İntiqam Əliyevin apelyasiya şikayəti təmin edilmədi
Qızıl Xaçın nümayəndələri ona və Leyla Yunusa baş çəkdilər
Məlum olduğu kimi, iyulun 30-dan etibarən Azərbaycanda kütləvi həbs dalğası həyata keçirilir. Artıq bu dalğada indiyə qədər Leyla və Arif Yunus, Rəsul Cəfərov və son olaraq, İntiqam Əliyev kimi tanınmış simalar həbs olunub. Yerli və beynəlxalq təşkilatlar həyata keçirilən kütləvi həbsləri pisləyərək, həbs olunanların dərhal azadlığa buraxılmalarını tələb edirlər.
“Amnesty İnternational” beynəlxalq hüquq müdafiə təşkilatı həbsdə olan hüquq müdafiəçisi İntiqam Əliyevi vicdan məhbusu elan edib. Bu barədə təşkilatın saytında məlumat yerləşdirilib.
Məlumatda deyilir ki, İ.Əliyevin barəsində seçilmiş qərar saxta ittihamlara əsaslanır: “Amnesty İnternational” hesab edir ki, bu həbs birmənalı şəkildə İ. Əliyevin insan haqlarının müdafiəsi sahəsindəki fəaliyyəti ilə əlaqədardır. “Amnesty İnternational” onu vicdan məhbusu hesab edir".
Məlumata İ.Əliyevin həbsinin detalları da əlavə olunub.
İ.Əliyevin həbs olunduğu ilk günlərdə karantində saxlanılması barədə xəbər vermişdik. Hüquq müdafiəçisi artıq kameraya köçürülüb. Bu barədə onun oğlu Nəcmin Əliyev sosial şəbəkədə status paylaşıb: “Vəkil Anar Qasımlı iyulun 12-də atamla görüşüb. İyulun 11-də karantindəki saxlanma şəraiti ilə bağlı məlumat yayıldıqdan sonra, Beynəlxalq Qızıl Xaç Komitəsinin nümayəndələri onunla görüşməyə gedib. Görüşdən sonra 4 nəfərlik kameraya keçirilib, şəraitin yaxşı olduğunu deyir. Nümayəndələr rəhbərliyə çatdırmaq üçün xüsusi xahişi olub-olmadığını soruşublar.
Avqustun 12-də İntiqam Əliyevlə görüşən vəkil Anar Qasımlı görüş barədə bunları deyib: “İntiqam müəllimin kameraya köçürülməsi doğrudur. Biz srağagün onun acınacaqlı saxlanma şəraiti barədə məlumat yayandan sonra, Beynəlxalq Qızıl Xaç Komitəsinin nümayəndələri təcridxana gedərək, vəziyyətlə tanış olublar. Bundan sonra onu kameraya köçürüblər. Hazırda 4 nəfərlik kamerada saxlanılır. Saxlanma şəraitindən heç bir şikayəti yoxdur. Artıq otağın havalanması cəhətdən problem yoxdur. İntiqam müəllimlə işin müdafiə taktikası və görəcəyimiz işlər barədə danışdıq”.
Onu da qeyd edək ki, avqustun 13-də İ. Əliyevin həbsindən verilən apelyasiya şikayətinə baxılıb. Hakim Əmir Bayramovun sədrliyi ilə keçirilən prosesdə Hüquq Maarifçiliyi Cəmiyyəti rəhbəri haqqında birinci instansiya məhkəməsinin qərarı qüvvədə saxlanılıb. Vəkillərin məhkəməyə təqdim etdiyi apelyasiya şikayətində həbs qətimkan tədbirinin ləğv olunması göstərilib.
Məhkəməyə gətirilən İ.Əliyev çıxışında həbsinin bir daha siyasi sifarişli olduğunu deyib. Onun sözlərinə hakimiyyət bu həbslə Avropa Məhkəməsinə göndərilən şikayətlərin qarşısını almaq istəyir. Hüquqşünas məhkəmələrdən ədalət gözləmədiyini qeyd edib.
Həbs edilənlərdən Leyla Yunusun səhhəti günü-gündən pisləşir. Bu barədə artıq ikinci həftədir ki, Bakı İstintaq Təcridxanasında saxlanılan şəkərli diabet xəstəsi olan L.Yunusun özü dostlarına məlumat verib.
Vətəndaş cəmiyyəti fəalı, həkim Azad İsazadənin “Turan”a verdiyi məlumata görə, L.Yunusa ağrıkəsici iynələr vururlar.
L.Yunus həmçinin bildirib ki, Beynəlxalq Qızıl Xaç Komitəsinin əməkdaşları ona baş çəkib. Bununla belə, prokurorluq hələ də Leyla və Arif Yunusların dostlarının onlara bağlama ötürməyə icazə vermək xahişinə cavab verməyib.
Öz növbəsində Ədliyyə Nazirliyinin Penitensiar Xidməti L.Yunusun saxlanma şəraiti ilə bağlı bildirib ki, müasir standartlara uyğun inşa edilmiş və beynəlxalq müşahidəçilərin də daim yüksək qiymətləndirdikləri Bakı İstintaq Təcridxanasındakı kameralarda hava çatışmazlığı ilə bağlı problem mövcud deyil. Bütün kameralarda Cəza İcra Məcəlləsinin və Daxili İntizam Qaydalarının tələblərinə uyğun şəkildə təmiz hava axınının mövcudluğu təmin edilir. Bununla yanaşı, təqsirləndirilən şəxs gəzinti hüququndan istifadə edir.
Beynəlxalq təşkilatlardan “Amnesty İnternational” Yunusların səhhəti ilə bağlı növbəti dəfə narahatlıqlarını dilə gətirib. Təşkilatın avqustun 12-də verdiyi bəyanatda deyilir ki, Azərbaycan hakimiyyəti şəkər xəstəliyi və böyrək çatışmazlığı ilə bağlı Leyla Yunusa tibbi yardım göstərməkdən və ya dərman verməkdən imtina edir. “Amnesty İnternational” bildirir ki, 57 yaşlı Leyla Yunus ağrılardan və zəiflikdən şikayətlənir, ancaq təcridxana rəhbərliyi onu xəstəxanaya köçürmür.
Təşkilat onların həbsdən buraxılmasını tələb edir.
Ölkə.Az
