\"Bu insanların yalnız bir günahı olub ki, onlar azərbaycanlıdır\"

“Bu günlərdə Şuşa həbsxanası ərazisində aşkarlanan kütləvi məzarlıq özlüyündə sülh və insanlıq əleyhinə cinayətlər, müharibə cinayətləri, habelə, şəxsiyyət əleyhinə olan cinayətlərin məcmusunu ehtiva edir. Bilirsiniz ki, bu aşkarlanan ilk kütləvi məzarlıq deyil, daha öncə, 10-dan artıq məntəqədə insanların kütləvi qətlə yetirilib basdırıldığı çoxsaylı yerlər tapılıb”.

“Ölkə.Az” xəbər verir ki, bunu deputat Bəhruz Məhərrəmli parlamentin növbədənkənar ilcasda çıxışı zamanı deyib.

Onun sözlərinə görə, cinayətin subyektiv cəhətinə baxsaq, bu insanların yalnız bir günahı olub ki, onlar azərbaycanlıdır.

“Hər hansı milli, etnik, irqi qrupun qismən və ya bütövlükdə məhv edilməsi məqsədi ilə onların öldürülməsi isə istər 1948-ci il 9 dekabr Soyqırımı cinayətinin qarşısının alınması və cəzalandırılması haqqında Konvensiyaya, istərsə də Azərbaycan Cinayət Məcəlləsinin 103-cü maddəsinə əsasən soyqırım hesab olunur. 

İkincisi, kütləvi dəfn olunanlar müqavimət göstərmək imkanları olmadığı halda vəhşicəsinə qətlə yetiriliblər, adi gözlə skletlər üzərində vəhşiliklərin izlərini görmək olur. Bu humanitar hüquq norma və prinsiplərinin, daha konkret desək, “Hərbi əsirlərlə rəftara dair”, o cümlədən "Döyüşən ordularda yaralıların və xəstələrin vəziyyətinin yaxşılaşdırılması haqqında" Cenevrə Konvensiyaları və 1977-ci il Əlavə Protokolların köklü pozuntusu kimi məsuliyyəti labüd edir. 
Kütləvi məzarlıqların sayı göstərir ki, Ermənistanın dövlət səviyyəsində bu cinayətləri dəstəkləyib və əminliklə demək olar ki, hələ də taleyindən xəbərsiz olduğumuz 4000-ə yaxın soydaşımızın əksəriyyətinin dəfn olunduğu kütləvi məzarlıqların koordinatları Ermənistan hərbi-siyasi rəhbərliyində mövcudur”, - o qeyd edib.

O sual edib ki, görün, beynəlxalq insan haqları təsisatları beynəlxalq humanitar hüququn bu köklü pozuntusuna ümumiyyətlə reaksiya verirlərmi:

“Bu gün hüquq da ədalət də tələb edir ki, bu cinayətləri törədən erməni hərbiçiləri, Ermənistanın ozamankı hərbi siyasi rəhbərliyi, o cümlədən həmin cinayətlərə göz yuman, kütləvi məzarlıqların koordinatlarını gizlətməklə  cinayətləri ört-basdır etmək istəyən hər kəs məsuliyyətə cəlb olunmalıdır. Əks halda  cəzasızlıq mühiti bölgədə yeni faciələrə yol aça bilər.

Eyni zamanda, Ermənistanın işğal və təcavüz siyasətinə rəvac verən, bu cinayətlərin ortağı olan ozamankı AXC-Müsavat hakimiyyətinin məsuliyyəti məsələsinə baxılmalıdır. Təsəvvür edin, cəbhədə ağır döyüşlər getdiyi halda AXC-Müsavat iqtidarı Silahlı Qüvvələrin bütün növlərindən ibarət hərbi qüvvələri vətəndaş müharibəsinə cəlb etdilər, nəticədə Ermənistan Ağdam, Füzuli, Cəbrayıl istiqamətlərində hücumları şiddətləndirib strateji mövqeləri tutdular, bu rayonların işğalı labüdləşdi, ən ciddi itkilərimiz, itkinlərimiz həmin dövrlərə təsadüf etdi, indi məsuliyyətdən danışırıqsa, eyni zamanda bunların da məsuliyyəti barədə artıq düşünmək lazımdır".