"Gilan Holdinq"in avtomobilləri gömrük rüsumuna niyə tabe tutulmur?

Ölkəyə gətirilən avtomobillərin gömrük rüsumuna tabe tutulma qaydaları mətbuatda həmişə qalmaqal mövzusu olub.

Korrupsiyanın ən dərin kök saldığı dövlət strukturu olan Gömrük sistemində baş verənlər sözün əsl mənasında biabırçılıqdır. Ölkəyə gətirilən mallardan, xüsusən dəyərli əşyalardan alınan gömrük rüsumu (şapkası) dünyanın heç bir yerində görünməmiş məbləğdədir. Ölkəyə gətirilən malların maya dəyərindən az qala iki dəfə artıq gömrük rüsumu ödəməli olan hər bir Azərbaycan vətəndaşı "milli gömrükxana"mıza cəhənnəm girdabı kimi baxır. Gömrükdən ən çox şikayətlənənlər isə ölkəyə avtomobil gətirən vətəndaşlarımızdır. Gömrükdə Avropadan və ya qonşu Gürcüstandan ölkəyə gətirilən avtomobilin maya dəyərindən 10% - 20% daha yüksək məbləğ ödəyən vətəndaşlardan redaksiyamıza hər ay onlarla məktub daxil olur.

Faktı dəqiqləşdirmək üçün ölkəyə gətirilən və gömrük rüsumuna tabe tutulmayan şirkət avtomobillərini araşdırmaq qərarına gəldik. Gömrük sisteminə patronluq edən yüsək vəzifəli nazirə məxsus "Gilan" şirkətlər qrupuna hər il minlərlə müxtəlif tonnajlı avtomobilin gətirildiyini öyrəndik. Qrupun ən iri firmalarından biri olan "Benkons" MMC-nin sifarişi ilə son ay ərzində ölkəyə yüzlərlə "Isuzu" markalı yük maşını gətirilib. Bu avtomobillər "Gilan" şirkətlər qrupunun ambarlarından birinin ərazisində saxlanılır. Apardığımız araşdırmalar nəticəsində məlum oldu ki, "Benkons" MMC də daxil olmaqla "Gilan"ın bütün firmalarına gətirilmiş nəqliyyat vasitələri gömrük rüsumuna tabe tutulmur. Gömrük orqanlarındakı etibarlı mənbə bildiri ki, rüsuma tabe tutulan şirkət avtomobilləri isə gömrükdə aşağı qiymətə sənədləşdirilir. 

Maraqlıdır, fərdi qaydada özünə Gürcüstandan bir avtomobil gətirən vətəndaşı soğan qabığı kimi soyan, 100-200 manata görə avtomobilini gömrüyün meydançasında girov saxlayan gömrük işçiləri görəsən hər il adı çəkilən qrupun ölkəyə gətirdiyi yüzlərlə avtomobili niyə gömrük rüsumuna tabe tutmurlar. Qanunlar görəsən ancaq kasıblar və sıravi vətəndaşlar üçünmü işləyir. İllik dövriyyəsi milyardlarla manatı keçən, arxasında iri dövlət məmurunun dayandığı bu holinqə verilən "xüsusi imtiyazlar" görsən kim tərəfindən verilib?

Mənbənin verdiyi məlumatda həmçinin bildirilir ki, "Gilan Holdinq"in ölkəyə gətirdiyi avtomobillər Avro-4 standartlarına cavab vermir və Azərbaycan ərazisinə qaeyri-qanuni daxil ediliblər. Bu isə prezidentin ölkəyə idxal edilən malların mütləq Avro-4 standartlarına uyğun olasanı haqqında verdiyi sərəncamı qulaqardına vurmaq deməkdir.

"Gilan"ın ambarında çəkilmiş avtomobillərin fotolarını sizə təqdim edirik:

Ölkə.az