sonra Bəhruzu və məni zorla maşınına otuzdurdu, Dilqəmə isə dedi ki, sən get”.
Vaqifin dediyinə görə, Polis şöbəsində onu Bəhruzdan ayırıblar: “Mən onun hara aparıldığını görmədim. Məni kəmərimdən, başıaşağı tutmuşdular, saldılar ayaqyoluna, üstümü yoxladılar. Sonra gətirdilər kabinetə. 20 dəqiqədən sonra səs gəldi ki, bir nəfər özünü 3-cü mərtəbədən yerə atıb”.
Ölkə.az
